ඒ අනුව හේවාහැට මහා මාර්ග ප්‍රතිසංස්කරණය ඉදිරි මාස තුන තුල පමණ ආරම්භ කළ හැකි යැයි මාරස්සන, පස්ගම මහජනයා හමුවේ ජනාධිපතිවරයා සදහන් කළේය. පස...
ඒ අනුව හේවාහැට මහා මාර්ග ප්‍රතිසංස්කරණය ඉදිරි මාස තුන තුල පමණ ආරම්භ කළ හැකි යැයි මාරස්සන, පස්ගම මහජනයා හමුවේ ජනාධිපතිවරයා සදහන් කළේය.
පස්ගම රජ මහ විහාරයට හා පස්ගම ඓතිහාසික නාථ දේවාලයට පැමිණි ජනාධිපතිවරයා දේවාලයේදී විශේෂ ආගමික වතාවත් සදහා සහභාගී විය.
පස්ගම නාථ දේවාල පරිශයේ නව පහන් කණු විදුලි ආලෝකමත් කිරීමෙන් පසු මහජනයා සමග පිළිසදරේ නිරත වූ ජනාධිපතිවරයා වෙත ප්‍රදේශවාසීන් සිය ගැටලු ඉදිරිපත් කළෝය.
හේවාහැට ආසනයේ ගම්මාන රැසකට ජලය නොමැති බව කී ගම්වාසීන් ඇතැම් විට ජලය රැගෙන ඒම සදහා විශාල දුරක් පයින් ගමන් කිරීමට සිදුවන බව ද නළ ලිං ආදියෙන් ඉතා අසීරුවෙන් ජලය ලබා ගැනීමට සිදුවන බැව් ප්‍රකාශ කළෝය. හේවාහැට ආසනයේ ප්‍රධාන මාර්ග අබලන් තත්ත්වයේ පවතින බවත් ඒවා කාපට් යොදා සකස් කිරිම උචිත යැයි ගම්වාසීන් පෙන්වා දුන්හ.
රැකියා නොමැති තරුණ තරුණියන්ට රැකියා ලබාදීම සදහා කර්මාන්ත ශාලා දෙකක් ඉදිකර දෙන ලෙස ඔවුන් ඉල්ලා සිටියහ. ගමට වාරි ජලය ලැබෙන වැව් ගොඩවී ඇති බැවින් වැව් ප්‍රතිසංස්කරණය කොට කුඹුරු සදහා ජලය ලබාදීමට මැදිහත්වීම ලබා දෙන ලෙස ද ගම්වාසීන් ජනාධිපතිවරයාගෙන් ඉල්ලා සිටියෝය.
හේවාහැට ආසනයේ පසුගිය කාලය තුළ සංවර්ධන කටයුතු සිදු නොවුණු බව කී ජනාධිපතිවරයා ගම්වාසීන්ගේ මේ ඉල්ලීම් පිළිබදව සලකා බලන බව ප්‍රකාශ කළ අතර මේ සදහා මැදිහත්වන ලෙස අමාත්‍ය එස්.බී. දිසානායක මහතා හා මධ්‍යම පළාත් සභා මන්ත්‍රීනි ශාන්තිනී කෝන්ගහගේ මහත්මියට මෙහිදී දැනුම් දුන්නේය.
මෙම අවස්ථාව සදහා මහවැලි සංවර්ධන හා පරිසර නියෝජ්‍ය අමාත්‍ය නීතිඥ අනුරාධ ජයරත්න, මධ්‍යම පළාත් ප්‍රධාන අමාත්‍ය සරත් ඒකනායක, ඓතිහාසික පස්ගම නාථ දේවාලයේ බස්නායක නිලමේ දමින්ද බණ්ඩාර උඩුරාවණ මහතා ඇතුලු පිරිසක් එක්විය.
නදීක දයා බණ්ඩාර - මහනුවර
COMMENTS