දේශීය සුළු හා මධ්‍ය පරිමාණ ව්‍යවසායකයින් සහ ව්‍යාපාරිකයින් නඟාසිටුවීම සඳහා ඒකාබද්ධ ණය යෝජනා ක්රම 100ක පුළුල් වැඩපිළිවෙළක් ඉදිරි මාස කිහි...
දේශීය සුළු හා මධ්‍ය පරිමාණ ව්‍යවසායකයින් සහ ව්‍යාපාරිකයින් නඟාසිටුවීම සඳහා ඒකාබද්ධ ණය යෝජනා ක්රම 100ක පුළුල් වැඩපිළිවෙළක් ඉදිරි මාස කිහිපය තුළ ක්‍රියාවට නංවන ලෙස ජනාධිපතිවරයා මුදල් අමාත්‍යාංශයට, මහබැංකුවට සහ රාජ්‍ය බැංකු ප‍්‍රධානීන්ට උපදෙස් දී තිබේ.
ජාතික ආර්ථික සභාව මඟින් ආර්ථික පුනර්ජීවනය උදෙසා ඒකාබද්ධ ණය යෝජනා ක්රම 100ක වැඩපිළිවෙළක් ඉදිරිපත් කර තිබෙන අතර, ඒ් පිළිබඳ රාජ්‍ය බැංකු ප‍්‍රධානීන් සමග 28 බදාදා ජනාධිපති කාර්යාලයේ පැවති සාකච්ඡාවකදී ජනාධිපති මෛත්‍රීපාල සිරිසේන මෙම උපදෙස් ලබා දුන් බවයි ජනාධිපති මාධ්‍ය ඒකකය පවසන්නේ.
දේශීය සුළු හා මධ්‍යම පරිමාණ ව්‍යවසායකයින් හා ව්‍යාපාරිකයින් දිරි ගන්වමින් මෙරට දේශීය කර්මාන්තයේ නව පුනර්ජීවයක් ඇති කිරීම මෙහි අරමුණයි බව මෙන්ම ඉදිරි මාස කිහිපය තුළ ක්‍රියාවට නැංවීමට අපේක්ෂිත මෙම වැඩපිළිවෙළ පිළිබඳ වාර්තාවක් ඉදිරි සති දෙකක කාලය තුළ තමා වෙත ලබාදෙන ලෙස ද ජනපති විසින් මුදල් අමාත්‍යංශයෙන් ඉල්ලීමක් කර තිබේ.
රාජ්‍ය බැංකු මගින් උපයා ගන්නා ලාභ කොතෙක් දුරට මහජනතාව වෙත ගලායනවාද යන්න පිළිබඳ අවධානය යොමුවිය යුතු බව මෙහිදී අවධාරණය කළ ජනාධිපතිවරයා අදාළ ප‍්‍රතිලාභ ආර්ථික ක්‍රීයාදාමයන් තුළ සාමාන්‍ය ජනතාව මෙන්ම ව්‍යවසායකයින් වෙත ද ගලායමට සැලැස්වීම ඉතා වැදගත් බව පෙන්වා දී ඇත.
බොහෝ ව්‍යවසායකයින්ට මුහුණදීමට සිදුව ඇති ප‍්‍රධාන ගැටලුවක් වන්නේ ණය ලබාගැනීමේදී පනවා ඇති කොන්දේසි සහ ඇප ලියවිලි සම්බන්ධව මතුවන ගැටලු බව පෙන්වා දී ඇති ජනපති ණය ලබා ගැනීමේ කොන්දේසි, සුරැකුම්පත් සහ ඇප ලියවිලි අවම මට්ටමින් පවත්වා ගනිමින් අපහසුතාවයකින් තොරව ව්‍යවසායකයින්ට ණය ලබාගැනීමට අවශ්‍ය පසුබිම සකසා දීමේ වැදගත්කම ද වැඩි දුරටත් මෙහිදි පැහැදිළි කළ බව ජනාධිපති මාධ්‍ය ඒකකය නිවේදනය කරයි.
COMMENTS