දේශීය සම්පත් විදේශිකයන්ට විකිණීමට තමා විරුද්ධ වීම සාමූහිකත්වය කඩ කිරීමක්‌ යෑයි චෝදනා කරමින්, එක්‌සත් ජාතික පක්‍ෂය හැසිරුණේ මාළු කඩයකදී රණ...
දේශීය සම්පත් විදේශිකයන්ට විකිණීමට තමා විරුද්ධ වීම සාමූහිකත්වය කඩ කිරීමක්‌ යෑයි චෝදනා කරමින්, එක්‌සත් ජාතික පක්‍ෂය හැසිරුණේ මාළු කඩයකදී රණ්‌ඩුවන පිරිසක්‌ ලෙස බවත්, ඩී. එස්‌. සේනානායක මහතා ආරම්භ කළ එජාපය මෙයදැයි තමාට හැඟුණු බවත්, බුද්ධ ශාසන හා අධිකරණ ඇමැති විජයදාස රාජපක්‍ෂ මහතා අස්‌ගිරි පාර්ශ්වයේ මහානායක අති පූජ්‍ය වරකාගොඩ ඤණරතන ස්‌වාමීන් වහන්සේ වෙත පවසා සිටියේය.
ආණ්‌ඩුක්‍රම ව්‍යවස්‌ථාවේ විසිවන සංශෝධනයට පාර්ලිමේන්තුවේදී එකඟවීමට අමාත්‍ය මණ්‌ඩලය ඒකමතිකව තීරණය කොට පැය හතළිස්‌ අටක්‌ ගතවීමට මත්තෙන් ඊට විරුද්ධ විය යුතුයි කියා ශ්‍රී ලංකා නිදහස්‌ පක්‍ෂ මන්ත්‍රීවරුන් තීරණය කොට තිබෙන බවද සාමූහිකත්වය කඩ කිරීම යනු එවන් සිද්ධීන් බවත් අමාත්‍යවරයා මහ නායක හිමියන් හමුවේ ප්‍රකාශ කළේය.
දේශීය සම්පත් විදේශිකයන්ට බදු දීම හෝ විකිණීම අතර වෙනසක්‌ නැති බවත්, තමා නිරතුරුවම රට ගැන සිතා තීරණ ගන්නා බවත් හෙතෙම පැවැසීය.
අමාත්‍ය විජයදාස රාජපක්‍ෂ මහතා පෙරේදා (19 දා) මහනුවර මල්වතු අස්‌ගිරි මහානායක ස්‌වාමීන්වහන්සේලා බැහැදැකීමට පැමිණි අවස්‌ථාවේදී එසේ පැවසූ අමාත්‍යවරයා වැඩිදුරටත් මෙසේද කියා සිටියේය.
2003 දී, සබරගමුව බස්‌නාහිර ඇතුළු ලංකා ගමනාගමන මණ්‌ඩලය රුපියල් මිලියන 860 කට විකිණුවා. නමුත් මම දින ගණනාවක්‌ ශ්‍රේෂ්ඨාධිකරණය වෙත ගොස්‌ විශාල සටනක්‌ කරලා ලංගමය බේරාගත්තා. ඒ සඳහා රජයේ නීතිඥවරුන් සමඟ තර්ක කළේ අපේ රටට මේ සම්පත් බේරලා දෙන්න ඕනෑ නිසායි. නඩුවේදී මම කතා කළේ සල්ලි ගන්නේ නැතුව. ඒත් රජයේ නීතිඥවරු සල්ලිත් අරන් නඩුවට ඉදිරිපත් වුණේ.
එදා එජාපය රක්‍ෂණ සංස්‌ථාව රුපියල් 125 ක වටිනාකම තිබුණත් බිලියන 6 කට වික්‌කා. එය බේරගන්න මහින්ද රාජපක්‍ෂ මහතා විශාල වෙහෙසක්‌ ගත්තා. මා හට කිසිවකුගෙන් පළිගැනීමේ අවශ්‍යතාවයක්‌ නෑ.
COMMENTS