එළැඹෙන පළාත් පාලන මැතිවරණයට පොදුජන පෙරමුණෙන් නාමයෝජනා ලබා දීමේ දී එහි ප‍්‍රබලයින් කිහිපදෙනෙකුගේ උවමනාව මත එම කටයුතු සිදු වී තිබේ. මේ නිස...
එළැඹෙන පළාත් පාලන මැතිවරණයට පොදුජන පෙරමුණෙන් නාමයෝජනා ලබා දීමේ දී එහි ප‍්‍රබලයින් කිහිපදෙනෙකුගේ උවමනාව මත එම කටයුතු සිදු වී තිබේ.
මේ නිසා එම පෙරමුණේ අභ්‍යන්තර ගැටුම් උග‍්‍ර වී ඇත. පොදුජන පෙරමුණේ ජාතික සංවිධායක බැසිල් රාජපක්ෂ ඇතුළු නාමල් රාජපක්ෂ, ජොන්ස්ටන් ප‍්‍රනාන්දු, කුමාර වෙල්ගම, ප‍්‍රසන්න රණතුංග ආදින්ගේ පෞද්ගලික හිතවතුන්ට නාමයෝජනා ලබා දීම නිසා මෙම අර්බුදයන් උග‍්‍ර වී ඇත.
හිටපු ජනාධිපති, කුරුණෑගල දිස්ත‍්‍රික් පාර්ලිමේන්තු මන්ත‍්‍රී මහින්ද රාජපක්ෂ මහතා පසුගිය මහ මැතිවරණයට එම දිස්ත‍්‍රික්කයෙන් ඉදිරිපත් වූ අවස්ථාවේ දී සහය පළ කළ පළාත් පාලන මන්ත‍්‍රීවරු කිහිපදෙනෙකුට ද මෙවර නාමයෝජනා ලබා දී නොමැත. ඒ අතර රාජපක්ෂ මහතා කුරුණෑගල දිස්ත‍්‍රික්කයේ මැතිවරණ ව්‍යාපාරයේ යෙදී සිටිය දී ආහාර ගත් හිටපු ප‍්‍රාදේශීය සභා මන්ත‍්‍රීවරුන් තිදෙනෙකුට ද නාම යෝජනා නොදීම සම්බන්ධයෙන් හිටපු ජනාධිපතිවරයාට පැමිණිලි ලැබී ඇත.
තමන් ඇතුළු පිරිසට නාමයෝජනා ලබා නොදුන්නේ අවස්ථාවාදී දේශපාලන කුමන්ත‍්‍රණකරුවන් වන කුමාර වෙල්ගම හා ලලිත් එල්ලාවල යන දෙදෙනා බව බණ්ඩාරගම ප‍්‍රාදේශීය සභා හිටපු සභාපති මනෝජ් සංජය මහතා පැවසුවේය.
මුල් අවස්ථාවේ දී පොදු ජන පෙරමුණෙන් නාමයෝජනා ලබා දෙන බවට බොරු පොරොන්දු ලබා දීම නිසා සමාජයට මුහුණ දීමට නොහැකි වීමෙන් අසහනයට සහ ආතතියට පත් කිහිප දෙනෙකු රෝගාතුරව රෝහල්ගතව ප‍්‍රතිකාර ලබාගෙන තිබේ.
පානදුර නගර සභාවට ඉදිරිපත් වීමට නාමයෝජනා ලබාදෙන බවට පොරොන්දු දී පසුව එම අවස්ථාව ලබා නොදීම නිසා ඇති වූ හදිසි හෘදයාබාධයකින් නිමල් අජන්ත විජේසේකර නමැති අය මිය ගියේය.
මේ අතර ගාල්ල අම්පෙගම කොට්ඨාශයට අපේක්ෂකත්වය ලබා දෙන බව සඳහන් කරමින් නාමයෝජනා ලේඛනයට නම ඇතුළත් කර පසුව නාමයෝජනා අත්සන් කිරීමට යාමේ දී තම නම ඉවත් කර තිබූ බව දර්ශන බාලසූරිය පැවසීය. මේ අතර කෝට්ටේ මහනගර සභාවට පොදුජන පෙරමුණේ තරග වැදීමට අපේක්ෂාවෙන් සිටි ජ්‍යෝතිර්වේදී විජිත් රෝහණ විජයමුණි මහතාට ද නාමයෝජනා ලැබී නොමැත. සිය මුහුණු පොතට විස්තරයක් එක් කරමින් පවසා ඇත්තේ තමන් බැසිල් රාජපක්ෂ මහතා හමුවී පොදු ජන පෙරමුණේ සාමාජිකත්වය ලබා ගත්තේ නාමයෝජනා ලබාදෙන පොරොන්දුවට පිට බවත් කෝට්ටේ හිටපු උප නගරාධිපති මධුර විතානගේ මහතාගේ උවමනාවට තම නම කපා දමා බැසිල් රාජපක්ෂ මහතා තමන් නොමඟ යැවූ බව පවසා ඇත.
මේ අතර නාමයෝජනා සැකසීමේ දී ඇති වූ දෝෂයන් නිසා වැඩිම පොදු ජන පෙරමුණේ නාමයෝජනා ගණනාවක් ප‍්‍රතික්ෂේප වූ අතර එම ප‍්‍රමාණය එකොළහකි.
මුල් වටයේ දී නාමයෝජනා කැඳවූ 93න් වැලිගම, මහරගම සහ පානදුර නගර සභා හා අගලවත්ත, බදුල්ල, මහියංගනය ප‍්‍රාදේශීය සභාවල නාමයෝජනා ප‍්‍රතික්ෂේප විය. 21 වන දින අවසන් වූ ආයතන 2478ක් සඳහා වූ නාමයෝජනාවලින් තිරප්පනේ, වලිකාමම් උතුර, වලිකාමම් දකුණ, ඩෙල්ෆ් යන ප‍්‍රාදේශීය සභා සහ යාපනය මහ නගර සභාව යන ආයතනවල නාම යෝජනා ප‍්‍රතික්ෂේප වී තිබේ.
COMMENTS