වර්ජනයේ නිරත දුම්රිය වෘත්තීය සමිති සහ ජනාධිපති ලේකම් ඔස්ටින් ප්‍රනාන්දු මහතා අතර අද පෙරවරුවේ ජනාධිපති ලේකම් කාර්යාලයේදී පැවැත්වීමට නියමිතය...
වර්ජනයේ නිරත දුම්රිය වෘත්තීය සමිති සහ ජනාධිපති ලේකම් ඔස්ටින් ප්‍රනාන්දු මහතා අතර අද පෙරවරුවේ ජනාධිපති ලේකම් කාර්යාලයේදී පැවැත්වීමට නියමිතය.
එම සාකච්ඡාවට වර්ජනයේ නිරත සියලු වෘත්තීය සමිති සහභාගී කරවන ලෙස ප්‍රවාහන හා සිවිල් ගුවන් සේවා අමාත්‍යංශයේ ලේකම්වරයාට දැනුම් දුන් බව ජනාධිපති ලේකම්වරයා සඳහන් කර ඇත.
ඊයේ දිනයේදී වර්ජනයේ නිරත දුම්රිය වෘත්තීය සමිති සහ ප්‍රවාහන අමාත්‍යංශ ලේකම්වරයා අතර සාකච්ඡාවක් පැවති නමුත් එය අසාර්ථක වූ බව දුම්රිය වෘත්තීය සමිති පවසයි.
මේ අතර ඊයේ සවස සාකච්ජාවක් පවත්වමින් දුම්රිය එන්ජින් රියදුරු සහයක සංගමය චෝදනා කලේ දේශපාලන පක්ෂයක අවශ්‍යතාවය මත මෙම දුම්රිය වර්ජනය ක්රියාත්මක වන බවයි.
දුම්රිය එන්ජින් රියදුරු සහයක සංගමයේ සභාපති ධනුෂ්ක පෙරේරා මහතා මෙසේ අදහස් දැක්වීය.
“මේක නීති විරෝධී වැඩ වර්ජනයක්. ඒ සංගමයට කිසිම අගතියක් අපගේ පටිපාටියෙන් සිදු වෙලා නැහැ. මේගොල්ලෝ මේ කියන්නේ සුදුසුකම් තියන මිනිස්සු ගන්න එපා. ඒ ගොල්ල්ලන්ට ඕනේ ආවතේවකම් කරන කොටසක් බදවා ගන්න කියලා තමයි මේ දුම්රිය රියදුරන් මේ දිගින් දිගටම වැඩ වර්ජන කරන්නේ.”
තාක්ෂණ හා මෙහෙයුම් සේවා සංගමයේ ප්‍රධාන ලේකම් චන්ද්‍රසේන බණ්ඩාර මහතා මෙසේ අදහස් දැක්වීය.
“තමන්ගේ පාදඩකරණය හා දේශපාලන වුවමනාවන් ඉෂ්ඨ කර ගන්න කරන්නා වූ මේ වැඩ වර්ජනය අපි බලවත් ලෙස හෙලා දකිනවා. මේ සංගමයේ නිලතල දරන දෙදෙනාම විකල්ප දේශපාලන පක්ෂ නියෝජනය කරන දෙන්නෙක්. දේශපාලන ඇජෙන්ඩාවක් මේ ක්රියාත්මක වෙන්නේ. ඒ නිසා අපි රජයට කියනවා දැන් හුරතල් කළා ඇති වහාම මේක අත්‍යවශ්‍ය සේවාවක් බවට පත් කරන්න”
එමෙන්ම දුම්රිය ස්ථානවලට පොලිස් ආරක්ෂාව යෙදවීමටද පියවර ගෙන ඇත.
දුම්රිය ධාවනය විධිමත්ව බාධාවකින් තොරව සිදු කිරීමට මෙන්ම සේවකයන්ගේ හා මගීන්ට අවශ්‍ය ආරක්ෂාව සැපයීමේ අරමුණින් මෙම පියවර ගෙන ඇත.
මේ සම්බන්ධයෙන් අවධානය යොමු කරන ලෙසට පොලිස්පතිවරයා සියලු ජේෂ්ඨ නියෝජ්‍ය පොලිස්පතිවරුන් සහ නියෝජ්‍ය පොලිස්පතිවරුන් ද දැනුවත් කර ඇත.
COMMENTS