ද නිව්යෝර්ක්‌ ටයිම්ස් පුවත්පතේ පළ වූ හිටපු ජනාධිපති මහින්ද රාජපක්ෂ මහතා සම්බන්ධ ප්‍රවෘත්තිය සම්බන්ධව වැඩිදුර තොරතුරු දැන ගැනීමට අවශ්‍ය න...
ද නිව්යෝර්ක්‌ ටයිම්ස් පුවත්පතේ පළ වූ හිටපු ජනාධිපති මහින්ද රාජපක්ෂ මහතා සම්බන්ධ ප්‍රවෘත්තිය සම්බන්ධව වැඩිදුර තොරතුරු දැන ගැනීමට අවශ්‍ය නම් ඒ සඳහා තම ජ්‍යෙෂ්ඨ කර්තෘවරුන්ගෙන් විමසන ලෙස “ද නිව්යෝර්ක්‌ ටයිම්ස්“ පුවත්පත නිවේදනයක් නිකුත් කරමින් සඳහන් කර තිබේ.
එමඟින් ඔවුන් තවදුරටත් සඳහන් කර ඇත්තේ අදාළ වාර්තාව සම්බන්ධයෙන් ශ්‍රී ලංකාවේ මාධ්‍යවේදීන්ට බලපෑම් නොකරන ලෙසයි.
ඒ සම්බන්ධව ප්‍රවෘත්තිය ලියූ මාධ්‍යවේදිනියගෙන් කරුණු විමසීම හෝ තොරතුරු ලබාදුන් ශ්‍රී ලංකාවේ මාධ්‍යවේදීන්ගේ නම් හෙළිකිරීම මාධ්‍ය සදාචාරයට පටහැනි බව සඳහන් කරන ද නිව්යෝර්ක්‌ ටයිම්ස් පුවත්පත හිටපු ජනාධිපති මහින්ද රාජපක්ෂ මහතාට හිතවත් මන්ත්‍රීවරුන් විසින් මාධ්‍ය හමු පවත්වමින් සිදුකළ මාධ්‍ය සදාචාරයට පටහැනි ප්‍රකාශ හෙළාදකින බවද එම පුවත්පත නිකුත් කළ නිවේදනයේ වැඩිදුරටත් සඳහන් කර ඇත.
තමා ගැඹුරින් කරුණු වාර්තා කරමින් පළ කළ නිවැරදි වාර්තාවට සහාය දුන් ශ්‍රි ලාංකික මාධ්‍යවේදීන් දෙදෙනකුගේ නම් හිටපු ජනපති මහින්ද රාජපක්ෂ මහතාට සහාය දෙන මන්ත්‍රීවරුන් විසින් විවේචනය කිරීම මාධ්‍ය නිදහස සහ විවේචනය නිහඬ කිරීමක් බවත් එවන් බලපෑම් පිළිගත නොහැකි බවත් එම නිවේදනයේ සඳහන් වෙයි.
එවන් ක්‍රියාවලින් ශ්‍රී ලාංකිකයින්ගේ තොරතුරු දැන ගැනීම අහිමි කිරීමක් සිදු වන බවත් තමන්ට හෝ වෙනත් ඕනෑම සංවිධානයකට සේවය කරන මාධ්‍යවේදීන්ගේ ආරක්ෂාව තහවුරු කිරීම ශ්‍රී ලාංකා බලධාරීන්ගේ වගකීමක් බවත් නිව්යෝක් ටයිම්ස් පුවත්පත පෙන්වා දෙයි.
හිටපු ජනාධිපතිවරයාගේ ප්‍රකාශයක් සම්බන්ධයෙන් ප්‍රතිචාර දක්වමින් 'ද නිව්යෝක් ටයිම්ස්' පුවත්පත මෙම නිවේදනය නිකුත් කර තිබේ.
හිටපු ජනාධිපති මහින්ද රාජපක්ෂ මහතාගේ 2015 ජනාධිපතිවරණ මැතිවරණ ව්‍යාපාරය සඳහා චයිනා හාබර් සමාගමට අයත් පෞද්ගලික බැංකු ගිණුමකින් අමෙරිකානු ඩොලර් මිලියන 7.6ක මුදලක් ලබාගෙන ඇති බව 'ද නිව්යෝක් ටයිම්ස්' පුවත්පත පසුගිය 26 වැනිදා වාර්තා කර තිබුණි.
ඊට ප්‍රතිචාර දක්වමින් පුවත්පත පළ කළ අසත්‍ය කරුණු ප්‍රචාරය කර තමන්ට අපහාස කිරීම සම්බන්ධයෙන් මෙරට මාධ්‍ය ආයතනවලට එරෙහිව නඩු පවරන බව හිටපු ජනාධිපතිවරයා පසුගිය ඉරිදා ප්‍රකාශ කළේය.
COMMENTS