නාගරික සංවර්ධන අධිකාරිය 1978 පිහිටුවන අවස්ථාවේදී, ඒ පනතට අනුව පාර්ලිමේන්තුවෙන් ලබාදීලා තිබෙන බලතලවලින් ඔබ්බට කිසිදු බලයක් පාවිච්චි කරලා නැ...
නාගරික සංවර්ධන අධිකාරිය 1978 පිහිටුවන අවස්ථාවේදී, ඒ පනතට අනුව පාර්ලිමේන්තුවෙන් ලබාදීලා තිබෙන බලතලවලින් ඔබ්බට කිසිදු බලයක් පාවිච්චි කරලා නැතැයි මහානගර හා බස්නාහිර සංවර්ධන අමාත්‍ය පාඨලී චම්පික රණවක මහතා පවසයි.
ඔහු මේ බව පැවසූයේ අද (16) වෝටර්ස් ඒජ් හෝටලයේ විනෝදාස්වාද මධ්‍යස්ථානයක් ඉදිකිරීම් කටයුතු ආරම්භ කිරීමේ අවස්ථාවට එක් වෙමිනි.
එහිදී අමාත්‍යවරයා මෙසේද සඳහන් කළේය.
"මේ දවස්වල ඇතැමුන් විසින් වැරදි ආරංචියක් පතුරුවාගෙන යනවා නාගරික සංවර්ධන අධිකාරිය පළාත් සභාවල බලතල අරගෙන කියලා. එවැනි කිසිම දෙයක් සිද්ධ වෙලා නැහැ. නාගරික සංවර්ධන අධිකාරිය 1978 පිහිටුවන අවස්ථාවේදී, ඒ පනතට අනුව පාර්ලිමේන්තුවෙන් අපට ලබාදීලා තිබෙන බලතලවලින් ඔබ්බට කිසිම බලයක් අපි පාවිච්චි කරලා නැහැ"
එහිදී වැඩිදුරටත් අදහස් දැක්වූ අමාත්‍ය පාඨලී චම්පික රණවක මහතා, “අපට 1978 යම් බලයක් තිබුණද එසේම 2016 යම් බලයක් තිබුණද ඒ බලය මිස කාගෙවත් බලයක් අපි පාවිච්චි කරන්නේ නැහැ. මුළු රටේම සියළුම ගොඩනැගිලි සැලසුම් කිරීම් ආදියේ බලය තිබෙන්නේ නාගරික සංවර්ධන අධිකාරියටයි. එය පාර්ලිමේන්තුවෙන් වෙනස් වෙනකම්ම එම බලය තිබෙන්නේ නාගරික සංවර්ධන අධිකාරියටයි. පළාත් සභාවලට එහි කිසිම සම්බන්ධයක් නැහැ. පලාත් සභා එන්න බොහොම කලින් නාගරික සංවර්ධන අධිකාරි පනත සම්මත උනේ. ඒ වගේම සෑම පළාත් පාලන ආයතනයකම කමිටුවක් තිබෙනවා, ඒ කමිටුවට 1985 අග‍්‍රාමාත්‍ය රණසිංහ පේ‍්‍රමදාස මැතිතුමා චක‍්‍රලේඛයක් මගින් යම් යම් පරිපාලනයක් ලබාදුන්නා. පාරිපාලනය ලබාදීමයි බලය ලබාදීම් අතර ලොකු වෙනසක් තිබෙනවා. බලය තවමත් තිබෙන්නේ නාගරික සංවර්ධන අධිකාරියට. පරිපාලනය පළාත් පාලන ආයතනවල කොමිටියකට ලබාදුන්නා. ඒ කොමිටියේ නාගරික සංවර්ධන අධිකාරියේ නිලධාරීනුත් ඉන්නවා. නමුත් අපි පසුගිය අයවැය විවාදයේදී පාර්ලිමේන්තුවේදී ආචාර්ය හර්ෂ ද සිල්වා