ප්‍රතිපත්ති සුරකින සෘජු නායකත්වයක් අපි ඉදිරියේ දී බිහිකළ යුතු බව හිටපු ආරක්ෂක අමාත්‍ය ගෝඨාභය රාජපක්ෂ මහතා පවසයි. ඒ ගම්පහ පැවති එළිය වැඩසට...
ප්‍රතිපත්ති සුරකින සෘජු නායකත්වයක් අපි ඉදිරියේ දී බිහිකළ යුතු බව හිටපු ආරක්ෂක අමාත්‍ය ගෝඨාභය රාජපක්ෂ මහතා පවසයි.
ඒ ගම්පහ පැවති එළිය වැඩසටහනට සහභාගි වෙමිනි.
එහිදී ඒ මහතා මෙසේ අදහස් දැක්වීය.
"පළමුවෙන්ම මම කියන්න කැමතියි අපේ ඉතිහාසය, වර්තමානය ගැන කතා කරන්න පුළුවන් නමුත් ඉතාම වැදගත් වන්නේ අපේ අනාගතය සකස් කරගත යුත්තේ කෙසේද යන කතිකාව කරළියට ගෙනඑන එකයි. පසුගිය සතියේ මට මුණ ගැසුණා ආර්ථික වශයෙන් ඉහළම මට්ටමක තිබෙන ආසියානු රටක රාජ්‍ය තාන්ත්‍රික ප්‍රභූවරයෙක්. අපි කවුරුත් දන්න දෙයක් මම එතුමාට කිව්වා. එදා මහින්ද රාජපක්ෂ යුගයේ දී අපේ රටේ සංවර්ධනට විශාල වශයෙන් චීනය උදව් කළා. ඒ වගේම අපේ රට පිහිටලා තියෙන්නේ භූ දේශපාලනිකව ලෝකයේ ඉතාම වැදගත් තැනක. ඒ හේතුවෙන්ම චීනය අපි සමග ඉතා කිට්ටුවෙන් වැඩ කිරීම සම්බන්ධව ලෝකයේ බලවත් රටවල් ටිකක් කලබල වුණ බවත් අපි දන්නවා. නමුත් අපි අපේ රට චීනයට උකසට තියන්න ගියේ නෑ. අපි අපේ රටේ ස්වෛරීභාවය, නිදහස්භාවය ගැන හොඳ අවබෝධයකින් තමයි කටයුතු කළේ. මම ඔහුට කිව්වා යම් යම් චෝදනා නගනවාට වඩා තාක්ෂණික අතින් ඉහළින්ම සිටින ඔබගේ රටට පුළුවන් අපේ රටේ ආයෝජනය කරන්න. නිපුණත්වයෙන් ඉහළ තරුණ පරපුරක් අපේ රටේ සිටිනවා කියලා."
"එහිදී එතුමා මට කිව්වා විදේශ ආයෝජකයන්ට පමණක් නෙවෙයි දේශීය ආයෝජකයන්ට පවා පහසුවෙන් ආයෝජනය කරන්නට පැහැදිලි පරිසරයක් නිර්මාණය වෙලා තියෙන්න ඕනෑ කියලා. එතුමා කිව්වා ඔබේ රටේ පළමුවෙන්ම ස්ථාවර රාජ්‍යයක් තිබිය යුතුයි කියලා. මටත් කියන්න තියෙන්නේ ඒක ඉතාම පැහැදිලි සත්‍යයක්. එවැනි ස්ථාවරත්වයක් එදා මහින්ද රාජපක්ෂ රජයේ තිබුණු නිසා තමයි ඔබ අද කොළඹට ගියවිට දකින මහා ආයෝජනයන්ට ඉඩ සැලසුණේ. අපිත් අනාගතයේ දී ඇති කළ යුතු පළමු දේ තමයි ස්ථාවර රටක්. එහෙම නැතිව කිසිවෙකු තුළ අපේ රට පිළිබඳ විශ්වාසයක් ගොඩනගන්නට බෑ. අද අපේ රටේ පවතින අස්ථාවරභාවය නිසා අපේ රටේ ආයෝජකයන් පවා වෙනත් රටවල ආයෝජන කරන්න පෙළඹිලා තියෙනවා. ඊළගට ප්‍රතිපත්ති වල ස්ථාවරභාවයත් ඉතා වැදගත්. ඇමතිවරු මාරුවෙනකොට ප්‍රතිපත්ති මාරුවෙන්න බෑ. එදා යුද්ධෙ ඉවර කරනවා කියලා අපි ගත්ත ප්‍රතිපත්තිය යුද්ධය අවසාන වන තුරු රැක්කා. කෘෂිකර්මාන්තය පිළිබඳ ස්ථිර ප්‍රතිපත්තියක සිටියා. ඒ හරහා අපිට පුළුවන් වුණා රට සහලින් ස්වයංපෝෂිත කරන්නට."
