රට රැකියාවට ගොස් සිටියදී මියගිය අය වෙනුවෙන් වන්දි

විදෙස් රටවල සේවයේ නියුතුව සිටියදී මියගිය ශ්‍රී ලාංකික ශ්‍රමිකයන්ගේ පවුල් සදහා ලැබිය යුතු වන්දි මුදල්, හිඟ වැටුප් හා අනෙකුත් ගෙවීම්වලට අදා...

විදෙස් රටවල සේවයේ නියුතුව සිටියදී මියගිය ශ්‍රී ලාංකික ශ්‍රමිකයන්ගේ පවුල් සදහා ලැබිය යුතු වන්දි මුදල්, හිඟ වැටුප් හා අනෙකුත් ගෙවීම්වලට අදාළ චෙක්පත් ප්‍රධානය කිරීම ඊයේ (18) සිදු කෙරිණි.

ඒ, විදේශ කටයුතු අමාත්‍ය මංගල සමරවීර මහතා සහ විදේශ රැකියා ඇමතිනී තලතා අතුකෝරාල මහත්මියලේ ප්‍රධානත්වයෙන් විදේශ කටයුතු අමාත්‍යංශයේ දී ය.

මෙහිදී රුපියල් මිලියන 51 ට අධික මුදලක් අගතියට පත් පවුල් 25කට ප්‍රධානය කරන ලදී.

2016 වසර සදහා විදේශ කටයුතු අමාත්‍යංශය මගින් මෙවන් වන්දි ලබාදීමේ වැඩසටහනක් සංවිධානය කල සිව්වන අවස්ථාව මෙය වන අතර මේ කාලය තුලදී රුපියල් මිලියන 222 ක මුදලක් පවුල් 127 කට අදියර 03කදී ප්‍රධානය කර තිබේ.

2015 වසරේදී විදේශ කටයුතු අමාත්‍යංශය විසින් මෙරට විදේශ තානාපති කාර්යාල වල මැදිහත්වීමෙන් වන්දි වශයෙන් අගතියට පත් පවුල් 143ක් සදහා රුපියල් මිලියන 210කට ආසන්න මුදලක් ප්‍රධානය කර ඇත.

සෞදි අරාබිය, සිංගප්පූරුව, කටාර් රාජ්‍යය, කුවේටය, එක්සත් අරාබි එමීර් රාජ්‍යය, ලෙබනනය, ජෝර්දානය හා මැලේසියාව යන රටවල පිහිටි ශ්‍රී ලංකා තානාපති සහ මහ කොමසාරිස් කාර්යාලවල මැදිහත්වීමෙන් අගතියට පත්වූවන්ට මෙම වන්දි මුදල් ලබා ගත හැකි විය.

මෙහිදී අදහස් දැක්වූ විදේශ අමාත්‍ය සමරවීර මහතා ප්‍රකාශ කර සිටියේ තම ආදරණීයයන් අහිමි වීම නිසා වන්දිලාභීන්ගේ පවුල් වල සාමාජිකයන් පත්ව සිටින අවාසනාවන්ත තත්ත්වය පිළිබඳව තමන් ඉතා හොදින් දන්නා බවයි.

මෙවැනි වන්දි මුදල් ලබා දීම තුලින් අගතියට පත් පවුල්වල අයට සිදුවූ පාඩුව මකාලිය නොහැකි බවත් ඒ පිළිබඳව තම කනගාටුව ප්‍රකාශ කිරීමට මෙය අවස්ථාවක් කර ගන්නා බව ඔහු පැවසීය.

නොයෙකුත් හිරිහැරවලට ලක්වූ ශ්‍රමිකයන් හට ලැබිය යුතු ගෙවීම්, සේවා යෝජකයා වෙතින්ම ලබාගැනීමට විදේශ දුත මණ්ඩල කැපවී සිටින බව අමාත්‍යවරයා අවධාරණය කළේය.