බොරැල්ල - කොට්ටාව ප්‍රධාන මාර්ගයේ පොල්වත්ත, දෙපානම අතර ප්‍රදේශයේ පිහිටා ඇති බියර් වෙළෙඳසැලක් පිළිබඳ එම ප්‍රදේශවාසීන්ගෙන් දැඩි විරෝධයක් එල්...
බොරැල්ල - කොට්ටාව ප්‍රධාන මාර්ගයේ පොල්වත්ත, දෙපානම අතර ප්‍රදේශයේ පිහිටා ඇති බියර් වෙළෙඳසැලක් පිළිබඳ එම ප්‍රදේශවාසීන්ගෙන් දැඩි විරෝධයක් එල්ල වී තිබේ.
එම බියර් වෙළෙඳසැල පිහිටා ඇත්තේ සිසුන් 600ක් පමණ ඉගෙනුම ලබන කොරියන් පරිගණක මධ්‍යස්ථානය, පෞද්ගලික ජාත්‍යන්තර පාසලක්ද, දෙපානම ධර්මපාල කණිෂ්ඨ විද්‍යාලයත්, රජයේ කණිෂ්ඨ විද්‍යාලයත් යන සිසු දරුවන් විශාල ප්‍රමාණයක් ඉගෙනුම ලබන අධ්‍යාපන ආයතන රාශියක් පිහිටා ඇති ප්‍රදේශයකය.
තවද ගනේගොඩ ගණපති දේවාලය, දමින්දාරාම විහාරස්ථානය ආගමික ස්ථානද පිහිටි එම ප්‍රදේශයේ මෙම බියර් වෙළෙඳසැල පිහිටා තිබේ. මෙම බියර් වෙළෙඳසැල ආරම්භ කර තිබෙන්නේ මීට එකහාමාරකට පමණ පෙර වුවද ප්‍රදේශවාසීන් පවසන ආකාරයට මෙහි බරපතලම තත්ත්වය උද්ගතව ඇත්තේ එම බියර් වෙළෙඳසැල නිසා සමාජයට දැඩි විනාශයක් සිදුවී ඇති බවයි.
ඉහත සඳහන් කළ අධ්‍යාපන ආයතන වල සිසුන් දිනපතා බියර් මිලදී ගෙන ඇතැම් විට එම වෙළෙඳසැල තුලම පානය කරන බවටත් ඇතැම් සිසුන් බෑග්වල දමාගෙන ගොස් අධ්‍යාපන ආයතන තුළම පානය කරන බවටත් ප්‍රදේශවාසීන් චෝදනා කරයි.
මෙලෙස බියර් පානය කර විනෝද අවස්ථාද, මහපාරේ ගුටිබැට හුවමාරු කර ගන්න අවස්ථාද වැඩි වෙමින් පවතින බව එම ප්‍රදේශවාසීන් පෙන්වා දෙයි.
මේ සම්බන්ධයෙන් ආගමික ස්ථාන වල ස්වාමීන් වහන්සේලාද, පූජකවරුන්ද අධ්‍යාපන ආයතන ප්‍රධානීන්ද සාකච්ඡා කර තීරණය කර ඇත්තේ එම බියර් වෙළෙඳසැල වසා දැමිය යුතු බවයි.
එම ඉල්ලීමට විසඳුමක් නොලැබුණහොත් මහජන උද්ඝෝෂණයක් පැවැත්වීමට සූදානම් බවද පොල්වත්ත දෙපානම ප්‍රදේශවාසීන් සුරාබදු කොමසාරිස් ජනරාල්වරයාට ලිපියක් යවමින් සඳහන් කර තිබේ.
ඒ අනුව මෙම බරපතල ගැටලුව පිළිබඳව පරීක්ෂණ පවත්වා කඩිනම් පියවර ගන්නා ලෙස එම ලිපිය මගින් වැඩිදුරටත් පෙන්වා දී තිබේ.
COMMENTS