සීගිරියටත් වින කටී… පුරාවිද්‍යා බිමක් කොන්ක්‍රීට් ගොඩකට යටකරයි

යු නෙස්කෝ ලෝක උරුමයක් වශයෙන්ද ප්‍රකාශයට පත් කර ඇති ඓතිහාසික සීගිරි පර්වතය වටා ඇති ස්වාභාවික හරිත කලාපයට බලවත් හානියක් වන අන්දමට විශාල ප්‍ර...

යුනෙස්කෝ ලෝක උරුමයක් වශයෙන්ද ප්‍රකාශයට පත් කර ඇති ඓතිහාසික සීගිරි පර්වතය වටා ඇති ස්වාභාවික හරිත කලාපයට බලවත් හානියක් වන අන්දමට විශාල ප්‍රදේශයක පිහිනුම් තටාකයක්ද සහිත නිවාස 108ක සත්මහල් නිවාස සංකීර්ණයක් සඳහා සුවිසල් කොන්ක්‍රීට් ඉදිකිරීමක් සිදුවෙමින් පවතී.

මෙම විශාල කොන්ක්‍රීට් ඉදිකිරීම සිදුවන්නේ ප්‍රාග් ඓතිහාසික යුගයට අයත් ඇටසැකිලි හමු වී ඇති පුරාවිද්‍යා කැණීම් සිදුකරමින් පවතින පොතන ගුහාව ප්‍රදේශයේය.

පොතන ගුහා කැණීම් ක්ෂේත්‍රයේ සිට කි.මී. 1.9කට පමණ ආසන්නව මෙම සුඛෝපභෝගී මහල් නිවාස සංකීර්ණයේ ඉදිකිරීම සිදුවෙයි.

සීගිරි කන්ද මස්තකයේ සිට අංශක 360ක වට ප්‍රමාණයක දර්ශනයක් එහි නගින්නෙකුට දැකගත හැකි අතර ඒ වටා ඇති ගම්මාන නිවර්තන කලාපීය ගන වනාන්තර, වගාවන්ට ජලය සපයන ජලාශ සහ කෙත්වතුවලින් සමන්විත වෙයි. ඒ අතරට පොතන පුරාවිද්‍යාත්මක කැණීම් සිදුකෙරෙන ගුහාව පිහිටි පොතන රජ මහ විහාරයද සීගිරිය මස්තකයේ සිට දර්ශනය වෙයි.

සංචාරක ක්ෂේත්‍රයේ නියුතු බොහෝ දෙනා යුනෙස්කෝ ලෝක උරුමයන් අතරින් සංචාරකයන්ගේ වැඩිම ආකර්ෂණය දිනාගෙන ඇති සුප්‍රසිද්ධ සීගිරි පර්වතයේ සිට ඉතා ආසන්නව හොඳින් දර්ශනයට පාත්‍ර වන ස්ථානයක ඉදිවන නිවාස ඒකක 108කින් හා මහල් හතකින් සමන්විත මෙම මහල් නිවාස සංකීර්ණය ඉදිකිරීම ගැන භීතියට පත්ව සිටින බව වාර්තා වේ

මෙහි ඉදිකිරීම් කටයුතු කරන සමාගම මෙම මහල් නිවාස සංකීර්ණයේ ප්‍රවර්ධන කටයුතු සඳහා සකසන ලද ‘The Kingdom, Sigiriya’ (සීගිරිය රාජධානිය) යනුවෙන් නම් කළ වීඩියෝවේ “ඉහළින් ඇති සිංහ පර්වතය දෙස බලමින් තරු පන්තියේ ඔබේ සුඛෝපභෝගී නිවසේ සතුටු වන්න” යනුවෙන් සඳහන් කර ඇත.

ඉදිකෙරෙන ගොඩනැගිල්ල වැඩිමනත් විශේෂාංග නොමැති පැතලි හැඩැති මහල් කිහිපයකින් යුක්ත වන අතර සියලු ම පැතිවලින් පාරදෘශ්‍ය වේ.

මෙම ඉදිකිරීම හේතුවෙන් මෙතෙක් සීගිරිය හා පිදුරුතලාගල කඳු මස්තකයන්හි සිට අංශක 360ක පැතිරුණු හරිත වර්ණ වනාන්තර, දිය දහරා සහ කඳු සහිත මනරම් දර්ශන දැකීමට තිබූ අවස්ථාව මෙම නිවාස සංකීර්ණය ඉදිකිරීමෙන් පසු ගිලිහී යනු ඇත.

සුලෝචනා රාමයියා මොහාන්, රු. කාරියවසම් – මව්බිම