දඹුල්ල බකමුන ප්‍රධාන මාර්ගයේ රිදී ඇල්ල රක්ෂිතය අසන්නේ වසර ගණනාවක් සිට එහි ප්‍රධාන මාර්ගයේ ගමන් කරන රථ වාහන හිමියන් පඬුරු දමන බුද්ධ ප්‍රත...
දඹුල්ල බකමුන ප්‍රධාන මාර්ගයේ රිදී ඇල්ල රක්ෂිතය අසන්නේ වසර ගණනාවක් සිට එහි ප්‍රධාන මාර්ගයේ ගමන් කරන රථ වාහන හිමියන් පඬුරු දමන බුද්ධ ප්‍රතිමා වහන්සේ සහ පින්පෙට්ටිය සිව්වන වතාවටත් 18 දින රාත්‍රියේ කිසියම් පිරිසක් කඩා විනාශ කොට දමා ඇතැයි එහි විහාරාධිකාරී ස්වාමින් වහන්සේ දඹුල්ල පොලිසියට පැමිණිලි කොට තිබේ.
මෙම ස්ථානයේ තැන්පත් කොට තිබූ බුද්ධ ප්‍රතිමා වහන්සේට සහ එහි ආවරණය සඳහා යොදා තිබූ වීදුරු පෙට්ටියට මෙවර කිසියම් පිරිසක් ප්‍රහාරයක් එල්ල කොට විනාශ කර දමා ඇතිබව සියම් මහා නිකායේ රංගිරි දඹුලු පාර්ශවයේ අනුනායක රංගිරි දඹුල්ල රංගිරි පාය රජමහ විහාරාධිපති කුඹුක් කඳන්වල නන්දවිමල හිමියෝ පවසති.
උන්වහන්සේ කියා සිටියේ තම විහාරස්ථානයට අයත් විහාරයක භාරකාරත්වයෙන් යුතුව මෙම ස්ථානයේ වඩාහිඳුවා සිටි බුද්ධ ප්‍රතිමා වහන්සේ මෙන්ම පිංකැටය අවස්ථා කිහිපයක දී කඩා සුනු විසුනු කර දමා තිබුණු බවය.
කෙසේවෙතත් උන්වහන්සේ වැඩිදුරටත් කියා සිටියේ තම ගම්මානයේ ම කණ්ඩායමක් විසින් මෙම අපරාධය සිදු කරන බවට තොරතුරු රැසක් අනාවරණය වී තිබෙන බවය .තොරතුරු පිළිබඳව සියලු දත්තයන් දඹුල්ල පොලිසියට ලබාදී ඇතැයිද උන්වහන්සේ පවසති.
බකමූණ ප්‍රධාන මාර්ගයේ ගමන් කරන රථ වාහන හිමියන් රක්ෂිතයට ඇතුළු වන ස්ථානයේ පිහිටි මෙම බුද්ධ ප්‍රතිමා වහන්සේ ළඟ පඬුරු දමා කොළ අත්තක් එල්ලා එම ස්ථානයෙන් ගමන් ආරම්භ කිරීම වසර ගණනාවක සිට ම්ප්‍රදායිකව සිදු කරගෙන එනු ලබන බවය. මෙම ස්ථානයේ ලැබෙන පඬුරු ආධාර ප්‍රදේශයේ විහාරස්ථානයේ වැඩිදියුණු කිරීම සඳහා යොදා ගන්නා බවත්ය .
ප්‍රාදේශීය දේශපාලඥයකු ඇතුළු පිරිසක් මෙහි ආදායම් ලබාගැනීම කාලයක සිට සිදුකොට ඇතැයි උන්වහන්සේ පවසති. පඬුරු ආදායම අහිමි වීමත් සමඟ ගමේ පන්සලත් එක්ක උරණ වූ පිරිසක් මෙම අපරාධය සිදු කරමින් පවතින බවද උන්වහන්සේ සඳහන් කරති.
දඹුල්ල මුලස්ථාන පොලිස් පරීක්ෂක සම්පත් වික්‍රමරත්න මහතා කියා සිටියේ මෙම පැමිණිල්ල පිළිබඳව සොයා බැලීමට විශේෂ පොලිස් කණ්ඩායමක් කලුන්දැව අඟුණකොළපෑලැස්ස ප්‍රදේශයේ රාජකාරිය සඳහා යවා තිබෙන බවය. එමෙන්ම එකම ගම්මානයේ දෙපිරිසක් අතර කාලයක් තිස්සේ පවතින ආරවුලක් බුදු පිළිම වහන්සේ ගෙන් සහ පින් කැට වලින් පිරිමහන බවට මූලික පරීක්ෂණවලදී හෙළි වී ඇතැයි හෙතෙම සඳහන් කළේය. කෙසේ වෙතත් මෙම අපරාධකරුවන් අත්අඩංගුවට ගෙන අධිකරණයට ඉදිරිපත් කරන බව ද සඳහන් කළේය.
(දඹුල්ල කාංචන කුමාර ආරියදාස)
COMMENTS