ජනාධිපති මෛත්‍රීපාල සිරිසේන මහතාගේ නියෝගද නොතකමින් ඇතැම් මන්ත්‍රීවරුන් සිය අභිමතය පරිදි වැඩ කරගෙන බවට වාර්තා වේ. මෙහි ආසන්නතම සිදු වීම වන...
ජනාධිපති මෛත්‍රීපාල සිරිසේන මහතාගේ නියෝගද නොතකමින් ඇතැම් මන්ත්‍රීවරුන් සිය අභිමතය පරිදි වැඩ කරගෙන බවට වාර්තා වේ.
මෙහි ආසන්නතම සිදු වීම වන්නේ නිල සංචාර හැර රජයේ මුදල් වැය කරමින් පළාත් සභා මන්ත්‍රිවරුන්ට රට සවාරි යාම ජනාධිපතිවරයා විසින් තහනම් කර තිබියදීත්, ආණ්ඩුකාරවරුන්ටද නොදන්වා මේ දිනවල පළාත් සභා මන්ත්‍රිවරුන් විදෙස් සංචාර යාමට පටන්ගෙන තිබීමයි.
ඒ අනුව මධ්‍යම පළාත් සභාවේ මන්ත්‍රිවරුන් මේ වනවිටත් එවැනි විදෙස් සංචාරයකට ගොස් තිබේ. එම මන්ත්‍රිවරුන් එම විදෙස් සංචාරය යාම සඳහා මධ්‍යම පළාත් ආණ්ඩුකාර පී.බී. දිසානායක මහතාගේ කිසිදු අවසරයක් ලබාගෙන නොමැති බව හෙළි වී තිබේ.
ඌව සහ වයඹ පළාත් සභාවේ මන්ත්‍රිවරුන් ඉදිරි කාලය තුළ එවැනි සංචාර දෙකක් යාමට නියමිත අතර මේ පිළිබඳ ජනාධිපතිවරයාගේ දැඩි අවධානය යොමුවී ඇතැයිද ජනාධිපති කාර්යාල ආරංචි මාර්ග පැවසී ය.
යම් ලෙසකින් මෙම සංචාර සඳහා පළාත් සභාව සතු මුදල් වැය කිරීමට ඉල්ලීම් ලැබුණහොත් එම ප්‍රතිපාදන අනුමත නොකරන ලෙස ජනාධිපතිවරයා පළාත් ආණ්ඩුකාරවරුන්ට දැනුම් දී ඇතැයි වාර්තා වේ.
මේ අතර පසුගියදා අගමැති රනිල් වික්‍රමසිංහ මහතා සහ ඇමැතිවරුන් කිහිපදෙනෙකු අරලියගහ මන්දිරයට කැඳවා තිබේ.
එම ඇමැති හමුවට ලක්ෂ්මන් කිරිඇල්ල ඇමැතිවරයාද අගමැතිවරයා හමුවීමට පැමිණ සිටි අතර පසුගිය දිනවලදී පාර්ලිමේන්තුවේ මෙන්ම කැබිනට මණ්ඩලයේදීද ඔහු දක්නට නොලැබිම ගැන අගමැතිවරයා එහිදී විමසා ඇතැයි වාර්තා වේ.
“ලක්ෂ්මන් ලන්ඩන් ගියේ පුද්ගලික සංචාරයකටද?” යන්න අගමැතිවරයා විමසා ඇත. එහිදී අමාත්‍ය ලක්ෂ්මන් කිරිඇල්ල මහතා පවසා ඇත්තේ “නෑ. සර්, ලන්ඩන් තේම්ස් විහාරය කරපු ආරාධනයකට තමයි මම ගියේ. අද රටේ ජනතාවට පූර්ණ නිදහස තියෙනවා. මානව හිමිකම් ආරක්ෂා වෙනවා. මම මේවා ගැන ලන්ඩන්වල ඉන්න අපේ රටේ අය දැනුවත් කළා” යනුවෙනි.
අගමැතිවරයා මෙලෙස විමසා ඇත්තේ කිරිඇල්ල ඇමැතිවරයා අගමැතිවරයාටද නොදන්වා එම විදෙස් සංචාරය කර ඇති නිසා බව වාර්තා වේ.
COMMENTS