ටොරින්ටන් මාවතේ නිහඬව පවතින අති සුඛෝපභෝගී මන්දිරයක තාප්ප ඇතුළේ දශක ගණනාවක් තිස්සේ සැඟව තිබූ අඳුරු දේශපාලන රහසක් දැන් මහජනතාව ඉදිරියේ නිරාවරණ...
ටොරින්ටන් මාවතේ නිහඬව පවතින අති සුඛෝපභෝගී මන්දිරයක තාප්ප ඇතුළේ දශක ගණනාවක් තිස්සේ සැඟව තිබූ අඳුරු දේශපාලන රහසක් දැන් මහජනතාව ඉදිරියේ නිරාවරණය වෙමින් පවතී.
කොළඹ , ටොරින්ටන් මාවතේ අංක 260/17 දරන ලිපිනයේ පිහිටි රුපියල් කෝටි හතළිහකට අධික වටිනාකමකින් යුත් මැදුර සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව මේ වන විට දැවැන්ත විමර්ශනයක් ආරම්භ කර තිබේ. මෙය හුදෙක් කොළඹ හදවතේ පිහිටි තවත් එක් දේපළක් පමණක් නොවේ. අතීතයේ යෝෂිත රාජපක්ෂට අයත් යැයි කියැවුණු ආන්දෝලනාත්මක CSN රූපවාහිනී නාලිකාවේ නිල ලියාපදිංචි මූලස්ථානය වූයේද මේ බිමය.
දේශපාලන කරළියේ කිසිදා අසන්නට නොලැබුණු නමක් වන "මේරි ලූඩ්ස් වික්රමසිංහ" යන නමින් මීට දශකයකට පමණ පෙර මෙම දේපළ මිලදී ගෙන ඇතත්, ඇත්ත වශයෙන්ම එය හිටපු ජනාධිපති ආර්යා ශිරන්ති රාජපක්ෂ මහත්මියගේ උප්පැන්න සහතිකයේ සඳහන් සැබෑ නාමයයි. කතාවේ ආරම්භය දිවයන්නේ 2001 වසර දක්වාය. එකල විපක්ෂ නායකවරයාව සිටි මහින්ද රාජපක්ෂ මහතා වෙනුවෙන් එවකට අග්රාමාත්ය රනිල් වික්රමසිංහ මහතාගේ මැදිහත්වීමෙන් කුලී පදනම මත ලබාගත් මෙම නිවස, මහින්ද රාජපක්ෂ මහතා ජනාධිපතිවරයා බවට පත්වීමෙන් පසු සින්නක්කරවම රාජපක්ෂ පවුලේ අයිතියට පත්වී ඇත. එහෙත් පුදුමයට කරුණ නම් කෝටි හතළිහක් තරම් අතිවිශාල වටිනාකමක් ඇති මෙම භූමිය මිලදී ගෙන ඇත්තේ රුපියල් මිලියන තිස් පහක් වැනි අතිශය අවම තක්සේරුවකට වීමය.
මේසා විශාල ධනයක් උපයා ගත්තේ කෙසේද යන්න පිළිබඳව අල්ලස් කොමිසම නැගූ ප්රශ්න හමුවේ හිටපු ජනාධිපති ආර්යාවගෙන් මෙතෙක් නිසි පැහැදිලි කිරීමක් ලැබී නොමැත. අදාළ ඔප්පුව සැකසූ නොතාරිස්වරයා පවා තමන් ඉදිරිපිට කිසිදු මුදල් ගනුදෙනුවක් සිදු නොවූ බව තහවුරු කර ඇති පසුබිමක, ශිරන්ති රාජපක්ෂ මහත්මිය පවසන්නේ ශ්රී ලංකන් ගුවන් සේවයේ හිටපු සභාපති නිශාන්ත වික්රමසිංහගේ පුත්රයා විසින් ව්යාපාරික ප්රභාත් නානායක්කාරගෙන් අත්පිට මුදල් දී මෙය ගෙන පසුව තමන්ට පැවරූ බවයි. එහෙත් සැබැවින්ම එවැනි මුදල් හුවමාරුවක් සිදුවූවාද යන්න බලවත් සැකයකි. මේ සූක්ෂම ගනුදෙනුව පිටුපස ඇති බරපතළම ගැටලුව වන්නේ, ප්රභාත් නානායක්කාර නම් ව්යාපාරිකයාට අධිවේගී මාර්ග ඇතුළු දැවැන්ත රාජ්ය ව්යාපෘති පවරා දීමේ ප්රතිලාභයක් ලෙස මෙම මන්දිරය රාජපක්ෂ පවුලට අල්ලසක් වශයෙන් ලැබුණේද යන්නයි. රටේ ජනතාවගේ බදු මුදල්වලින් ගොඩනැගුණු යටිතල පහසුකම් ව්යාපෘතිවල කොමිස් මුදල් මෙලෙස සුඛෝපභෝගී දේපළ බවට පරිවර්තනය වීද යන සැකය මත පදනම්ව විමර්ශන නිලධාරීන් සිය දැල එලා ඇත.
