වත්මන් ආණ්ඩුව බලයට පැමිණෙන විට හිටපු ජනාධිපතිවරයාට ප්‍රශ්න රාශියක් සමඟ තර්ජනවලට මුහුණදීමට සිදුව තිබූ බව මහාමාර්ග හා මාර්ග සංවර්ධන අමාත්‍ය ...
වත්මන් ආණ්ඩුව බලයට පැමිණෙන විට හිටපු ජනාධිපතිවරයාට ප්‍රශ්න රාශියක් සමඟ තර්ජනවලට මුහුණදීමට සිදුව තිබූ බව මහාමාර්ග හා මාර්ග සංවර්ධන අමාත්‍ය කබීර් හෂීම් මහතා පවසයි.
විශේෂයෙන්ම විදුලි පුටුවට යැවීම, විදේශ රටවලට යෑමට බාධා එල්ල වීම ඇතුළු එම ප්‍රශ්න 2015 බලයට පැමිණි වත්මන් ජනාධිපතිතුමා සහ අගමැතිතුමාත් සූක්ෂ්මව කටයුතු කර එම ප්‍රශ්නවලින් එතුමාව නිදහස් කරගෙන රටට ස්වෛරීත්වයක් ඇති කර දුන්නේ යැයි ඇමැතිවරයා සඳහන් කළේය.
2015 ආණ්ඩුව භාරගන්නා විට සමස්ත ණය රුපියල් කෝටි 7,40,000ක් භාරගැනීමට සිදුවූ බවත් ඒ වන විට භාණ්ඩාගාරයේ තිබූ හිල වසා දමා ජනතාවට ලබාදෙන සහනාධාර වැඩිකොට, රටේ අවශ්‍යතාවට ගැළපෙන අයුරින් සංවර්ධන කටයුතු වඩාත් කඩිනම්ව හා කාර්යක්ෂමව සිදුකරගෙන ආ බවත් අමාත්‍යවරයා පෙන්වා දුන්නේය.
ඉඩම් හිමිකම් ඔප්පු 10,000ක් ජනතාවට ලබාදීමේ රජයේ ජාතික වැඩසටහන යටතේ, කෑගල්ල දිස්ත්‍රික්කයේ ජනතාවට ඔප්පු 1,560ක් ප්‍රදානය කිරීම නිමිත්තෙන් අග්‍රාමාත්‍ය රනිල් වික්‍රමසිංහ මහතාගේ ප්‍රධානත්වයෙන් පැවැති උත්සවයේදී අමාත්‍යවරයා මෙම කරුණු අනාවරණය කළේය.
එහිදී අමාත්‍යවරයා මෙසේද සඳහන් කළේය.
“මහින්ද රාජපක්ෂ පාලන කාලයේ කොළඹ වරායේ අධි ආරක්ෂිත කලාපයේ අක්කර 50ක භූමි ප්‍රමාණයක් සින්නක්කරව චීනයට ලියා දුන්නා. වත්මන් අගමැතිවරයා මැදිහත් වී එම සින්නක්කර ඔප්පුව බදු ඔප්පුවක් බවට පරිවර්තනය කර එය රටට සතු කර දුන්නා. එමෙන්ම රාජපක්ෂ පාලනය හමුදා මූලස්ථානය චීනයටත්, සෝමාවතියේ අක්කර 500ක් ඇමෙරිකාවටත් පවරා දුන්නා.
අගමැතිතුමා නිතරම කියන කතාවක් නම් අපි වර්තමානයට අනුව වෙනස් විය යුතු බව. හරි දේ, නිවැරැදි දේ කරන්න වෙනස්වීමට බිය විය යුතු නැති බවද හැම පුරවැසියකුටම ඉඩමක් නිවෙසක් රැකියාවක් සහිත ආදායම් මාර්ගයක් තිබිය යුතු බවද පක්ෂ, පාට, භේද නැතිව එම අවශ්‍යතා සපුරාලන්න අපේ ආණ්ඩුව කැපවී කටයුතු කරනවා.“ ඇමැතිවරයා වැඩිදුරටත් පැවසීය.
COMMENTS