කෙනඩි ඝාතනයේ රහස් ලිපිගොනු මුදා හැරේ.

දැනට ඇමරිකානු ලේඛනාරක්ෂණාගාරයේ තිබෙන මෙම ලිපිගොනු මුදාහැරීමට නියමිතව තිබෙන්නේ ඔක්තෝබර් 26 වැනිදාට ය. ඇමරිකානු ඉතිහාසයේ බිහිවූ ජනප්‍රියම...

දැනට ඇමරිකානු ලේඛනාරක්ෂණාගාරයේ තිබෙන මෙම ලිපිගොනු මුදාහැරීමට නියමිතව තිබෙන්නේ ඔක්තෝබර් 26 වැනිදාට ය.

ඇමරිකානු ඉතිහාසයේ බිහිවූ ජනප්‍රියම ජනාධිපතිවරයෙකු වූ ජෝන් එෆ් කෙනඩි ටෙක්සාස් ජනපදයේදී ඝාතනයට ලක්වූයේ 1963 නොවැම්බර් 22 වැනිදා ය. ජාතික ලේඛනාරක්ෂණාගාරය විසින් මෙම ඝාතනය සම්බන්ධ තොරතුරු හා ලේඛන රාශියක් දැනටමත් මුදාහැර ඇති නමුත් අවසන් ලිපිගොනු කිහිපය මේ දක්වා ඔවුන් මහජනයා වෙත ලබා දී නැත. කෙනඩි ඝාතන අබිහරස පිළිබඳ වැදගත් තොරතුරු රාශියක් මෙම ලිපිගොනුවල අඩංගු බවට සැක පළ කෙරේ.

ජාතික ආරක්ෂාවට තර්ජනයක් නොවන්නේ නම් කෙනඩි ඝාතනයට අදාළ සියලු තොරතුරු වසර 25 ක් ඇතුළත මුදාහැරිය යුතු බවට ඇමරිකානු කොංග්‍රසය තීරණය කළේ 1992 වසරේදී ය. මීට පෙර ප්‍රසිද්ධ නොකළ ලේඛන 3,000 ක් සහ සංස්කරණ සහිතව ලබාදී තිබූ ලේඛන 30,000 ක් පමණ මේ වන විට ඔවුන් භාරයේ පවතී. කෙසේ නමුත් එයින් කොපමණ ප්‍රමාණයක් සංස්කරණ රහිතව ලබාදීමට ට්‍රම්ප් අනුමැතිය දේ දැයි තවම පැහැදිලි නැත.

වොෂින්ටන් පෝස්ට් වැනි පුවත්පත්වලට අනුව කෙනඩි ඝාතනයේ වැදගත් තොරතුරු බොහොමයක් මේ වන විටත් මුදා හැර තිබේ. නමුත් කෙනඩිගේ ඝාතකයා වන ලී හාවි ඔස්වර්ල්” එම ඝාතනයට පෙර මාස කිහිපයේ මෙක්සිකෝ සිටි නගරයේ කළ කී දෑ මෙතෙක් හෙළි වී නැත. විශ්වාස කෙරෙන්නේ මෙම තොරතුරු අන්තර්ගත වන්නේ මුදා හැරීමට නියමිතව තිබෙන ලේඛනවල බව ය.

කෙනඩි ඝාතනයෙන් දින 2කට පසු රාත්‍රී සමාජ ශාලා හිමිකරුවෙකු වූ ජැක් රූබි විසින් ඝාතක ලී හාවි ඔස්වර්ල්ඩ්ව වෙඩි තබා මරා දැමුවේ ඔහු පොලිස් භාරයේ සිටියදී ය. කෙනඩි ඝාතනය තරමටම එම ඝාතනය ද ආන්දෝලනයට තුඩු දුන්නේ එනිසා ය.

- අමාලි ජයවීර