මවගෙන් පුතාට හෝ දියණියට එසේ නැත්නම් මාමණ්ඩිය හෝ නැන්දම්මාට එය උරුමකර දෙන ව්‍යාපාරයක් බවට වර්තමානයේදී පත් කර ගෙන ඇතැයි ඇය සදහන් කළාය. දේ...
මවගෙන් පුතාට හෝ දියණියට එසේ නැත්නම් මාමණ්ඩිය හෝ නැන්දම්මාට එය උරුමකර දෙන ව්‍යාපාරයක් බවට වර්තමානයේදී පත් කර ගෙන ඇතැයි ඇය සදහන් කළාය.
දේශපාලනික වශයෙන් බලයට පත්වන සියලු දෙනා රටේ වත්කම් හා සම්පත් හැකිතරම් සූරාකෑමට උත්සහ කරන බව ඊයේ ( සැප් 18) මහනුවර උඩරට කලා සංගම් ශාලාවේදී පැවැති උත්සවයකදී ඇය මේ බව සදහන් කළාය.
දිවංගත අමාත්‍ය හෙක්ටර් කොබ්බෑකඩුව මහතාගේ 34 වන ගුණසැමරුම නිමිත්තෙන් මහනුවර දිස්ත්‍රිකයේ ප්‍රතිලාභීන් 600කට සිය ඉඩම් සදහා ඔප්පු ප්‍රදානය කිරීම එහිදී සිදුවිය.
යහපාලනය යනුවෙන් අදහස් කරන රටක, පාලක පක්ෂය රට පාලනය කළ යුත්තේ රටේ අභිවෘද්ධිය සදහා යැයි කී හිටපු ජනාධිපතිනිය තව දුරටත් මෙසේ සදහන් කළාය.
රජ කාලයේ සිටම වසර දෙදහස් පන්සියයක කාලයක සිට රජවරු ජනතාව වෙනුවෙන් රජකම් කළා. ලංකාවේ ඒකාධිපති රජවරු සිටියේ නැහැ. ජනතාව සමග සමීපව, රටේ යහපත සදහා එම රජවරු කටයුතු කළා.
ප්‍රජාතන්ත්‍රවාදී ක්‍රමය යටතේ රජයක් බලයට පත් කරන්නේ ජනතාවයි. රජය බලයේ සිටින්නේ ජනතාවගේ අභිවෘද්ධිය උදෙසා කටයුතු කිරීමටයි. දේශයේ ආරක්ෂාව හා රටේ වත්කම් ආරක්ෂා කර ගැනීම සදහා රජයට පැහැදිලි දර්ශනයක් හා වැඩපිළිවෙලක් තිබිය යුතුයි. රට පාලනය කරන පාලකයා සිය සාක්කුව පුරවා ගැනීමට කටයුතු කළ යුතු නැහැ.
ජනතා සේවය යනු ජනතාව වෙනුවෙන් තමන්ගේ කාලය හා සියල්ල කැප කිරීමයි. නමුත් මම කියන්නේ නැහැ, සමහර දේශපාලඥයන් මෙන් සියලු දේ කැපකරන්න කියලා. වර්තමානයේදී එසේ කළොත් යළි සොරකම් කිරීමට ඔහුට සිදුවෙනවා.
තමන්ගේ දේපොල ආරක්ෂා කර ගනිමින්, ජනතාවගේ සම්පත් කොල්ල නොකා ජනතාව වෙනුවෙන් උපරිම සේවයක් කිරීමයි යහපාලනය යනුවෙන් අදහස් කරන්නේ. අවංකව මිනිස් නිදහස ආරක්ෂා කරන අතර ප්‍රජාතන්ත්‍රවාදය හා මිනිස් අයිතිවාසිකම් ආරක්ෂා කිරීම යහපාලන ආණ්ඩුවක් විසින් සිදු කළ යුතුව තිබෙනවා.
එවැනි පාලකයෙකු වශයෙන් දිවංගත හෙක්ටර් කොබ්බෑකඩුව මහතා හැදින්විය හැකියි. දේශපාලනයේදී ඔහු කිසිදු සම්පතක් උපයා ගැනීම කළේ නැහැ. අමාත්‍යධූරයෙන් ඉවත්වූ පසු එතුමා සිය ගම වන යටිනුවරට පැමිණියේ මගී ප්‍රවාහන බසයෙන්. අද එවැනි දේශපාලඥයන් මෙරට නැහැ. ඔහු සාමාන්‍ය මිනිසෙකු මෙන් ජීවත්වුණා.
මෙරට ජනතාව සදහා ඉඩම් සදහා අයිතියක් ලබාදීම සදහා දිවංගත හෙක්ටර් කොබ්බෑකඩුව මහතා විශාල කැපකිරීමක් කළ බව හිටපු ජනාධිපතිනි චන්ද්‍රිකා බණ්ඩාරනායක කුමරතුංග මහත්මිය වැඩිදුරටත් සදහන් කළාය.
ඉඩම් හා පාර්ලිමේන්තු ප්‍රතිසංස්කරණ අමාත්‍ය ගයන්ත කරුණාතිලක, මධ්‍යම පළාත් ආණ්ඩුකාර නිලූකා ඒකනායක, ප්‍රධාන අමාත්‍ය සරත් ඒකනායක මහතා ඇතුලු මහජන නියෝජිතයන් ද රාජ්‍ය නිලධාරීන් හා ඉඩම් ප්‍රතිලාභීන් රැසක් මේ අවස්ථාව සදහා එක්විය.
නදීක දයා බණ්ඩාර - මහනුවර
COMMENTS