කැටලෝනියාව සුරකින ගැහැනිය

දේශපාලනයට පිවිසීමට පෙර රජයේ නීතීඥවරියක් ලෙස කටයුතු කළ මරීයා, රාජ්‍ය තාන්ත්‍රික භාවය දැඩි සේ විශ්වාස කරන්නියකි. බෙදුම්වාදයට එරෙහි නීති පිළ...

දේශපාලනයට පිවිසීමට පෙර රජයේ නීතීඥවරියක් ලෙස කටයුතු කළ මරීයා, රාජ්‍ය තාන්ත්‍රික භාවය දැඩි සේ විශ්වාස කරන්නියකි. බෙදුම්වාදයට එරෙහි නීති පිළිබඳ විශේෂඥවරියක ලෙස ද ඇය හැඳින්වේ. මේ අනුව අගමැති මරියානෝ විසින් කැටලෝනියා අර්බුදය විසඳීමේ වැඩි වගකීම භාරදී තිබෙන්නේ ඒ සඳහා සුදුසුම චරිතය වෙත ය.

මධ්‍ය දක්ෂිණාංශික ජනප්‍රිය පක්ෂය (PP) නියෝජනය කරන අගමැති මරියානෝට මෙන් නොව, ඇයට සිය දේශපාලන ජීවිතයේ මේ දක්වා කිසිදු අවස්ථාවක දූෂණ චෝදනා ද එල්ල වී නැත.

මරීයා සොරායා දේශපාලනයට පිවිසියේ 2004 මහමැතිවරණයෙනි. එම වර්ෂය මැඩ්රිඩ් අගනුවර ත්‍රස්ත ප්‍රහාරයෙන් සලිත වීම නිසා PP පක්ෂයට අසීරු කාලයක් වුවත්, එය මරීයාගේ සාර්ථකත්වයට අභියෝග කළේ නැත. පසුව PP පක්ෂය 2011 වසරේ ආණ්ඩු බලය දිනාගත්තේ මරියානා රහොයි අගමැති තනතුරට පත් කරමිනි. 2008 වසරේ හටගත් ගෝලීය බැංකු අර්බුදය ජය ගනිමින් ස්පාඤ්ඤයේ ආර්ථික ස්ථාවරත්වය ඇති කරන බව මරියානෝගේ ප්‍රධානතම මැතිවරණ පොරොන්දුවක් විය. මරීනා එම පාර්ලිමේන්තුවේ ප්‍රකාශිකාව බවට පත්වූවාය. ඇයව උප අගමැති තනතුරට නාම යෝජනා විණි. මෙම වැදගත් තනතුර ලැබෙන විට ඇය සිටියේ සිය පුද්ගලික ජීවිතයේ ද වැදගත් කඩඉමක් පසු කරමිනි. එනම් ඇය සිය පුතුට උපත ලබා දුන්නේ එයට දින 11කට පෙර ය.

දරු ප්‍රසූතියෙන් දින 11කට පසු ඇය නැවත රැකියාවට ගියාය. වෙනත් වචනවලින් පවසන්නේ නම් මාස 4 ක ප්‍රසූත නිවාඩුව ඇය ඉවත දැමුවාය. එක්සත් රාජධානියේ පළ වන ඩේලි ටෙලිග්‍රාෆ් පුවත්පත වාර්තා කර සිටියේ මරීනාගේ මේ නිර්භය පියවර දෙස ස්පාඤ්ඤය ඇහිබැම හකුළුවාගෙන පුදුමයෙන් බලා සිටි බවයි.

උප අගමැතිවරිය ලෙස කටයුතු කරන අතරවාරයේ මරීයා සොරායා අධිකරණ අමාත්‍යවරිය වශයෙන් ද කටයුතු කළාය. සෞඛ්‍ය ඇමතිනිය ලෙස ද වගකීම් දැරුවාය. 2016 වසරේ පටන් දේශභූමි පරිපාලනය පිළිබඳ අමාත්‍යවරිය ලෙස කටයුතු කරන්නේ ඇයයි. කැටලෝනියාව වෙනම දේශභූමියක් වශයෙන් සිය ස්වාධීනත්වය ප්‍රකාශ කිරීමේ අර්බුදය ඇගේ විෂය යටතට වැටෙන්නේ මේ පසුබිම යටතේ ය.

එසේම පසුගිය වසර පුරා ඇය විසින් අවස්ථා ගණනාවකදී විශේෂ නියෝජිතවරියක වශයෙන් කැටලෝනියාව කෙරෙහි විශේෂ අවධානයක් යොමු කර ඇත. එහි සංචාරයන් ගණනාවක් ද සිදුකළ ඇයට, කැටලෝනියාවේ දේශපාලන ක්‍රියාකාරීන් පිළිබඳව ස්පාඤ්ඤ මධ්‍යම රජයේ අන් සියල්ලන්ටම වඩා හොඳ අවබෝධයක් ඇති බව සැලකේ.

