මහවැව තොඩුවාව මාර්ගයේ කුඩාමඩුවැල්ල ප්‍රදේශයේදී ප්‍රධාන මාර්ගය හරස් කරමින් මේ විරෝධතාවය පැවැති අතර පැය දෙකකට ආසන්න කාලයක් මෙය පැවැත්විණි. ...
මහවැව තොඩුවාව මාර්ගයේ කුඩාමඩුවැල්ල ප්‍රදේශයේදී ප්‍රධාන මාර්ගය හරස් කරමින් මේ විරෝධතාවය පැවැති අතර පැය දෙකකට ආසන්න කාලයක් මෙය පැවැත්විණි. මෙහිදී ප්‍රධාන මාර්ගයේ බිම වැතිර ගත් විරෝධතාකරුවන් බලධාරීන් පැමිණෙන තෙක් විරෝධතාවය අත් නොහරින බව ප්‍රකාශ කළත් පසුව බලධාරීන් කිසිවෙකු නොපැමිණීම හේතුවෙන් විරෝධය අත්හැරීමට කටයුතු කළේය.
නිවාස මුහුදට බිලි වෙයි
මේ වන විට කුඩාමඩුවැල්ල ප්‍රදේශයේ මීටර් එකසිය පනහක පමණ ප්‍රදේශයක් මුහුදුබත් වී ඇති අතර තාවකාලික කුඩාරම් රැසක් විනාශ වී ස්ථිර නිවාස කීපයක්ද මුහුදු බත් වීමේ අවධානමක් හටගෙන තිබේ. නිවාස කීපයකට මුහුදු ජලය ගැලීම හේතුවෙන් නිවාස අත්හැර යාමට තමන්ට සිදුව ඇති අතර ළිං රැසකට ලවණ ජලය මිශ්‍ර වී ඇති බවද විරෝධතාකරුවෝ පවසති.
ප්‍රදේශවාසීන් වැඩිදුරටත් කියා සිටියේ මේ මුහුදුඛාදනයට ප්‍රධාන හේතුව පොර්ට් සිටි ව්‍යාපෘතිය සඳහා මීගමුව ආශ්‍රිත ප්‍රදේශයෙන් මුහුදු වැලි ලබා ගැනීම බවයි. ජාතික ධීවර සහයෝගිතාවය මේ පිළිබඳව ජනතාව දැනුවත් කිරීමක්ද සිදු කළ අතර එම ව්‍යාපෘතිය සඳහා වැලි ලබා ගැනීමට විරෝධය පළ කරමින් කළු පැහැති බැලුන් ගුවන් ගත කිරීමක්ද මෙහිදී සිදු විය. එම කළු පැහැති වායු බැලුවල "පොර්ට් සිටිය එපා, ජනතාවගේ විරෝධය" යන්න සටහන් කර තිබිණි.
එක නගරයක් හදලා නගර රැසක් විනාශ කරනවා
මෙහිදී අදහස් දැක්වූ ජාතික ධිවර සහයෝගිතාවයේ කැඳවුම්කරු හර්මන් කුමාර මහතා,
"අද වන විට කොළඹට උතුරු ප්‍රදේශයේ ගම්මාන රැසක් මුහුදුබත් වීමේ අවදානමක් ඇති වී තිබෙනවා. මෙයට ප්‍රධානම හේතුව වසර දෙකකට ආසන්න කාලයක සිට පොර්ට් සිටි ව්‍යාපාරය සඳහා මීගමුව ආශ්‍රිත මුහුදෙන් නැව් මඟින් වැලි පොම්ප කිරීම. මේ ව්‍යාපෘතිය පසුගිය රජය ආරම්භ කළත් මේ රජය මෙය නවත්වන බවට මැතිවරණ පොරොන්දුවක් ජනතාවට ලබා දී තිබුණා. එක නගරයක් හදලා නගර රැසක් විනාශ කිරීම තමයි මින් දැන් සිදුව තිබෙන්නේ. මේ රජය මේ ව්‍යාපෘතිය නවත්වන්නේ නැත්නම් චීන රජයෙන් හෝ ඉල්ලිය යුතුයි මෙය නවත්වන්න කියලා. අද අපි මේ කළු පැහැති බැලුන් ගුවන් ගත කරලා කළෙත් අපේ රටේ රජයට මෙන්ම චීන රජයටත් මේ පිළිබඳ විරෝධය පළ කිරීමක්."
එසේම තම ඉල්ලීම්වලට විසඳුම් ලැබෙන තෙක් දිගින් දිගටම විරෝධතාවයේ නිරත වන බවද විරෝධතාකරුවෝ එහිදී පැවසූහ. මේ විරෝධතාවයට සමගාමීව මිගමුව වැල්ලවීදිය, කුට්ටිදුව, කුඩාපාඩුව, මුන්නක්කරය, පිටිපන, බසියාවත්ත, කැපුන්ගොඩ, සරක්කුවයන ප්‍රදේශවලදී ද විරෝධතා සංවිධානය කර තිබුණි.
ප්‍රසාද් ජයමාන්න - මාරවිල
COMMENTS