මෙවර උසස් පෙළ විභාගයට අදාළව කාලසටහන් ගැටළුවක් හේතුවෙන් සිසුන් කිහිපදෙනෙකුට එහි සිංහල විෂය පළමු ප්‍රශ්න පත්‍රය මඟ හැරී යාමේ පුවතක් වාර්තා ව...
මෙවර උසස් පෙළ විභාගයට අදාළව කාලසටහන් ගැටළුවක් හේතුවෙන් සිසුන් කිහිපදෙනෙකුට එහි සිංහල විෂය පළමු ප්‍රශ්න පත්‍රය මඟ හැරී යාමේ පුවතක් වාර්තා විය.
අදාළ සිසුන් විභාග දෙපාර්තමේන්තුවේ නිල වෙබ් අඩවියෙන් ලබාගත් විභාග කාලසටහනේ විභාග ආරම්භ වන වේලාව නියමිත වේලාවට පසුව සටහන් වී තිබීම හේතුවෙන් මෙම ගැටළුව උද්ගත වී ඇති බවයි ගුරු සංගම් පෙන්වා දෙයි.
උසස් පෙළ විභාගයේ සිංහල විෂය පළමු ප්‍රශ්න පත්‍රය පසුගිය 11 වැනිදා පැවැත්විණි.
කෙසේ වෙතත්, විභාග දෙපාර්තමේන්තු වෙබ් අඩවියේ පළ කර තිබූ කාලසටහනට අනුව විභාගයට පෙනී සිටීමට ගිය සිසුන්ට එදින සිදුවූයේ අනපේක්ෂිත සිදුවීමකට මුහුණදීමටයි.
ඒ, ඔවුන් විභාග මධ්‍යස්ථානය වෙත ගමන් කරන විට එම ප්‍රශ්න පත්‍රය අවසන් වී තිබීම හේතුවෙනි.
එම සිසුන් විභාග දෙපාර්තමේන්තුවේ නිල වෙබ් අඩවියෙන් ලබාගත් කාලසටහනේ විභාග ආරම්භක වේලාව පස්වරු 12.30 ලෙස දක්වා තිබුණත්, ප්‍රශ්න පත්‍රය ආරම්භ වී ඇත්තේ පෙරවරු 08.30 ටය.
එහිදී තමන් මුහුණදුන් අසීරුතාව පැහැදිලි කළ බණ්ඩාරවෙල සීවලි මහා විද්‍යාලයේ සිසුවියක්, හල්දුම්මුල්ල වල්හපුතැන්න ජාතික පාසලේ සිසුවියක් සහ අම්පාර ප්‍රදේශයේ පෞද්ගලික විභාග අපේක්ෂිකාවක් කියා සිටියේ අදාළ ප්‍රශ්න පත්‍රයට පෙනී සිටීමට නොහැකිවූ බවයි.
කෙසේ වෙතත්, මේ වනවිට අදාළ කාලසටහන් ගැටළුව නිවැරදි කර විභාග දෙපාර්තමේන්තු වෙබ් අඩවියේ දක්වා තිබෙන අයුරු දක්නට ලැබේ.
විභාග කොමසාරිස් ජනරාල් සනත් පූජිත මහතාගෙන් කළ විමසීමකදී ඔහු කියා සිටියේ ප්‍රවේශ පත්‍රයේ පමණක් සඳහන් නියමිත කාල වේලාව තෝරා ගැනීමට අපේක්ෂකයින් කටයුතු කළ යුතු බවය.
මෙම ගැටළුව මතුවූ පසුගිය 11 වන සෙනසුරාදා මාධ්‍ය වෙත නිවේදනයක් නිකුත් කළ විභාග දෙපාර්තමේන්තුව ප්‍රවේශ පත්‍රයේ සඳහන් වේලාව හඳුනා ගෙන විභාගයට ඉදිරිපත් විය යුතු බවට උසස් පෙළ සිසුන් දැනුම්වත් කිරීමද විශේෂත්වයකි.
COMMENTS