කැලණිය සරසවියෙන් නව සොයා ගැනීමක් - සර්ප විෂට ප්‍රතිවිෂ ඖෂධයක් සොයා ගනී

ඉදිරියේදී සර්ප දෂ්ඨනයට ප්‍රතිකාර කිරීමට මෙරටින් ප්‍රතිවිෂ ඖෂධයක් හඳුන්වා දීමට හැකියාව තිබෙන බව ජාතික පර්යේෂණ සභාවේ සභාපති, කැලණිය විශ්වවිද...

ඉදිරියේදී සර්ප දෂ්ඨනයට ප්‍රතිකාර කිරීමට මෙරටින් ප්‍රතිවිෂ ඖෂධයක් හඳුන්වා දීමට හැකියාව තිබෙන බව ජාතික පර්යේෂණ සභාවේ සභාපති, කැලණිය විශ්වවිද්‍යාලයේ වෛද්‍ය පීඨයේ මහාචාර්ය ජනක ද සිල්වා මහතා පවසයි.

ශ්‍රී ලංකාවේ සර්ප දෂ්ඨනය වසරකට 80,000 ක් වාර්තා වන බවත් ඉන් විෂ ශරීර ගතවීම 30,000ක් සිදු වන බවත් මෙය ප්‍රජා සෞඛ්‍යට මෙන්ම ආර්ථිකයට විශාල බලපෑමක් බවත් මහාචාර්යවරයා පෙන්වා දුන්නේය.

කැලණිය විශ්වවිද්‍යාලය මඟින් සිදු කළ පර්යේෂණ සම්බන්ධයෙන් ජනතාව දැනුවත් කිරීම සඳහා පෙරේදා (21) රජයේ ප්‍රවෘත්ති දෙපාර්තමේන්තුවේ පැවති මාධ්‍ය හමුවකදී ඔහු මේ බව සඳහන් කළේය.

එහිදී ඒ මහතා මෙසේ අදහස් දැක්වීය.

“ශ්‍රී ලංකාවේ සර්ප දෂ්ඨනය වසරකට 80,000ක් වාර්තා වෙනවා. ඉන් විෂ ශරීරගත වීම 30,000ක් වෙනවා. මරණයට පත් වන සංඛ්‍යාව 450ක් වසකරකට වාර්තා වෙනවා. මේ තත්ත්වය විශාල වශයෙන් ආර්ථිකයට බලපානවා. සර්ප විෂ සඳහා ප්‍රතිකාර සඳහා රුපියල් බිලියන 1.4ක් වාර්තා වෙනවා. බිලියන 1 ක් රෝහලේ වියදම්. මිලියන 600ක් වැය වන්නේ ප්‍රතිවිෂ ඖෂධ සඳහායි. ප්‍රතිවිෂ සඳහා විශාල මුදලක් වැය වෙනවා. ශ්‍රී ලංකාවේ සර්ප වර්ග 98ක් සිටිනවා. විෂ සහිත සර්ප වර්ග සිටින්නේ හතක් පමණයි. වියළි කලාපයේ විෂ ශරීරගත වීම ඉහළයි. ප්‍රතිවිෂ එකම ප්‍රතිකර්මයයි. ප්‍රතිවිෂ නිසා අතුරු ප්‍රතිඵල ඇති වෙනවා. එය අවම කර ගැනීමට අප පර්යේෂණයක් කර ඖෂධයක් සොයා ගත්තා. එය මිලි ලීටර් 0.025ක් අඩු සාන්ද්‍රණයෙන් ලබා දුන් විට අතුරු ආබාධ 50%කින් අඩු වෙනවා.”