මහනුවර සිට හම්බන්තොට දක්වා ම ශීඝ්‍රයෙන් ගමන් කළ හැකි මාර්ග පද්ධතියක් ඉදිකිරීමට බලාපොරොත්තු වන බව අග්‍රාමාත්‍ය රනිල් වික්‍රමසිංහ මහතා පැවසී...
මහනුවර සිට හම්බන්තොට දක්වා ම ශීඝ්‍රයෙන් ගමන් කළ හැකි මාර්ග පද්ධතියක් ඉදිකිරීමට බලාපොරොත්තු වන බව අග්‍රාමාත්‍ය රනිල් වික්‍රමසිංහ මහතා පැවසීය.
රාජගිරිය ගුවන් පාලමේ ඉදිකිරීම් කටයුතු පිළිබඳව සොයා බැලීමේ නිරීක්‍ෂණ චාරිකාවට සහභාගි වීමෙන් අනතුරුව අග්‍රාමාත්‍යවරයා පසුගියදා (21) විශේෂ ප්‍රකාශයක් නිකුත් කරමින් පැවසීය.
එමෙන්ම කොළඹ නගරයේ සහ මහනුවර නගරයේ වාහන තදබදය අඩු කිරීමට බලාපොරොත්තු වන බවද පැවසීය.
රටේ ආර්ථික සංවර්ධනය සඳහා මාර්ග තදබදය විශාල ප්‍රශ්නයක් වී තිබෙන බැවින් ඊට විසඳුමක් ලෙස කෙටි කාලීන, මධ්‍ය කාලීන සහ දිගු කාලීන සැලසුම් අවශ්‍ය බව පෙන්වා දුන් අග්‍රාමාත්‍ය රනිල් වික්‍රමසිංහ මහතා, සෑම තැනම මාර්ග ඉදි කරනවා වෙනුවට යම් සැලැස්මක් අනුව මාර්ග ඉදිකිරීම රජයේ අරමුණ බව ද අවධාරණය කළේය.
අගමැතිවරයා මෙසේ අදහස් දැක්වීය.
“රටේ ආර්ථිකය දියුණු වීමේ දී මාර්ග පහසුකම් අත්‍යවශ්‍යයි. සෑම තැනම මාර්ග ඉදි කරනවා වෙනුවට යම් සැලැස්මක් අනුව මාර්ග ඉදිකිරීම අපේ අරමුණයි. මහනුවර සිට හම්බන්තොට දක්වා ම ශීඝ්‍රයෙන් ගමන් කළ හැකි මාර්ග පද්ධතියක් ඉදිකිරීම අපේ බලාපොරොත්තු වී තිබෙනවා. එමෙන්ම තවත් බලාපොරොත්තුවක් වන්නේ කොළඹ නගරයේ සහ මහනුවර නගරයේ වාහන තදබදය අඩු කිරීමයි. අපගේ නව මාර්ග ඉදිකිරීමේ වැඩසටහන නිසා එම නගරවල තදබදයන් බෙහෙවින් අඩුවේවි. මීට අමතරව සැහැල්ලු දුම්රිය යෙදවීම වැනි වැඩසටහන් ද ක්රියාත්මක කරනවා. මේ සියලුම දේ අපේ ආර්ථිකය ශක්තිමත් කිරීම සඳහා අත්‍යවශ්‍යයි. වාහන තදබදය නිසා ආර්ථිකයට වන හානිය අප හොඳින්ම අත්දැක තිබෙනවා. එමෙන්ම සමාජ ජීවිතයටත් විශාල කරදරයක් වී තිබෙනවා. එම සියලු කරුණු අවබෝධ කර ගෙන ක්‍රමානුකූල ව ඊට විසඳුම් සෙවිය යුතුයි. මාර්ග තදබදය වැඩි වූ විට බොහෝ දෙනෙක් දෝෂාරෝපණය කරන්නේ ආණ්ඩුවටයි. එම සාමාන්‍ය තත්ත්වයක්. එම නිසා මෙම තදබදයට විසඳුම් ලබා දීමට අප ක්‍රියා කරනවා. මෙම ගුවන් පාලම නිසා මේ ප්‍රදේශයේ වාහන තදබදයට විසඳුමක් ලැබේවි. "
COMMENTS