ජනාධිපති මෛත්‍රීපාල සිරිසේන මහතාගේ සහාය ඇතිව එක්සත් ජාතික පක්ෂ රජයක් පිහිටුවීමට අවශ්‍ය කටයුතු මේ වනවිට සම්පාදනය වෙමින් පවතින බව අභ්‍යන්තර...
ජනාධිපති මෛත්‍රීපාල සිරිසේන මහතාගේ සහාය ඇතිව එක්සත් ජාතික පක්ෂ රජයක් පිහිටුවීමට අවශ්‍ය කටයුතු මේ වනවිට සම්පාදනය වෙමින් පවතින බව අභ්‍යන්තර ආරංචි මාර්ග පවසයි.
ඒ අනුව ජනාධිපතිවරයාගේ එකඟත්වය මත එක්සත් ජනතා නිදහස් සන්ධන මන්ත්‍රීවරුන් 43කගේ කොටසක් එක්සත් ජාතික පක්ෂයට සහාය දීමටත්, සෙසු පිරිස විපක්ෂ මන්ත්‍රීවරුන් ලෙස කටයුතු කිරීමටත් එකඟත්වය පළවී ඇතැයි වාර්තා වේ.
ඒ අනුව ජනාධිපති මෛත්‍රීපාල සිරිසේන මහතාගේ සහ අගමැති රනිල් වික්‍රමසිංහ මහතාගේ මුලිකත්වයෙන් ක්රියාත්මක වන යහපාලන රජය ඉදිරියටත් ක්රියාත්මක වන බව එම ආරංචි මාර්ග සඳහන් කරයි.
මේ අතර ඒකාබද්ධ විපක්ෂ පාර්ලිමේන්තු මන්ත්‍රී වාසුදේව නානායක්කාර මහතා පවසන්නේ මේ දිනවල රඟ දැක්වෙනුයේ දේශපාලන රංගනයක් බවත් කෙසේ හෝ ජනාධිපතිවරයාගේ දුර්වලතා හේතුවෙන් ශ්‍රී ලංකා නිදහස් පක්ෂ මන්ත්‍රීවරු කිහිපදෙනෙක්ම මින් ඉදිරියේදී ඒකාබද්ධ විපක්ෂය හා එක්වීමට නියමිත බවත්ය.
ශ්‍රීලනිප අගමැති සටන ඉදිරියට
කෙසේ වෙතත් ජනාධිපති, අගමැති ප්රමුඛ වත්මන් සම්මුතිවාදී ආණ්ඩුව බාධාවකින් තොරව ඉදිරියට පවත්වා ගෙන යාමට ජනාධිපති මෛත්‍රීපාල සිරිසේන සමග ඊයේ (19) දහවල් පැවැති දීර්ඝ සාකච්ඡාවකින් පසුව එක්සත් ජනතා නිදහස් සන්ධානය තීන්දු කර ඇත.
ශ්‍රී ලංකා නිදහස් පක්ෂයේ භාණ්ඩාගාරික, අමාත්‍ය එස්.බි. දිසානායක මහතා පැවසූවේ ව්‍යවස්ථානුකූලව අවශ්‍ය වෙනස්කම් කිරීමට පාර්ලිමේන්තුවේ අවශ්‍ය කරන ශක්තිය එක්සත් ජනතා නිදහස් සන්ධානයට තිබෙන බවත් ශ්‍රී ලංකා නිදහස් පක්ෂයේ අගමැතිවරයෙකු පත්කිරීමේ උත්සාහය නතර කර නැති බවත්ය.
එසේ වුවත් මේ අර්බුදය තවදුරටත් පවත්වාගෙන යාමෙන් රට අස්ථාවර වන බැවින් පවතින සම්මුතිවාදී ආණ්ඩුව ඉදිරියට පවත්වා ගෙන යාම මේ මොහොතේ හොඳම විකල්පය වන බැවින් මෙම එකඟතාවට පැමිණි බව එස්.බි. දිසානායක මහතා පෙන්වා දුන්නේය.
රටේ වත්මන් දේශපාලන තත්ත්වය සම්බන්ධයෙන් එක්සත් ජනතා නිදහස් සන්ධානයේ මන්ත්‍රී කණ්ඩායම සමග තීරණාත්මක සාකච්ඡාවක් ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ජනාධිපති ලේකම් කාර්යාලයේදී ඊයේ (19) දහවල් පැවැත්විණ. පැය හතරකට ආසන්න කාලයක් පැවැති මෙම සාකච්ඡාව ඉතාමත් උණුසුම් මුහුණුවරක් ගෙන තිබූ බව වාර්තා වේ.
පසුගිය පළාත් පාලන මැතිවරණ ප්‍රතිඵලයත් සමග වත්මන් ආණ්ඩුවට පවතින විරෝධය සම්බන්ධයෙන් මැති ඇමැතිවරු මෙහිදී කරුණු පැහැදිලි කර තිබිණ. ඒ අනුව රනිල් වික්‍රමසිංහ අගමැතිවරයා යටතේ එක්සත් ජාතික පක්ෂ ආණ්ඩුවේ තවදුරටත් කටයුතු කළ නොහැකි බවට මැති ඇමැතිවරු ජනාධිපතිවරයාට දැනුම් දී ඇත.
ඒකාබද්ධ විපක්ෂයේ ද සහයෝගය ඇතිව එක්සත් ජනතා නිදහස් සන්ධාන ආණ්ඩුවක් පිහිටුවීමට පසුගිය දින කිහිපය පුරා දිගින් දිගටම සාකච්ඡා පැවැත්වුණද ඒකාබද්ධ විපක්ෂය එම ආණ්ඩුවේ තනතුරු භාර නොගන්නා බවට දැඩි ස්ථාවරයක සිටියේය. එම ආණ්ඩුව සඳහා එක්සත් ජාතික පක්ෂයේද මන්ත්‍රීවරු පිරිසක් සහයෝගය දැක්වීමට එකඟතාව පළ කර තිබූ බව වාර්තා වේ.
COMMENTS