අද හෝ හෙට මෙම සංශෝධනය සිදුවිය හැකි බවත් මෙවර අමාත්‍ය මණ්ඩල සංශෝධනයේදී ප්‍රධාන අමාත්‍ය ධුර කිහිපයකම වෙනස්කම් සිදුවිය හැකි බවත් රජයේ ආරංචි ම...
අද හෝ හෙට මෙම සංශෝධනය සිදුවිය හැකි බවත් මෙවර අමාත්‍ය මණ්ඩල සංශෝධනයේදී ප්‍රධාන අමාත්‍ය ධුර කිහිපයකම වෙනස්කම් සිදුවිය හැකි බවත් රජයේ ආරංචි මාර්ග පවසයි.
ජනාධිපති කාර්යාල ආරංචි මාර්ග පවසන්නේ මංගල සමරවීර ඇමැතිවරයාගේ මුදල්, කබීර් හෂීම් ඇමැතිවරයාගේ රාජ්‍ය ව්‍යවසාය සංවර්ධන, මලික් සමරවික්‍රම ඇමැතිවරයාගේ ජාත්‍යන්තර වෙළඳාම, සහ අගමැති රනිල් වික්‍රමසිංහ මහතාගේ ජාතික ආර්ථික ප්‍රතිපත්ති යන අමාත්‍යාංශ හතරම වෙනස් වීමට ඉඩ ඇති බවයි.
එම අමාත්‍යාංශවල අමාත්‍යවරුන් මෙන්ම ලේකම්වරුන් ද වෙනස් වීමට ඉඩ ඇති බව වාර්තා වේ.
දැනට, ආර්ථික කළමනාකරණයේ පවතින පවතින දුර්වලතා මගහරවා ගැනීම එහි අරමුණ බව එම ආරංචි මාර්ග සඳහන් කළේය.
තවද, ඒ ඒ අමාත්‍යාංශ යටතේ පවතින ආයතනද වෙනස් වීමට ඉඩ තිබේ.
2015දී මේ අමාත්‍යාංශ වෙන් කර ගෙන තිබුණේ කිසිදු විද්‍යාත්මක පදනමක් නොමැතිව වන අතර, මේ වන විට මේ තත්ත්වය වෙනස් විය යුතු බවට ජනාධිපතිවරයාට හිතවත් දේශපාලන නායකයින් පෙන්වා දී ඇතැයි වාර්තා වේ.
සිදු කිරීමට නියමිත අමාත්‍ය මණ්ඩල සංශෝධනය වත්මන් රජයේ දෙවන අමාත්‍ය මණ්ඩල සංශෝධනය ලෙස සැළකේ.
ජනාධිපතිවරයා සහ අග්‍රාමාත්‍යවරයා දරන අමාත්‍ය ධුර ද ඇතුලුව මේ වනවිට රජයේ කැබිනට් අමාත්‍ය ධුර සංඛ්‍යාව 47 කි.
ඒ අතර ජනාධිපතිවරයා ද ඇතුලුව එක්සත් ජනතා නිදහස් සන්ධානය නියෝජනය කරන කැබිනට් අමාත්‍යවරුන් සංඛ්‍යාව 15 ක් වන අතර අග්‍රාමාත්‍යවරයාද ඇතුලුව එක්සත් ජාතික පක්ෂයේ කැබිනට් අමාත්‍යවරුන් 32 ක් වත්මන් අමාත්‍ය මණ්ඩලය නියෝජනය කරනු ලබයි.
මේ අතර නියෝජ්‍ය අමාත්‍යවරුන් 22 ක් වත්මන් අමාත්‍ය මණ්ඩලයේ සිටින අතර, ඉන් 11 ක් එක්සත් ජනතා නිදහස් සන්ධානය සහ 11 එක්සත් ජාතික පක්ෂය නියෝජනය කරනු ලැබේ.
එමෙන්ම රාජ්‍ය අමාත්‍යවරුන් 11 ක් එක්සත් ජනතා නිදහස් සන්ධානයෙන්ද තවත් රාජ්‍ය අමාත්‍යවරුන් 12 ක් එක්සත් ජාතික පක්ෂය නියෝජනය කරයි.
19 වන ව්‍යවස්ථා සංශෝධනයට අනුව කැබිනට් මණ්ඩලය 30 කට සීමා කර ඇති අතර රාජ්‍ය සහ නියෝජ්‍ය අමාත්‍ය ධුර සංඛ්‍යාව 45 කට සීමා කර තිබේ.
කෙසේ වෙතත් වත්මන් රජය එම සීමාව ඉහළ දමනු ලැබුවේ ජාතික ආණ්ඩු ගිවිසුම පාර්ලිමේන්තුවට ඉදිරිපත් කර අනුමැතිය ලබාගැනීමෙන් අනතුරුවය.
COMMENTS