ශිකාර් ධවාන් සමග අභිනාව් මුකුන්ද් ඉන්දීය ඉනිම ආරම්භ කළ අතර අටවැනි පන්දුවාරයේදී මුකුන්ද් ක්රීඩාගාරයට හරවා යැවීමට නුවන් ප්රදීප් සමත් විය....
ශිකාර් ධවාන් සමග අභිනාව් මුකුන්ද් ඉන්දීය ඉනිම ආරම්භ කළ අතර අටවැනි පන්දුවාරයේදී මුකුන්ද් ක්රීඩාගාරයට හරවා යැවීමට නුවන් ප්රදීප් සමත් විය. ඒ වනවිට ඔහු ලබාගෙන සිටියේ ලකුණු 12 ක් පමණි. ඉන් පසු පිටියේ එක්වූ ධවාන් සහ චේටෙෂ්වර් පුජාරා දෙවැනි කඩුල්ලට ලකුණු 253 ක සබඳතාවයක් පිහිටුවීමට සමත් විය.
පුජාරා සිය අන්තය ආරක්ෂා කරගනිමින් පන්දුවට පහරදුන් අතර ධවාන් ශ්රී ලංකා පන්දු යවන්නන්ට බැට දෙමින් ලකුණු 190 ක් ලබාගැනීමට සමත් විය. ඒ සඳහා ඔහුට වැයවූයේ පන්දු 168 ක් පමණි. ඉන් පන්දු 31 ක් හතරේ සීමාව දක්වා හරවා යැවීමට ඔහු සමත් විය.
55 වැනි පන්දුවාරයේදී නැවතත් ක්රියාත්මක වූ නුවන් ප්රදීප් ශිකාර් ධවාන් දවාගැනීමට සමත් වූයේ ඔහුගේ කුළුඳුල් ද්විත්ව ශතකය පිළිබඳ බලාපොරොත්තු සුන් කරමිනි. ඊළඟ පන්දුවාරයේදී නැවත් ක්රියාත්මක වූ නුවන් ප්රදීප් නායක විරාට් කෝලි පිටියෙන් ඉවත් කළ අතර ඔහුට ලබාගැනීමට හැකිවූයේ ලකුණු 3 ක් පමණි.
දිනය අවසන් වනවිට නොදැවී කඩුල්ලේ රැඳී සිටින පුජාරා ලකුණු 144 ක් ලබාගෙන සිටින අතර කෝලිගේ දැවීයාමෙන් පසු පිටියට පිවිසි අජින්ක්යා රහනේ ලකුණු 39 ක් ලබාගෙන සිටී. ඔවුන් දෙදෙනා අතර සිව්වැනි කඩුල්ලේ සබඳතාවය ලකුණු 113 කි.
කවදත් දඟපන්දු යවන්නන්ට සහාය දෙන ගාලු තනතීරුව අද ශ්රී ලංකා දඟපන්දු යවන්නන්ට කිසිදු සහායක් නොදැක්වූ අතර නුවන් ප්රදීප් ප්රනාන්දු දැවීගිය කඩුලු 3 ටම හිමිකම් කියයි.
හෙට තරගයේ දෙවැනි දිනයයි.
COMMENTS