අමාත්‍ය මලික් සමරවික්‍රම මහතා එක්සත් ජාතික පක්ෂයේ සභාපති ධුරයෙන් ඉල්ලා අස්වීමට තීරණය කර ඇති අතර එකී පුරප්පාඩුව සඳහා අමාත්‍ය තලතා අතුකෝරල ම...
අමාත්‍ය මලික් සමරවික්‍රම මහතා එක්සත් ජාතික පක්ෂයේ සභාපති ධුරයෙන් ඉල්ලා අස්වීමට තීරණය කර ඇති අතර එකී පුරප්පාඩුව සඳහා අමාත්‍ය තලතා අතුකෝරල මහත්මිය පත් කිරීමට පක්ෂයේ ජ්‍යෙෂ්ඨයින්ගේ අවධානය යොමුව ඇතැයි 'සිරිකොත' එජාප මුලස්ථාන ආරංචිමාර්ග පවසයි.
තලතා අතුකෝරල මහත්මිය එසේ සභාපති ධුරයට පත්වුවහොත් ඇය එජාපයේ පළමු සභාපතිනිය ලෙස ඉතිහාසයට එක්වනු ඇත.
එක්සත් ජාතික පක්ෂයේ වත්මන් නිලධාරී මණ්ඩලය නිල කාලය අප්‍රේල් මාසයේ 30 දා අවසන් වීමට නියමිත අතර නව නිලධාරී මණ්ඩලය හා එජාප පූර්ණ ප්‍රතිසංවිධානයක් සිදු කිරීමට අදාළ අවසන් තීරණවලට හෙට (08දා) සවස් වන විට එළැඹීමට හැකි වනු ඇතැයි ඉහත ආරංචිමාර්ග පවසයි.
පූර්ණ ප්‍රතිසංවිධානයක්:
පක්ෂයේ පූර්ණ ප්‍රතිසංවිධානයක් සිදු කරන බවට එජාප නායක අග්‍රාමාත්‍ය රනිල් වික්‍රමසිංහ මහතා ලබාදුන් ප්‍රතිඥාවක් මත ප්‍රතිසංවිධානයට අදාළ කමිටු ත්‍රිත්වයේ නිර්දේශ හා යෝජනා පිළිබඳව එජාප කෘත්‍යාධිකාරි මණ්ඩලය සහ එජාප පාර්ලිමේන්තු කණ්ඩායම අද දිනයේද දීර්ඝ ලෙස සාකච්ඡා කිරීමට නියමිතය.
එම තීරණවලට අනුව පක්ෂයේ සියලු නිලතල සඳහා සුදුස්සන් පත්කිරීම හා ව්‍යස්ථා සංශෝධන මේ මස අවසානයට පෙර සිදු කෙරෙනු ඇතැයි ඒ සඳහා පක්ෂයේ විශේෂ මහා සම්මේලන වාරයක් කැඳවීමට සිදුවන බවත් වාර්තාවේ.
එජාපයේ පූර්ණ ප්‍රතිසංවිධානයක් සිදු කිරීම සඳහා සියලුම තනතුරුවලට නාම යෝජනා කැඳවා ඡන්ද විමසීමකින් නිලධාරීන් පත් කළ යුතු බවත් 2020 මැතිවරණයකට ඉදිරිපත් කරන නායකයා නම් කළයුතු බවත් පක්ෂ ව්‍යවස්ථාවේ පසුගිය කාලසීමාවේ සිදු කළ සංශෝධන අහෝසි කර 1977දී ක්රියාත්මක වූ එජාප ව්‍යවස්ථාව යළි බලගැන්විය යුතු බවත් එජාප මන්ත්‍රිවරුන් බහුතරයක් පසුගිය දිනවල පැවැති සාකච්ඡාවලදී අවධාරණය කර තිබේ.
එමෙන්ම නිදහස් පක්ෂයේ අමාත්‍යවරුන් 6 දෙනෙකුට සහ නියෝජ්‍ය කථානායකවරයාට එරෙහිව, කථානායකවරයාට භාර දුන් විශ්වාසභංග යෝජනාව ඉල්ලා අස් කර ගන්නා ලෙසට, අග්‍රාමාත්‍යවරයා එක්සත් ජාතික පක්ෂ මන්ත්‍රීවරුන්ට දැනුම් දුන්නා.
රජයේ ප්රවෘත්ති අධ්‍යක්ෂ ජනරාල් සුදර්ශන ගුණවර්ධන නිවේදනයක් මගින් සදහන් කළේ අමාත්‍යවරයෙකුට එරෙහිව විශ්වාසභංග යෝජනාවක් ඉදිරිපත් කිරීමට පෙර ඒ පිළිබදව පක්ෂයේ පාර්ලිමේන්තු කණ්ඩායම තුළ සාකච්ඡා කොට තීරණයකට එළඹිය යුතු බවට අග්‍රාමාත්‍යවරයා දැනුම් දුන් බවයි.
ඉදිරියේදී මේ පිළිබද පාර්ලිමේන්තු කණ්ඩායම තුළ සාකච්ඡා කරන අතර, ශ්‍රී ලංකා නිදහස් පක්ෂය සමඟ ඇති මතභේදයට තුඩු දෙන කරුණු විසදා ගත හැකි බව අග්‍රාමාත්‍යවරයා ප්‍රකාශ කළේ යැයි රජයේ ප්රවෘත්ති අධ්‍යක්ෂ ජනරාල්වරයා සඳහන් කළේ.
කෙසේ වෙතත්, විශ්වාසභංගය ඉදිරිපත් කළ එක්සත් ජාතික පක්ෂයේ මන්ත්‍රීවරුන් සඳහන් කළේ මේ සම්බන්ධයෙන් අද (07) දිනයේ පැවැත්වෙන කෘත්‍යාධිකාරී මණ්ඩල රැස්වීමේදී සාකච්ඡා කිරීමට නියමිත බවයි.
COMMENTS