අද ජුලි 23 වැනිදාවක මෙම දසුන දකින්නට සිදුවීම ද තවත් ඉතිහාස කතාවක් වෙත අපව කැඳවාගෙන යයි. ඒ අප දන්නා මෑත ලාංකේය ඉතිහාසයේ නින්දිත ම අපරාධය ව...
අද ජුලි 23 වැනිදාවක මෙම දසුන දකින්නට සිදුවීම ද තවත් ඉතිහාස කතාවක් වෙත අපව කැඳවාගෙන යයි. ඒ අප දන්නා මෑත ලාංකේය ඉතිහාසයේ නින්දිත ම අපරාධය වූ කලු ජූලිය වෙතය. ඊනියා ජාතිආලයක් පෙරදැරි කරගනිමින් සිංහල ජාතිකයින් විසින් දහස් ගණනක් දෙමළ ජාතිකයින් කපා කොටා ගිනි තබා ඝාතනය කළ කුරිරු කලු ජූලිය ඇරඹුණේ 1983 ජුලි 23 වැනිදාය. එදා ඇවිළුණු ජාතිවාදී ගින්න එම ජූලිය පමණක් නොව දශක තුනක් පුරාවට ජනේරුවේ පටන් දෙසැම්බරය තෙක් මාස සිය ගණනින්, එකී මාස වල සහ ඊට පෙර උපන් ජීවිත ලක්ෂ ගණනින් කලු කරන්නට, අළු කරන්නට සමත් වීය. අදටත් අප සිටින්නේ ඉන් නැඟුණු දුම් රොටු අතරමැද ය.
යාපනය මහාධිකරණ විනිසුරුවරයා දණින් වැටී වැඳ සමාව ගන්නේ ඔහු සිතා මතා කළ වරදකට නොවේ. රාජකාරිය අතරතුර ඝාතනය කෙරුණු පොලිස් නිලධාරියා පිළිබඳව, එම පොලිස් නිලධාරියා ඔහුගේ දිවිය පිළිබඳව නොතකා තමන්ව ආරක්ෂා කිරීමට ක්රියා කිරීම පිළිබඳව හඬා වැටෙන අවංක හෘද සාක්ෂියකින් යුත් මිනිසෙක් ලෙස විනිසුරුවරයා සමාව යදී. අප අකැමැති වුවද යළිත් ජාති පදනමෙන් බෙදා ලියුවහොත් දෙමළ ජාතික මහාධිකරණ විනිසුරුවරයා සිංහල ජාතික පොලිස් නිලධාරියා පිළිබඳව හද පිරි ශෝකයෙන් සහ ඔහුගේ ජීවිත පරිත්යාගය පිළිබඳව ගෞරවයෙන් යුතුව සමාව යදී. එහෙත් 1983න් වසර 34කට පසුව ද අපට හමුවන්නේ තමන් දෙමළ ජනතාවට එරෙහිව කළ නින්දිත අපරාධය පිළිබඳව සමාව ගන්නවා තබා එය අපරාධයක් ලෙස හඟින්නට හෝ සූදානම් නොමැති බහුතර මානසිකවත්වයකින් යුතු සිංහල සමාජයකි. කොතරම් තිත්ත වුව ද ඇත්ත එයයි.
මොනතරම් ආලවට්ටම් දමා වසන්නට තැත් කළ ද මොන තරම් සුකුරුත්තම් දෙසට දෑත දික් කර කර නොදුටුවා සේ හිඳින්නට තැත් කළ ද අදටත් අපේ ලාංකේය සමාජය හසුරුවන අක්ෂය වන්නේ ජාතිවාදය යි. ජාතික සීමාවන් නොතකා මිනිසා තවත් එක් මිනිසෙකු ලෙසින් දකින්නට, හඟින්නට, පිළිගන්නට, ගරුකරන්නට අප ඉගෙන ගන්නා දිනය තෙක් සෑම දිනයක් ම කලු ජූලියේ දුම් වළාවන්ගෙන් අඳුරුවන බව අප දැනගත යුතුය. දෙමළාගේ ප්රශ්න වෙනුවෙන් සංවේදී වන එකා පවා හතුරෙකු ලෙස සලකන්නට පුරුදු වී ඇති සිංහල සමාජයක් ඉදිරියෙහි ඉලන්චේලියන් විනිසුරුවරයාගේ උතුරා ගලන මනුශ්යත්වයට මුසු වුණු කඳුළු උගන්වන පාඩම තේරුම් ගැනීමට අප කීයෙන් කීදෙනෙක් සූදානම්ද ? ප්රතිශතය බොහෝ සුළු වන්නට පුළුවන, එහෙත් අනාගතය පිළිබඳව අපට ඇති එක ම බලාපොරොත්තුව ද එයයි.
වීඩියෝව newsalertsrilanka ෆේස්බුක් පිටුවෙන් උපුටා ගන්නා ලදී.
COMMENTS