ඉකුත් අඟහරුවාදා පැවති කැබිනට් මණ්ඩල රැස්වීමේදී ඉන්දියාවේ රෝ සංවිධානය තමාව ඝාතනය කිරීමට කුමන්ත්‍රණය කරමින් සිටින බවට ජනාධිපති මෛත්‍රීපාල සි...
ඉකුත් අඟහරුවාදා පැවති කැබිනට් මණ්ඩල රැස්වීමේදී ඉන්දියාවේ රෝ සංවිධානය තමාව ඝාතනය කිරීමට කුමන්ත්‍රණය කරමින් සිටින බවට ජනාධිපති මෛත්‍රීපාල සිරිසේන මහතා චෝදනා කර ඇතැයි ඉන්දියාවේ ද හින්දු පුවත්පතේ වෙබ් අඩවිය වාර්තා කර තිබුණි.
මේ අතර ඉන්දීය අග්‍රාමාත්‍ය කාර්යාලයෙන් නිවේදනයක් නිකුත් කරමින් ඊයේ ජනාධිපති මෛත්‍රීපාල සිරිසේන මහතා හා නරේන්ද්‍ර මෝඩි අග්‍රාමාත්‍යවරයා අතර පැවති දුරකථන සංවාද සම්බන්ධයෙන් කරුණු පැහැදිලි කලේය.
නිවේදනයේ සඳහන් වූයේ ජනාධිපති මෛත්‍රීපාල සිරිසේන මහතා සහ හිටපු ආරක්ෂක ලේකම්වරයා ඝාතනය කිරීම සම්බන්ධයෙන් ඉන්දියාවේ කුමන හෝ සම්බන්ධයක් ඇති බවට පළ වූ මාධ්‍ය වාර්තා තමා ප්‍රතික්ෂේප කරන බව එම දුරකථන සංවාදයේදී ජනාධිපතිවරයා සඳහන් කළ බවයි.
එමෙන්ම එම වැරදි මාධ්‍ය වාර්තා හරහා නායකයින් දෙදෙනා අතර අනවබෝධයක් ඇති වීමට සහ රටවල් දෙක අතර දිගුකාලීන සබඳතාවය පලුදු කෙරෙන බවද ජනාධිපතිවරයා පැවසූ බවද එම නිවේදනයේ සදහන් වේ.
මෙන්ම ශ්‍රී ලංකා ජනාධිපතිවරයාගේ වාර්තා වැරදි බවට තරයේ ප්‍රකාශ කිරීම සම්බන්ධයෙන් ඉන්දීය අග්‍රාමාත්‍යවරයා ප්‍රශංසාවට ලක් කළ බවත් අසල්වාසීන්ට මුල්තැන දීමේ ප්‍රතිපත්ති සම්බන්ධයෙන් ද ශ්‍රී ලංකාව හා ඉන්දියාව අතර සෑම ක්ෂේත්‍රයකම සබඳතා ශක්තිමත් කිරීම සම්බන්ධයෙන් ද ඉන්දීය අග්‍රාමාත්‍යවරයා අදහස් පළ කළ බව නිවේදනයේ වැඩිදුරටත් සඳහන් වේ.
කෙසේ නමුත් මේ සම්බන්ධයෙන් ශ්‍රී ලංකා නිදහස් පක්ෂයේ 16 දෙනාගේ කණ්ඩායම අද මාධ්‍ය හමුවක් කැඳවා කරුණු පැහැදිලි කළේය.
එක්සත් ජනතා නිදහස් සන්ධාන පාර්ලිමේන්තු මන්ත්‍රී එස්.බී.දිසානායක මහතා මෙසේ අදහස් දැක්විය.
"හැබැයි පුදුමාකාර හදිස්සියකින් අගමැති රනිල් වික්‍රමසිංහ ඉන්දියාවෙන් ඉල්ලනවා මේ කරුණු සම්බන්ධයෙන් කතා කරන්න වෙලාවක් අවශ්‍යයි කියලා. ඒක නිසා තමයි කලබල වෙච්ච මෝඩි අගමැතිතුමා ජනාධිපතිතුමා එක්ක මම හිතන්නේ දුරකථන සාකච්ජාවකට එන්න ඇත්තේ. මොකක්ද මේ කරන්න යන්නේ. කරන්නේ ඉන්දියාවත් එක්ක තියෙන සියලු සම්බන්ධතා, මිත්‍ර සම්බන්ධතා මේ සියල්ලගෙන් ජනාධිපති මෛත්‍රිපාල සිරිසේන මැතිතුමා ඈත් කළා. ඒකෙ එකම අරමුණයි. ජිවිත ඝාතනයට එහා ගිය මෛත්‍රිපාල සිරිසේන දේශපාලන වශයෙන් ඝාතනය කිරීමේ දෙවෙනි කුමන්ත්‍රණය ඊයේ ක්රියාත්මක වුණා."
COMMENTS