ශ්‍රී ලංකාවේ ප්‍රජාතන්ත්‍රවාදය වසර තුනක් ඇතුළත මහින්ද රාජපක්ෂ රජය යුද්ධය අවසන් කොට ස්ථාපිත කළ බවත් නව රජය බලයට පත්ව වසර තුනක් ඇතුළත ප්‍ර...
ශ්‍රී ලංකාවේ ප්‍රජාතන්ත්‍රවාදය වසර තුනක් ඇතුළත මහින්ද රාජපක්ෂ රජය යුද්ධය අවසන් කොට ස්ථාපිත කළ බවත් නව රජය බලයට පත්ව වසර තුනක් ඇතුළත ප්‍රජාතන්ත්‍රවාදය පමණක් නොව රටම විනාශයට පත් කළ බව හිටපු ආරක්ෂක ලේකම් ගෝඨාභය රාජපක්ෂ මහතා ඊයේ (01) දහවල් ගලේවෙල නගරයේ දී පැවසීය.
"එළිය " නමින් සංවිධානය කරගෙන යන රට දැනුවත් කරන වැඩසටහන් මාලාවේ මාතලේ දිස්ත්‍රික් එළිය වැඩසටහන ගලේවෙල ටි .බි . තෙන්නකෝන් අනුස්මරණ ශාලාවේදී පැවැත්විණි. හිටපු අමාත්‍ය ජනක බණ්ඩාර තෙන්නකෝන් පළාත් සභා හිටපු අමාත්‍ය ප්‍රමිත බණ්ඩාර තෙන්නකෝන් මහතා ඇතුළු පිරිසක් මෙම එළිය වැඩසටහන ගලේවෙල සංවිධානය කොට තිබිණි.
එහිදී පැමිණ සිටි ජනතාව අමතමින් හිටපු ආරක්ෂක ලේකම් ගෝඨාභය රාජපක්ෂ මහතා කියා සිටියේ මේ වන විට රට විශාල ආර්ථික අර්බුදයකට ඇද වැටී තිබෙන බවත් එදා බටලන්ද වධකාගාර පවත්වාගෙන ගිය පිරිස් මේ වන විට රටේ ප්‍රජාතන්ත්‍රවාදය ගැන කතා කිරීම සිදු කරන බව ය. එමෙන්ම තිස් වසරක් පැවති යුද්ධය අවසන් කොට රටේ සංවර්ධනය ස්ථාපිත කොට ප්‍රජාතන්ත්‍රවාදය ස්ථාපිත කිරීම මහින්ද රාජපක්ෂ යුගයේ දී සිදුකළ බවත් මේ වන විට වර්තමාන රජය ඒ සියල්ල විකෘති කරමින් රට විශාල විනාශයකට ඇද දමන බව සඳහන් කළේය.
අස්ගිරි පාර්ශවයේ අනුනායක භික්ෂූන් වහන්සේ තමන් ගේ පින්කමක දී සිදුකළ අනුශාසනාව විකෘති කොට විශාල අපකීර්තියක් එක් කිරීමේ වෑයමක නිරත වූ බවත් මේ වන විට ඒවා ජනතාවට පැහැදිලි වී ඇතැයි ද හෙතෙම අවධාරණය කළේය.
බටලන්ද වධකාගාරය සුදුවෑන් නිර්මාතෘ කළ පිරිස් වෙනත් කණ්ඩායම් වලට අභූත චෝදනා කරමින් සිටින බවත් මුස්ලිම් ජනතාව සාමාන්‍ය වැසියාට බොරු සපයමින් මහින්ද රාජපක්ෂ කෙරේ අවිශ්වාසය ගොඩනැඟූ බව ද ගෝඨාභය රාජපක්ෂ මහතා චෝදනා කරන්නට විය.
එළිය වැඩසටහන ක්රියාත්මක කරනු ලබන්නේ රටේ පවතින ආර්ථික කඩා වැටීම ප්‍රරජාතන්ත්‍රවාද විරෝධී ක්‍රියාදාමයන් හෙළිදරව් කිරීම ජනතාව දැනුවත් කිරීම මෙන්ම නව රජයට අවශ්‍ය පරිදි ජනතාව දැනුවත් කිරීම බවත් එසේ පත්වන නව රජය ක්‍රර්මානුකූලව වැඩකටයුතු කරගෙන යෑමට අවශ්‍ය මඟ පාදා දීම බව ද හෙතෙම අවධාරණය කළේය.
තිස් වසරක් පැවැති යුද්ධය නිමා කොට වසර තුනකින් ප්‍රජාතන්ත්‍රවාදය ස්ථාපිත කරමින් උතුරු නැගෙනහිර ප්‍රදේශවල ජනතාවට නිදහසේ ජීවත් කරවීමට අයිතිය ලබා දුන් බවත් මෙම ආණ්ඩුව බලයට පත්ව සිදුකර ඇත්තේ එම ස්ථාපිත කොට තිබූ නිදහස පාවිච්චි කරමින් දේශපාලන විරුද්ධවාදීන් දඩයම් කිරීම බවද ගෝඨාභය රාජපක්ෂ මහතා මෙහිදී අවධාරණය කළේය.
මේ වන විට රට පුරා දිනපතා අපරාධ රැල්ලක් වැඩිවී ඇති බවත් දිනපතාම මිනීමැරුම් රැසක් අසන්නට දකින්නට ලැබෙන බවද එමෙන්ම භික්ෂූන් වහන්සේලා දේශපාලනඥයින් සහ රටේ පොදු ජනතාව හට ජම්පර අන්දවන යුගයත් රට තුළ ක්රියාත්මක වන බවද මෙම රජය ජම්පර් ප්‍රජාතන්ත්‍රවාදය රට තුළ ක්රියාත්මක කරන බව ද ගෝඨාභය රාජපක්ෂ මහතා පැවසීය.
මේ අවස්ථාවේදී ආචාර්ය පාලිත කොහොන , රියර් අද්මිරාල් සරත් වීරසේකර, වීශේෂඥ වෛද්‍ය සීතා අරඹේපොල, ආචාර්ය නාලක ගොඩහේවා යන මහත්ම මහත්මීන් එළිය වැඩසටහන අමත මින් අදහස් ප්‍රකාශ කළහ.
(දඹුල්ල කාංචන කුමාර ආරියදාස)
COMMENTS