ශ්‍රී ලංකා වාසී බෞද්ධ ජනතාව මහත් ශ්‍රද්ධාවෙන් ආමිස හා ප්‍රතිපත්ති පූජාවන් පවත්වන පොසොන් පුර පසළොස්වක පොහොය දිනය අදට යෙදී තිබේ. ශ්‍රී ලාං...
ශ්‍රී ලංකා වාසී බෞද්ධ ජනතාව මහත් ශ්‍රද්ධාවෙන් ආමිස හා ප්‍රතිපත්ති පූජාවන් පවත්වන පොසොන් පුර පසළොස්වක පොහොය දිනය අදට යෙදී තිබේ.
ශ්‍රී ලාංකික ජන සමාජය සමාජ, සංස්කෘතික, ආගමික සහ අධ්‍යාත්මික ලෙස සංවර්ධනය කිරීම උදෙසා අද වැනි පොසොන් පොහෝ දිනක සිදු වූ ඓතිහාසික සුවිශේෂී සිදු වීම හේතු විය.
එකල දේවානම් පියතිස්ස රජ සමයේ සිදූ වූ අසිරිමත් මහින්දාගමනයෙන් අනුරාධපුරය, මිහින්තලය ආලෝකමත් වූවා පමණක් නොව ශ්‍රී ලාංකික ජනසමාජය ම ආලෝකමත් විය.
එවක පටන් බෞද්ධයන් විසින් පොසොන් පුර පෝය දිනය ආමිස හා ප්‍රතිපත්ති පූජාවෙන් මිහිඳු මහරහතන් වහන්සේ සිහි කරනු ලබන අතර පින් අනුමෝදම් කරමින්, අනුරාධපුරය මෙන් ම මුළු දිවයිනේ ම ආගමික ස්ථාන කේද්‍ර කරගමින් මෙවරත් සීල, සමාධි, භාවනා වැඩසටහන් ක්රියාත්මක වුව ද කොවිඩ් වසංගත තත්ත්වය හේතුවෙන් සෞඛ්‍ය මාර්ගෝපදේශ යටතේ ආගමික වැඩසටහන් ක්රියාත්මක කරනු ලබයි.
එමෙන් ම, ජනතාවට වෙහෙර විහාරස්ථාන වෙත ගමන් කිරීමට සෞඛ්‍ය හේතූන් මත මෙවර ද අවස්ථාව හිමි නොවේ.
යහපත් රටක් ගොඩනැගීමට තථාගත දහමත්, දස රාජ ධර්මයත් පදනම කරගත් රාජ්‍ය සංකල්පයක් අපගේ පාලනයේද පූර්වාදර්ශය කරගත යුතු බව ජනාධිපති ගෝඨාභය රාජපක්ෂ මහතා පෙන්වා දෙයි.
මේ අතර පොසොන් පොහොය දිනය නිමිත්තෙන් පණිවුඩයක් නිකුත් කරමින් අග්‍රාමාත්‍ය මහින්ද රාජපක්ෂ මහතා පෙන්වා දෙන්නේ බුදු දහමේ හරය නිවැරදිව තෝරා බේරා ගැනීමටත්, බුද්ධ දර්ශනය අනුව අනාගත දිවි පෙවත සැලසුම් කර ගැනීමටත් මෙම කාලය ඉතා වැදගත් බවය.
නූතන ශ්‍රී ලංකාවේ බුදුදහම මත පදනම් වූ සංස්කෘතික සමාජීය පරිසරයකට පදනම වැටුනේ මහින්දාගමනයෙන් පසුව බව පොසොන් පොහොය දිනය නිමිත්තෙන් පණිවුඩයක් නිකුත් කරමින් විපක්ෂ නායක සජිත් ප්‍රේමදාස මහතා ද පවසයි.
ප්‍රතිපත්ති පූජාවලට මුල්තැන දෙමින් නිවෙසේ සිටම පොසොන් සමරන්න
කොවිඩ් වයිරස් ව්‍යාප්තිය පාලනය කිරීමට සෞඛ්‍ය අංශ ගෙන යන වැඩපිළිවෙළට සහාය දක්වමින් මේ වසරේ පොසොන් උත්සවය නිවෙස්වල සිට සැමරීමට සියලු දෙනා අදිටන් කර ගත යුතුව ඇතැයි ත්‍රෛනිකායික මහානායක ස්වාමින්ද්‍රයන් වහන්සේ ප්‍රකාශ කරති.
අද වන විට මෙරට පමණක් නොව සමස්ත ලෝකයම කොරෝනා වසංගත තත්ත්වයෙන් දැඩිව පීඩා විඳින පසුබිමක සම්බුද්ධ දේශනාවන් තුළින් ජීවිත පෝෂණය කර ගන්නා සැදැහැති බෞද්ධයන් ලෙස ප්‍රතිපත්ති පූජාවන්ට මුල්තැන දෙමින් තමන්ගේත් අනුන්ගේත් සමස්ත සමාජයේත් සෞඛ්‍යමය යහපැවැත්ම උදෙසා සිය වගකීම් ඉටු කිරීම සඳහා මෙවර පොසොන් දිනයේ කටයුතු කිරීම සමාජයේ වගකීම බවද උන්වහන්සේලා ප්‍රකාශ කරති.
සියම් මහ නිකායේ මල්වතු මහ විහාර පාර්ශ්වයේ මහා නායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල, අස්ගිරි මහ විහාර පාර්ශ්වයේ මහා නායක අතිපූජ්‍ය වරකාගොඩ ශ්‍රී ඤාණරතන, ශ්‍රී ලංකා අමරපුර මහ නිකායේ වැඩ බලන උත්තරීතර මහනායක අතිපූජ්‍ය ගන්තුනේ අස්සජි, ශ්‍රී ලංකා රාමඤ්ඤ මහ නිකායේ මහා නායක අතිපූජ්‍ය අග්ගමහා පණ්ඩිත මකුලෑවේ විමල යන මහනාහිමිවරු පොසොන් උත්සවය නිමිත්තෙන් මේ අනුශාසනාව කරති.
COMMENTS