නව පළාත් පාලන ආයතන සංස්ථාපනයට ජාතික නිර්ණායක සකසයි

නව පළාත් පාලන ආයතන සංස්ථාපනය සහ පවතින පළාත් පාලන ආයතන, නගර සභා හා මහ නගර සභා ලෙස උසස් කිරීමට ජාතික නිර්ණායක පද්ධතියක් සකස් කිරීමට, පළාත් ස...

ත්‍රීරෝද රථ පදවන්න වයස් සීමාවක් පනවයි?

සා.පෙළ සිසුන්ට හැදුනුම්පත් ලබාදීමේ විශේෂ වැඩසටහනක් අද

මියගිය රණවිරුවන්ගේ විශ්‍රාම වැටුප බිරියන්ට

නව පළාත් පාලන ආයතන සංස්ථාපනය සහ පවතින පළාත් පාලන ආයතන, නගර සභා හා මහ නගර සභා ලෙස උසස් කිරීමට ජාතික නිර්ණායක පද්ධතියක් සකස් කිරීමට, පළාත් සභා සහ පළාත් පාලන අමාත්‍යාංශය තීරණය කර තිබේ. 

ඒ සඳහා පළාත් සභා සහ පළාත් පාලන අමාත්‍ය, ජනාධිපති නීතිඥ ෆයිසර් මුස්තෆා මහතා විසින් 12 දෙනෙකුගෙන් සමන්විත විද්වත් කමිටුවක් පත්කෙරිණි. එහි සභාපති වන්නේ, ශ්‍රේෂ්ඨාධිකරණ නීතිඥ චන්දක ජයසුන්දර මහතායි.

වර්තමානයේ ශ්‍රී ලංකාවේ පළාත් පාලන ආයතන සංස්ථාපනය කිරීම සහ පවත්නා පළාත් පාලන ආයතන වල තත්ත්වය ඉහළ නැංවීම සඳහා ජාතික නිර්ණායක පද්ධතියක් නොමැති අතර එම නිසා මෙරට නාගරික ලක්ෂණ විද්‍යාමාන වන, සාපෙක්ෂ වශයෙන් දියුණු ප්‍රදේශ පවා, ඊට අනුරූපිත පළාත් පාලන ආයතන ලෙස නොපැවතීම දක්නට ලැබේ. 

එසේම ප්‍රමුඛ ග්‍රාමීය ස්වරූපයේ ප්‍රදේශ පවා නාගරික පළාත් පාලන ආයතන තුළට ඇතුළත් බව දක්නට ලැබෙන බවත් එම නිසා මෙම තත්ත්වය මගහැරවීම පිණිස යථාරූපී, වර්ධිත ප්‍රදේශ නාගරික හා අර්ධ නාගරික ප්‍රදේශ ලෙස නිශ්චිතව හඳුනාගැනීම සඳහා, පිළිගත හැකි ජාතික නිර්ණායක පද්ධතියක් ගොඩනැගීම අදාළ කමිටුවේ කාර්යය වනු ඇති බවත් එම අමාත්‍යාංශය සඳහන් කරයි. 

ඒ අනුව මාස තුනක් තුළ සිය කටයුතු අවසන් කර වාර්තාවක් ඉදිරිපත් කිරීමට නියමිත මෙම කමිටුව, වෘත්තිකයන්ගෙන්, සිවිල් සංවිධානවලින් සහ මහජනතාවගෙන් අදහස් සහ යෝජනා ලබාගැනීමට බලාපොරොත්තුවේ. එම අදහස් සහ යෝජනා 2016 අගෝස්තු මස 15 දිනට පෙර තැපෑලෙන්, ෆැක්ස් මඟින් හෝ විද්‍යුත් තැපෑලෙන් කමිටුව වෙත යොමුකළ හැකියි.

 

ලිපිනය - කමිටු ලේකම්,

         පළාත් සභා සහ පළාත් පාලන අමාත්‍යංශය,

         අංක 330, යුනියන් පෙදෙස, කොළඹ 02

         දුරකථනය - 0112 302 720

         ෆැක්ස් - 0112 337 161

ඊ මේල් - leagal@pclg.gov.lk