අනාගත නායකයන් පෙරට පැමිණ රට ඉදිරියට ගෙන යෑමට කාලය එළැඹී ඇතැයි හිටපු ජනාධිපති, කුරුණෑගල දිස්ත්‍රික් පාර්ලිමේන්තු මන්ත්‍රී මහින්ද රාජපක්ෂ ම...
අනාගත නායකයන් පෙරට පැමිණ රට ඉදිරියට ගෙන යෑමට කාලය එළැඹී ඇතැයි හිටපු ජනාධිපති, කුරුණෑගල දිස්ත්‍රික් පාර්ලිමේන්තු මන්ත්‍රී මහින්ද රාජපක්ෂ මහතා පවසයි.
මහින්ද රාජපක්ෂ මහතා මේ බව සඳහන් කර ඇත්තේ ට්විටර් සමාජ ජාල වෙබ් අඩවිය ඔස්සේ පැයක ප්‍රශ්නෝත්තර වැඩසටහනකට එක්වෙමිනි.
ඉදිරි ජනාධිපතිවරණයේදී වත්මන් ජනාධිපති මෛත්‍රීපාල සිරිසේන මහතා ශ්‍රී ලංකා නිදහස් පක්ෂයේ ජනාධිපති අපේක්ෂක වශයෙන් ඉදිරිපත් වුවහොත් ඔහුට එරෙහිව තරඟ කරන්නේ ද යනුවෙන් හිටපු ජනපතිවරයාට ප්‍රශ්නයක් යොමු කර තිබිණි.
මහින්ද රාජපක්ෂ මහතාට යොමු කළ ප්‍රශ්නවලින් තෝරාගත් කොටසක් හා ඔහු එම ප්‍රශ්නවලට දුන් පිළිතුරු පහත පරිදි වේ.
ප්‍රශ්නය - ඔබට නැවත රටේ නායකත්වය ලැබුණහොත් අලුතෙන් මොනවාද කරන්නේ?
පිළිතුර - කවුරුන් මේ රට පාලනය කළත් රටේත්, වත්මන් හා අනාගත පරම්පරාවලත් යහපත වෙනුවෙන් නිවැරැදි දේ කළ යුතුයි.
ප්‍රශ්නය - මීළඟ ජනාධිපතිවරණයේදී මෛත්‍රීපාල සිරිසේන මහතා ශ්‍රීලනිප ජනාධිපති අපේක්ෂකයා වශයෙන් කටයුතු කළොත් පක්ෂ අනුශාසක වශයෙන් ඔබ ඔහුට සහයෝගය දෙනවාද ?
පිළිතුර - පක්ෂය ඒ අවස්ථාවේදී ගන්නා තීරණය අනුව මගේ ස්ථාවරයද වෙනස් වෙනවා.
ප්‍රශ්නය - ඔබේ සහෝදරයෙක් මීළඟ ජනාධිපතිවරණයට ඉදිරිපත් වන බව පැවසෙනවා. එය ඇත්තක් ද ?
පිළිතුර - ව්‍යවස්ථානුකූලව සුදුසුකම් සපුරන ඕනෑම අයෙකුට ජනාධිපතිවරණයට ඉදිරිපත් විය හැකියි.
ප්‍රශ්නය - පසුගිය ජනාධිපතිවරණයේදී පරාජයට පත්වීමට හේතු මොනවාදැයි හඳුනාගත්තා ද ?
පිළිතුර - ඔව්, හේතු රැසක් තිබෙනවා. අපි ඒ පිළිබඳ විශ්ලේෂණය කළා. අපි අනාගතයට සූදානම්.
ප්‍රශ්නය - ඔබ නැවත බලයට පැමිණීමට සූදානම් ද ? ඒ සඳහා පියවර ගන්නේ කවදාද ?
පිළිතුර - ජනතාව සූදානම් නම්, එය ඉතා ඉක්මනින් සිදුවේවි.
තමා ජනපතිවරණයට ඉදිරිපත්වූයේ පැන යෑමට නොවන බව හිටපු ජනපති මහින්ද රාජපක්ෂ මහතා සඳහන් කරයි.
"ජාත්‍යන්තර /ආර්ථික අර්බුද හමුවේ ඔබ කළින් ජනපතිවරණයක් කැඳවා ප්‍රශ්ණයෙන් පලාගිය බව ජනපති මෛත්‍රී ඊයේ චෝදනා කළා?" යනුවෙන් හිටපු ජනපතිවරායාගෙන් විමසන ලද ප්‍රශ්නයකට ඔහු ඉහත පිළිතුරු ලබාදුන්නේය.
COMMENTS