මැතිතුමා යෝජනාවක් ගෙනාවා, විශාල වශයෙන් නීති විරෝධි ගොඩනැගිලි ඉදිවෙනවා. ඒ සඳහා අදාල නගර සභාවන් කි‍්‍රයාකරන්නේ නැහැ, ඒ නිසා මේ ගැන කටයුතු කරන්න කියලා. ඒක පර්ලිමේන්තුවේ අනුමත උනා. ඒ අනුව අපි තාවකාලිකව මුළු රට පුරාම සංගණනයක් කරගෙන යනවා, පළාත් පලන ආයතනවල අපේ අවසරයට පිටතින් ඉදිකරලා තිබෙන ගොඩනැගිලි මොනවද කියලා. ඒ අනුව අපට වාර්තා වෙලා තියෙනවා කොළඹ නගරයේ පමණක් එවැනි ඉදිකිරීම් 1800 ක් පමණ තිබෙන බව. මෙය ප‍්‍රවණතාවයක් විදිහට ඉදිරියට ගියොත් ප‍්‍රවාහණය, මාර්ග තදබදය ඇතුළු ගැටළු ගණනාවකට මුහුණ දෙන්න වෙනවා. මේ සෑම තැනකම තට්ටු 5 කට අවසර අරං තට්ටු 10 ක් හදනවා. ඒවාට නඩු දැම්මහම නඩු විසඳන්න අවුරුදු 20 ක් පමණ යනවා. මෙන්න මේ විදිහේ ගැටළුවලට මුහුණ දීලා තියෙනවා. ඒ නිසා එම ප‍්‍රශ්න විසඳන්න අපි ඉදිරි හය මාසය ඇතුළත කි‍්‍රයා කරනවා.“
“කාගෙවත් බලතලයක් අප අරගෙනත් නැහැ. අපේ බලය අපි පරිපාලනමය වශයෙන් පරිහරණය කලා පමණයි. ඒ පරිපාලනමය වශයෙන් පරිහරණය කළ බලයෙන් 01% ක් පමණ මේ සංගණනය පවත්වාගෙන යාමත්, විධිමත්ව, සැලසුම් අවසන් කිරීමටත් අප ලබාගෙන තිබෙනවා. ජුනි මාසයේ අවසානයේදී ඒ පිළිබඳව අපි නිවැරදිව කටයුතු කරනවා. මේ ගැන පළාත් සභා අමාත්‍යවරයාටත් දැනුම් දී තිබෙනවා. ඒ ඇරෙන්න අපේ බලය පාර්ලිමේන්තුවේ තිබෙන්නේ. පළාත් සභාව සම්බන්ධයෙන් කවර ප‍්‍රඥප්තියක් ගෙනාවත් ඒක පාර්ලිමේන්තුවේ සම්මත විය යුතුයි. අපේ පනත අනුව පාර්ලිමේන්තුවට පමණයි අප වගකියන්නේ ඒ අනුව අප කටයුතු කරනවා. ඒ නිසා වැරදි තොරතුරු වැරදි ආරංචි පතුරුවලා පළාත් සභාවයි නාගරික සංවර්ධන අධිකාරියයි ගැටුමක් තියෙනවා කියලා තොරතුරු පළ කරන්න එපා. පළාත් සභාවට මෙතන කිසිම සම්බන්ධයක් නැහැ. නාගරික සංවර්ධන අධිකාරිය තමන්ගේ පනතට පිටතින් කිසිම බලයක් පාවිච්චි කර නැහැ. අපේ පනතේ ලැබී තිබෙන බලතල අනුව නීති විරොධි ස්ථාන හඳුනාගෙන අදාල බලධාරීන් සමග ලබන ජූනි මාසෙන් පසුව දැඩි පියවර ගැනීම් කරනවා. දැනට හඳුනාගත් ඒවට නඩු පැවරීම් කරනවා.“ යැයිද අමාත්‍යවරයා වැඩිදුරටත් පැවසී ය.
COMMENTS