කිරිමැටිය කසල කඳු නිසා ගැටලු රැසක්

යටිනුවර ප්‍රාදේශීය සභාව හා කඩුගන්නාව නගර සභාව විසින් කිරිමැටියේ තේ වත්තක අවසානයේ ඇති ඉඩමකට කැළි කසළ බැහැර කරන බවත් අක්‍රමවත් අයුරින් බැහැ...

යටිනුවර ප්‍රාදේශීය සභාව හා කඩුගන්නාව නගර සභාව විසින් කිරිමැටියේ තේ වත්තක අවසානයේ ඇති ඉඩමකට කැළි කසළ බැහැර කරන බවත් අක්‍රමවත් අයුරින් බැහැර කිරීම හේතුවෙන් මේ වන විට උග්‍ර පාරිසරික හානියක් උද්ගතවී ඇතැයි ඔවුන් සදහන් කරයි.

නගරයෙන් රැස් කරන කැළි කසල පිරවූ ට්‍රැක්ටර් හා ලොරිවලින් මෙහි කුණු බැහැර කරන නමුත් එම වාහන ආවරණය නොකිරීම නිසා සමස්ථ ප්‍රදේශයම දුර්ගන්ධ වන බවත් සෑම විටම සිය නිවෙස් මැස්සන්ගෙන් පිරී ඇතැයි ප්‍රදේශවාසීන් සඳහන් කරයි.

මේ හේතුවෙන් තමන්ට ආහාර සකස් කිරීමට හෝ නොහැකි වී ඇති අතර සිය දරුවන් නිරන්තරයෙන් අසනීප වන බව ගම්වාසීන් කීහ.

අක්කර පහක පමණ භූමියක කැළි කසල බැහැර කරන අතර මේ වන විට ආරක්ෂිත නිවාසවල නොව ඉන් බැහැරට කසල දමන බව ඔවුන් පෙන්වා දෙයි. මේ පිළිබදව තමන් කරන විමසීමේදී කැළි කසල අංගණයේ අලුත්වැඩියාවක් හේතුවෙන් දින කිහිපයකට පමණක් බාහිරව කැළි කසල බැහැර කිරීමට සිදුවන බව කම්කරුවන් කීවත් දැනට සති කිහිපයක් තිස්සේ මේ අයුරින් ම බාහිර පරිසරයේ කුණු බැහැර කිරීම දැකිය හැකි යැයි ගම්වාසීන් කීවෝය.

අධික දුර්ගන්ධය, මැසි උවදුර පමණක් නොව තමන් බීමට ගන්නා ජලයට ද මෙම කුණු එකතුවන බව ගම්වාසීන් සදහන් කළහ.

පොත්තපිටියේ උල්පත් ජල මූලාශවලින් ජනතාව සිය ජල අවශ්‍යතාව සපුරා ගන්නා අතර එම ජල පහර ගලා යන්නේ මෙම කැළි කසල අංගණය අසලිනි. එහි කම්කරුවන් සිය උපකරණ, ට්‍රැක්ටර් ද මෙහි දී සෝදන බවත් එම අපවිත්‍ර ජලය තමන්ගේ නිවසට ගලා එන බව ගම්වාසීන් සදහන් කරති.

ස්වාභාවික ජල මුලාශ දෙකක් මෙම ස්ථානය අසලින් ගලා යන අතර එකක් මැණික්පිහිල්ල නම් ස්ථානයෙන් පහළට ගලා යන අතර එය පවුල් පන්සියයක් පමණ සිය අවශ්‍යතා වෙනුවෙන් ලබා ගන්නා බව ගම්වාසීන් පෙන්වා දෙයි. අනෙක් ජල මූලාශය හතරලියද්ද පට්ටපොල ගම්මානය වෙත ගලා යන අතර එය පට්ටපොල, ඉහළගම, පහළගම ඇතුලුව පවුල් තුන්සියයකට අධික පිරිසක් සිය අවශ්‍යතා වෙනුවෙන් ලබා ගැනීම සිදුකරයි.

කැළි කසල අංගණයට නුදුරු මෙම ජලමූලාශ දෙකටම කැළි කසල යම් අයුරකින් එකතුවීමක් සිදුවන අතර මේ හේතුවෙන් තමන්ට උග්‍ර සෞඛ්‍ය ගැටලු මතුව ඇතැයි ඔවුන් පෙන්වා දෙයි.

වසර දහයක පමණ කාලයක සිට මෙහි කුණු බැහැර කිරීම සිදුවන අතර යටිනුවර, කඩුගන්නාව වැනි ප්‍රදේශවල කුණු එම පළාත් පාලන ආයතනයේ ඉඩමක නොව හතරලියද්ද ප්‍රදේශයට බැහැර කිරීම තමන්ට සිදුව ඇති බලවත් අසාධාරණයක් බව ද ගම්වාසීන් පෙන්වා දෙයි.

වසර ගණනාවක සිට බලධාරින්ට කොතෙක් දැනුම් දුන්න ද තමන්ට නිසි විසදුමක් නොලැබෙන්නේ නම් ඉදිරියේදී සමස්ථ ගම්වාසීන් එක්ව කුණු ලොරි පැමිණීමට විරෝධය පළ කරන බව ද ඔවුන් වැඩිදුරටත් සදහන් කළහ.

නුවර නදීක දයා බණ්ඩාර