මෙම අභිරහස් දේපළ ගනුදෙනුව නිරාවරණය කිරීම සඳහා රජය මෙවර භාවිතා කරන්නේ අලුතින්ම බලාත්මක කළ 2025 අංක 5 දරන අපරාධයකින් උත්පාදිත දේ පිළිබඳ පනතයි. මෙම දැඩි නීතියේ 34 (1) වගන්තිය යටතේ, යම් පුද්ගලයෙකු සතු දේපළක් ඔහුගේ නීත්යානුකූල ආදායමෙන් ගොඩනැගූවක් නොවන බව පෙනී යන්නේ නම් එය අපරාධයකින් උපයාගත්තක් ලෙස උපකල්පනය කිරීමේ බලය අධිකරණයට හිමි වේ. වඩාත්ම තීරණාත්මක කරුණ වන්නේ, පනතේ 34 (3) වගන්තියට අනුව මෙය තම නිත්යානුකූල ආදායමෙන් ගත් බව ඔප්පු කිරීමේ සම්පූර්ණ නීතිමය බර දැන් පැවරී ඇත්තේ සැකකරුට හෙවත් ශිරන්ති රාජපක්ෂ මහත්මියට වීමය. පනතේ 68 (1) සහ 71 (1) වගන්ති මගින් ලබා දී ඇති පුළුල් බලතල මත මේ වන විටත් ටොරින්ටන් මැදුර විකිණීම හෝ අන්සතු කිරීම සම්පූර්ණයෙන්ම තහනම් කරමින් විමර්ශන නිලධාරීන් නියෝග නිකුත් කර අවසන්ය.
එපමණක් නොව, මෙම ක්රියාවලිය අපරාධ නඩුවක් ඔප්පු වන තෙක් බලා සිටින සාම්ප්රදායික නීතියෙන් ඔබ්බට ගිය එකකි. පනතේ 125 සහ 126 වගන්තිවලට අනුව, යම් හෙයකින් මෙම දේපළේ නීත්යානුකූලභාවය තහවුරු කිරීමට විත්ති පාර්ශවය අපොහොසත් වුවහොත්, කිසිදු වරදකරු කිරීමකින් තොරවම දේපළ රාජසන්තක කිරීමට රජයට බලය ලැබේ. විමර්ශන කණ්ඩායම් දැනුම් දී ඇත්තේ ඉදිරි දින අනූව ඇතුළත මේ සම්බන්ධ සියලු කරුණු මහාධිකරණය හමුවේ ගොනු කරන බවත්, පනතේ 127 (17) වගන්තිය ප්රකාරව දේපළේ නීත්යානුකූල බව ඔප්පු කිරීමට නොහැකි වන ඕනෑම මොහොතක එය රජයට පවරා ගන්නා බවත්ය.
වසර ගණනාවක් පුරා අසීමිත බලයේ සහ සැඟවුණු ධනයේ සංකේතයක් වූ ටොරින්ටන් මාවතේ ඒ දැවැන්ත යකඩ ගේට්ටු, නුදුරු අනාගතයේදීම මහජන අයිතියට පත්වීමේ පෙරනිමිති දැන් පහළ වී තිබේ.
මේ පුවත තව අයට බලන්න
COMMENTS