කැටලෝනියානු සෙනෙට් සභාවේ අනුමැතිය හරහා අගමැති මරියානෝ රහෝයි කැටලෝනියාව කෙරෙහි ස්පාඤ්ඤයේ සෘජු පාලනය බලපවත්වන්නට පෙර දිනයේ ඇය කැටලෝනියාව පිළිබඳ අනම්‍ය කතාවක් පැවැත්වූවාය. එහිදී මෙසේ කීවාය. “අපි කැටලෝනියාව රැක ගත යුතුයි”

සෙනෙට් සභාව අමතා ඇය කළ කතාවෙන් කොටසකි, මේ. “කැටලෝනියානු නිදහස් සටනේ නායකයන් ඔවුන්ගේ සැබෑ මුහුණ පෙන්වා තිබෙනවා. ඔවුන් සිහිනයක් ඉටු කර දෙන්නට ජනතාවට පොරොන්දු වී කූට ප්‍රයෝග කරනවා..”

මේ අනුව ඔක්තෝබර් 1 වැනිදා පැවති නීතිවිරෝධී ජනමත විචාරණයේදී ස්පාඤ්ඤ මධ්‍යම රජයෙන් කැඩී වෙන් වී යාමට කැමැත්ත පළ කළ මිලියන 2 ක් වූ කැටලෝනියානුවන්ට, ඔවුන් ගත් මග මුළාවක් බව පෙන්වා දීමේ වගකීම ඇය සතුය.

ඇය එයට සමත් වේවිද..?

පැහැදිලිවම ඇය අගමැති මරියානෝගේ “අර්බුද කළමනාකාරවරිය”යි. 2014 වසරේ එබෝලා වසංගතය පැතිරෙන සමයේ මෙන්ම 2015 වසරේ ජර්මන්වින්ග්ස් ගුවන්යානා අනතුර සිදුවූ අවස්ථාවේදී ද ඇය ඒ බව කදිමට පෙන්වා දුන්නාය.

2015 වසරේ USA Today පුවත්පත පෙන්වා දුන්නේ ඇය යුරෝපයේ සිටින බලවත්ම කාන්තාවන් පස් දෙනාගෙන් එක් අයෙක් බවයි. “අතිශය ආකර්ෂණීය දේශපාලන කථිකයෙකු නොවුණත් ජනප්‍රිය නොවන ආණ්ඩුවක සිටින ජනප්‍රියම අමාත්‍යවරිය” ඇය බව ද එම පුවත්පත වැඩිදුරටත් සඳහන් කළේය.

මේ අනුව කැටලෝනියානු අර්බුදය අපට තවත් නමකින් හඳුන්වා දිය හැකිය. ඒ, ‘මරියානෝ සහ මරීයාගේ දේශපාලන හැකියාව උරගා බලන පරීක්ෂාවක්“ ලෙස ය.

සුපිරි පොප් ගායිකා ඒමි වයින්හවුස් සහ කෝල්ඩ් ප්ලේ ගීත ඇසීමට ප්‍රිය කරන මරීයා ස්ත්‍රීවාදිනියකගේ ගති ලක්ෂණ ප්‍රකට කළද ඇය වාමාංශික ස්ත්‍රීවාදිනියන් අතර එතරම් ජනප්‍රිය චරිතයක් නොවන්නේ ඇගේ දක්ෂිණාංශික දේශපාලන ආකල්ප හේතුවෙනි.

විවිධ විලාසිතාවලට අයත් අත්වැසුම් එකතුවක් මරීනා සොරායාට තිබේ. ඒ අතරින් කවර අත්වැසුමක් දමාගෙන ඇය කැටලෝනියාවේ බාසිලෝනාවට අත දමාවිදැයි තවම නිශ්චිත නැත.

මෙය මේ තරුණ දේශපාලන නායිකාව සිය ජීවිතයේ මුහුණ දෙන අභියෝගාත්මක ම පරීක්ෂණයයි. නමුත් ඇගේ පෞරුෂය සහ දැනටමත් ප්‍රකට කර තිබෙන වගකීම් සහගත නායකත්ව ලක්ෂණ හේතුවෙන් බොහෝ අය විශ්වාස කරන්නේ ඇය කැටලෝනියාව සම්බන්ධයෙන් ඉතා ඉක්මන් විසඳුමක් ලබාදෙනු ඇති බව ය.

බීබීසී ඇසුරෙනි.
- අමාලි ජයවීර