මුලින්ම ඒ එෆ් පී පුවත්සේවයේ ඇස ගැටුණු සහාර්ගේ වයස යන්තම් මාසයකි. එවිට ඇගේ බර කිලෝ 2කටද වඩා අඩු විය. ඇගේ දෙනෙත් බියජනක ලෙස ගිලිලා ය. ආලෝකය...
මුලින්ම ඒ එෆ් පී පුවත්සේවයේ ඇස ගැටුණු සහාර්ගේ වයස යන්තම් මාසයකි. එවිට ඇගේ බර කිලෝ 2කටද වඩා අඩු විය. ඇගේ දෙනෙත් බියජනක ලෙස ගිලිලා ය. ආලෝකය නොව අඳුර පවා විනිවිද යන තරමට ඇගේ සම වියැළී තුනී වෙලා ය. ඉළ ඇට කූඩුව ඒ සම පසාරු කරගෙන යවුල් මෙන් ඉලිප්පිලා ය.
වහාම හමොව්රියා නගරය වෙත ගෙන ගිය දැරියට මන්ද පෝෂණය සඳහා ප්‍රතිකාර කෙරුණේය. පලක් නැත. ප්‍රමාද වැඩි ය. උපන් දා පටන් පුරා මාසයක් අති මහත් කුසගින්න ද, ඒ නිසාම ශරීරාභ්‍යන්තර ඉන්ද්‍රියයන්ගේ අකර්මණ්‍යතාවය ද දරා සිටි මේ සිඟිත්තිය මරු සමග යාම සැපතකැයි තීරණය කළා වැන්න.
ඇය උපන් නගරයේ ඇය වැනි අහිංසක ප්‍රාණියෝ දස දහසක් පමණ වෙති. “නගරය වෙත ආහාර සැපයුම් නතර වෙලා. මෙවැනි මරණ මාලාවක් ඉදිරියේදී බලාපොරොත්තු විය යුතුයි..” යැයි ජාත්‍යන්තර ආධාර කණ්ඩායම් පවසයි. මෙම සැපයුම් නතර කර තිබෙන්නේ ඔවුන්ගේම රටේ ජනාධිපතිවරයා වන බෂර් අල් අසාද් විසිනි. නගරයෙන් ළදරු කිරි පිටි පැකට්ටුවක් පවා සොයාගත නොහැක.
හමොව්රියා නගරයේ රෝහල් ගණනාවක් සුබසාධන පදනම යටතේ පවත්වාගෙන යන මොහොමඩ් කටූබ් පවසන්නේ මේ වනවිට සහර් වැනි දරුවන් අවම වශයෙන් 68 දෙනෙක්වත් තමන් විසින් හඳුනාගෙන ඇති බවයි. මේ දරුවෝ ලෝකයේ කුරිරුකම ගැන කඳුළු සලකුණු තබා මෙලොව හැර යාම සඳහාම මෙලොවට පැමිණියෝ වෙත්.
ඒ එෆ් පී පුවත්සේවයේ වාර්තාවලට අනුව ගතවූ මාස කිහිපයේදී සිරියාවේ මෙම පළාතේ වෛද්‍ය අධීක්ෂණයට ලක් කළ දරුවන් 9,700 දෙනාගෙන් 80 දෙනෙක් පමණම මාරක මන්දපෝෂණ තත්වයකින් පෙළෙති. 200 දෙනෙක් තීව්‍ර මන්දපෝෂණයෙන් පෙළෙති. තවත් 4,000 ක් දෙනා බරපතළ පෝෂණ ඌනතාවලින් පෙළෙති. සිරියාවේ හමොව්රියා නුවරට අන්තර්ජාතික ආධාර නොලැබෙන්නේ නොවේ.
අන්තර්ජාතික මානුෂීය ආධාර ඒජන්සි විසින් දින කිහිපයකට වරක් බැගින් හෝ ඔවුන්ට අත්‍යාව්‍ය ආහාර සලාක ක්‍රමයට ලබාදෙයි. මේ අතර ජගත් සංවිධානය විසින් ලබාදෙන අන්තර්ජාතික මානුෂීය ආධාර ද බෂර් අල් අසාද්ගේ හමුදාව විසින් දැඩි ලෙස සීමා කර තිබේ. සටන්කාමීන්ගේ ප්‍රචණ්ඩ ක්‍රියා නිසා ලැබෙන සීමා සහිත ආධාර ප්‍රමාණය ද දුක් විඳින ජනයා වෙත ලෙහෙසියෙන් ළඟා නොවේ. එසේ ආධාර ලබන අය අතරින් ද බොහෝ අය පුරුදු වී සිටින්නේ තමන්ට ලැබෙන ආහාර සලාකය විකුණා දමා එයින් පවුලට අත්‍යාවශ්‍ය සීනි කිලෝවක් හෝ පාන් රාත්තලක් මිලදී ගන්නට ය. ආහාර හිඟකම නිසාම මෙහි ආහාර ගිනි ගණන් ය. සාමාන්‍යයෙන් සීනි කිලෝවක මිල ඩොලර් 15 ක් හෙවත් ලංකා මුදලින් දළ වශයෙන් රුපියල් 2300 කි! මේ තත්වය තුළ බොහෝ සිරියානුවන් පුරුදු වී සිටින්නේ බාර්ලිවලින් හැදු පාන්, ඔලිව් සහ තම්බා ගත් පැළෑටිවලින් එදා වේල සරි කර ගන්නට ය.
ලෝක සාම දර්ශකයට අනුව සිරියාව ලෝකයේ ප්‍රචණ්කාරීම රටයි. 2016 පෙබරවාරි මාසය වන විට පමණක් පිළිගත් දත්තවලට අනුව මේ කාලකණ්නි යුද්ධය නිසා අහිමි වූ ජීවිත ගණන 470,000 කි. එක්සත් ජාතීන්ගේ සරණාගත ඒජන්සියේ නිල දත්තවලට අනුව 2015 ජූනි මස වන විට රට තුළ ලක්ෂ 76 ක් දෙනා අභ්‍යන්තර වශයෙන් අවතැන් වී සිටිති. අයිසිස් භටයන්ගේ ප්‍රචණ්ඩතාවය දිනෙන් දිනම ඉහළ යයි. අලුත්ම දත්තවලට අනුව ගතවූ දෙදින තුළ පමණක් ඔවුන් විසින් සිවිල් වැසියන් 80 දෙනෙකුට වඩා ඝාතනය කර දමා ඇත.
හය අවුරුද්දක් තිස්සේ දික් ගැස්සෙමින් තිබෙන සිරියානු සාපයේ අලුත්ම ගොදුර සහාර් දැරිය ය. අවසන ඇය කුසගින්නේම මියැදුණාය. සැබවින්ම සහාර් යනු එක් එක් දරුවෙක් පමණක් නොවේ. ඇය සිය දහස් ගණනක් වන සිරියානු දරුවන්ගේ වචන්වලට නැගිය නොහැකි මහා දුක්බරිත ඉරණමේ ආත්මීය සංකේතයයි.
කුමන අර්ථයෙන් ගත්ත ද යුද්ධය ඉතා කැත ය.
- රදිකා ගුණරත්න
COMMENTS