පළාත් පාලන ආයතනවලට සභිකයින් පත්කිරීමේදී අනිවාර්ය කාන්තා නියෝජනය ගැටලුවක් වී ඇතැත් මෙවර පැවති මැතිවරණයට අදාළ වන සේ පනතට සංශෝධනය සිඳුකළ නොහැ...
පළාත් පාලන ආයතනවලට සභිකයින් පත්කිරීමේදී අනිවාර්ය කාන්තා නියෝජනය ගැටලුවක් වී ඇතැත් මෙවර පැවති මැතිවරණයට අදාළ වන සේ පනතට සංශෝධනය සිඳුකළ නොහැකි යැයි පළාත් සභා හා පළාත් පාලන අමාත්‍යංශය සඳහන් කරයි.
එවැනි ගැටලුවක් තිබේනම් ඉදිරියේදී පැවැත්වෙන පළාත් පාලන ඡන්දයකදී ඒවා නිවැරදි කර ගැනීමේ හැකියාවක් තිබෙන බවද එම අමාත්‍යාංශය සඳහන් කරයි.
මෙවර 2018 පළාත් පාලන ආයතන ඡන්ද විමසීම නව නීතියට අනුව සිඳුකළ හෙයින් ඒකී නිතිය යටතේ සභිකයින් තෝරාපත්කර යැවිය යුතුවන බවද එහි දක්වා ඇත.
කෙසේ වෙතත් කාන්තා නියෝජනය සම්බන්ධයෙන් දැනට පැනනැගී ඇති ගැටළු සහගත තත්ත්වය පිළිබඳව පළාත් සභා සහ පළාත් පාලන අමාත්‍ය ෆයිසර් මුස්තාෆා මහතා විසින් මැතිවරණ කොමිසමේ සභාපති මහින්ද දේශප්‍රිය මහතා වෙත නිර්දේශ සහිතව කරුණු ඉදිරිපත් කර තිබේ.
ඒ අනුව අමාත්‍යවරයා පෙන්වා දී ඇත්තේ පනත් සශෝධනය සිදුකරන අවස්ථාවේ සිටම කොමිසම් සභාවේ සහ මැතිවරණ දෙපාර්තමේන්තුවේ අදහස් සහ නිරීක්ෂණ සහිතව අදාල සංශෝධනයන් සිදු කළ බවයි.
ඒ පිළිබඳ යම් ගැටළුවක් පැනනැගී ඇත්නම් නීතිපතිවරයාගෙන් කරුණු විමසා තීරණ ගැනීම සුදුසු බව අමාත්‍යවරයා සිය ලිපිය මඟින් පෙන්වා දී තිබේ.
මෙවර පළාත් පාලන ආයතන ඡන්ද විමසීම 262 වන අධිකාරිය වූ පළාත් පාලන ආයතන ඡන්ද විමසීම් ආඥාපනත සහ එහි මෙතෙක් සිදු කරන ලද සංශෝධන පදනම් කරගෙන පැවති ඡන්ද විමසීමක් වන බැවින් එම නීතිය යටතේ ඒ ඒ පළාත් පාලන ආයතන වෙත තේරීපත්වීම් නෛතිනකමය අපේකෂාවක් සහිතව අපේක්ෂකයින්ගේ නම් ඉදිරිපත් කර ඇති බව සඳහන් කර තිබේ.
මෙම පනතෙහි සංශෝධන සිදු කිරීමට නෛතිකමය බාධාවක් පැනනැගී ඇති බැවින් සභිකයින් තෝරා පත් කර ගැනීම සහ තෝරා යැවීමට අදාළව යම් ප්‍රායෝගික ගැටළු උද්ගතවන්නේ නම් මින් ඉදිරියට පැවැත්වෙන පළාත් පාලන ආයතන ඡන්ද විමසීමකදී ඒවා නිවැරදි කරගත යුතු බව ද අමාත්‍යවරයා සිය ලිපිය මඟින් පෙන්වා දී ඇත.
කෙසේවෙතත් පැවති ඡන්දය සඳහා අදාළ වන සේ එම සංශෝධන සිදු කළ නොහැකි බවට නිරීක්ෂණය වන බව ද අමාත්‍යවරයා සඳහන් කර තිබේ.
COMMENTS