"යටිතල පහසුකම් දියුණු කරන්නටත් මහින්ද රාජපක්ෂ මැතිතුමා නිසි ප්‍රතිපත්තියක සිටියා. හැබැයි වර්තමාන රජය පැමිණි විගස ඒවා සියල්ල නතර කළා. රජයක් වෙනස් වූ පමණින් එසේ ප්‍රතිපත්ති වෙනස් වෙනවානම් ආයෝජකයන් අපේ රටට පැමිණෙයි ද ? ඒක තමයි පසුගිය වසර හතර හමාරක් තුළ කිසිදු වැදගත් ආයෝජකයෙක් මේ රටට ගේන්න බැරිවෙලා තියෙන්නේ. අපි හදන්න ඕනේ ජාතික ප්‍රතිපත්තියක්. විනිවිද භාවයත් ඉතා වැදගත්. ඕනෑම දෙයක් වැරදියට කළොත් හරි ප්‍රතිඵලයක් එන්නේ නෑ. කවුරු චෝදනා කළත් යුද්ධය අවසාන කිරීමේ හරි ප්‍රතිඵලයක් අපිට ආවේ අපි ඒක හරියට කළ නිසා. එදා අපිට චෝදනා කළා මිග් යානා ගනුදෙනුව ගැන. මම කියන්න කැමතියි මේක තමයි අපේ හමුදා ඉතිහාසයේ ඉතා ඉහළම විනිවිදභාවයෙන් කළ ගනුදෙනුව. එදා යුද සමයේ ආයුධ මිලදී ගැනීමේ සෑම ගනුදෙනුවකම ඉතා ඉහළ විනිවිදභාවයක් තිබුණා. ඒ වගේම නිසි වෙලාවට නිසි තීරණ ගන්න පුළුවන් නායකයන් රටට සිටිය යුතුයි. මේ කාරණා සම්පූර්ණ වෙනවානම් ආයෝජකයන් ඔවුන්ගේ ආයෝජන කරන්න පැකිලෙන්නේ නෑ. අපේ රට දියුණු කරන්නට නම් ඉදිරියේ දී අපි නායකයෙක්, රජයක් තෝරනවිට මෙන්න මේ කරුණු සාක්ෂාත් කරගන්න පුළුවන්, විශ්වාසවන්ත පුද්ගලයෙක් තෝරගන්න අවශයයි."
"වර්තමාන රජය අවුරුදු හතරහමාරක් තිස්සේ මහා පරිමාණ සැලසුම් ගැන කතා කරනවා. නමුත් අද වෙනකම් ඒවා ක්රියාත්මක වෙලා නෑ. එදා අපේ කාලයේ සමහර විට තීරණ ගැනීමට අවුරුදු දෙක තුන ගතවෙන ආයෝජන සතිදෙකෙන් තීරණ අරගෙන නිමා කරලා ඔවුනට ආයෝජනය කරන්න ඉඩ සලසලා දුන්නා. මේවගේ සැලසුම් තමයි අපි නැවතත් ගෙන එන්නට අවශ්‍ය. අපේ ඉදිරි සැලසුම් අපි දැන් හදමින් යනවා. ඉදිරි කාලයේ දී අපේ රජයක් පත්වූ විගස ඒවා ක්රියාත්මක කරන්න පුළුවන්. එදා බැසිල් රාජපක්ෂ මැතිතුමා නව පක්ෂයක් බිහිකරලා ඉතිහාසය වෙනස් කරමින් පක්ෂය මුහුණදුන් පළමු ඡන්දයෙන්ම විශිෂ්ට ජයග්‍රහණයක් අත්කර දීලා අපට අවශ්‍ය දේශපාලන පදනම අදවන විට සකස් කරලා තියෙනවා. එත් එක්කම අපිට ස්ථාවර රාජ්‍යයක් ගොඩනගන්නට අවැසි සෘජු නායකත්වයක් බිහිකරන විශාල වගකීමක් ඔබලාගේ උරමත තිබෙනවා ඉදිරියේ දී. මම දැක්කා බැසිල් රාජපක්ෂ මැතිතුමා කියලා තියෙනවා අපි ජයග්‍රහණය කරවන්නේ මිනිස්සු නෙවෙයි ප්‍රතිපත්ති කියලා. එයයි විය යුත්තේ. ඒ නිසා 2015 අපේ පරාජයත් සමග රටට නැතිවුණ ප්‍රතිපත්ති නැවත ගෙනඑන්න අපේකම දන්න, අපේ සංස්කෘතියට ගරුකරන, ජාතිකත්වය අගය කරන, ඉතිහාසය හඳුනන, ඉතිහාසයේ වැඩකරලා පෙන්වපු නායකත්වයක් රටට නැවතත් ගෙන එන්නට පෙළගැසෙන්න කියලා මම ඔබගෙන් ඉල්ලා සිටින්නට කැමති." යනුවෙන් වැඩිදුරටත් අදහස් දක්වමින් ගෝඨාභය රාජපක්ෂ මහතා පැවසිය.
COMMENTS