රුසියානු තාක්ෂණික විශේෂඥයින් කණ්ඩායමක් ශ්‍රී ලංකාවේ සංචාරයක නිරත වීමට නියමිතය. ලබන ජනවාරි මාසයේ සිදුවන මෙම සංචාරයේ මූලික අරමුණ වන්නේ ශ්‍රී...
රුසියානු තාක්ෂණික විශේෂඥයින් කණ්ඩායමක් ශ්‍රී ලංකාවේ සංචාරයක නිරත වීමට නියමිතය. ලබන ජනවාරි මාසයේ සිදුවන මෙම සංචාරයේ මූලික අරමුණ වන්නේ ශ්‍රී ලංකාවේ තේ ආශ්‍රිතව සිදුවන නිරෝධායන කටයුතු පිළිබඳ නිරීක්ෂණය කිරීමටය.
ශ්‍රී ලංකාවේ තේ ආනයන තහනම තාවකාලිකව අත්හිටුවිමට තීරණය කිරීමත් සමඟ රුසියාව මෙම පියවර ගෙන ඇත.
රුසියානු තේ ඉල්ලුමෙන් සියයට 23ක් සපුරලන ශ්‍රී ලංකාවේ තේ ආනයනය පසුගියදා (18) තහනම් කිරීමට එරට පියවර ගනු ලැබුවේ තේ අසුරන ලද බහාලුමක කුරුමිණියකු සිටි බව පවසමින්ය.
කෙසේවෙතත් දෙපාර්ශවය අතර පැවති සාකච්ජාවල ප්‍රතිඵලයක් අනුව ලබන 30 වනදා සිට යළිත් ශ්‍රී ලංකාවෙන් තේ ආනයනය කිරීමට රුසියාව තීරණය කොට ඇත.
තේ සඳහා පනවා ඇති තහනම සම්බන්ධයෙන් සාකච්ජා කිරිමට මෙරට තාක්ෂණික කණ්ඩායමක් පසුගියදා රුසියාව බලා පිටත් විය. ඔවුන් රුසියානු මධ්‍යම රජයේ පශු සම්පත් සහ ශාක ආහාර සෞඛ්‍යය පිළිබඳ සේවාවේ නියෝජිතයන් සමඟ සාකච්ජා කළ බව මොස්කව් නුවර ශ්‍රී ලංකා තානාපති කාර්යාලය සඳහන් කළේය.
රුසියාව පෙන්වා දෙන්නේ ඉදිරියේදී විධිමත් ක්‍රියා පටිපාටියක නිරෝධායන ක්‍රියාවලියකින් පසු තේ අපනයනය කිරීමට සාකච්ජාවලදී ශ්‍රී ලංකාව එකඟ වූ බවයි. එම තීරණය පිළිබද තමන් සෑහීමකට පත් වූ බවද රුසියානු බලධාරීන් පෙන්වා දී ඇත.
මේ අතර රුසියාවෙන් මෙරටට ආනයනය කරනු ලබන ඇස්බැස්ටෝස් තහනම් කිරීමට තීරණය කර තිබූ නමුත් එය පසුගියදා තාවකාලිකව ඉවත් කෙරිණි.
මෙම කණ්ඩායම රුසියාවේ ඇස්බැස්ටෝස් නිෂ්පාදන කර්මාන්ත ශාලා සහ පර්යේෂණාගාර වෙත ගොස් ඒ පිළිබඳව සොයා බලා වාර්තාවක් ඉදිරිපත් කිරීමට නියමිත බව විද්‍යා, තාක්ෂණ හා පර්යේෂණ අමාත්‍ය සුසිල් ප්‍රේමජයන්ත මහතා පැවසීය.
COMMENTS