අධිකරණ ක්ෂේත‍්‍රයට අදාළ පත්කිරීම් සිදු කිරීමේදී කිසිදු අවස්ථාවක තම පුද්ගලික අභිමතය පරිදි තනි තීන්දු ගෙන නොමැති බව ජනාධිපති මෛතී‍්‍රපාල සිර...
අධිකරණ ක්ෂේත‍්‍රයට අදාළ පත්කිරීම් සිදු කිරීමේදී කිසිදු අවස්ථාවක තම පුද්ගලික අභිමතය පරිදි තනි තීන්දු ගෙන නොමැති බව ජනාධිපති මෛතී‍්‍රපාල සිරිසේන මහතා පවසයි.
පසුගියදා අන්තර්ජාලය ඇතුළු මාධ්‍ය මගින් මෙන්ම අධිකරණ ක්ෂේත‍්‍රයේ ඇතැම් ආයතන චෝදනා එල්ල කළ මහාධිකරණ විනිශ්චයකාර පත්වීම සිදුකරන ලද්දේ ශී‍්‍ර ලංකා නීතිඥ සංගමයේ ඉල්ලීම අනුව බව ජනාධිපතිවරයා ප්රකාශ කළේය.
එමෙන්ම අදාළ පත්කිරීම සිදු කරන ලද්දේ අධිකරණ ක්ෂේත‍්‍රයේ ප‍්‍රධාන ආයතවල නිරික්ෂණයට ඉදිරිපත්කොට අනුමැතිය හිමිවීමෙන් පසුව බව ද පැවසු ජනාධිපතිවරයා අධිකරණ ක්ෂේත‍්‍රයේ කටයුතු ඉතාමත් පිරිසිදුව, විනිවිදභාවයෙන් යුතුව ඉටුවිය යුතුය යන්න එදත්, අදත්, හෙටත් තම ස්ථාවරය බව ද කියා සිටියේය.
හෙතෙම මේ බව ප්රකාශ කළේ ඊයේ (15) පස්වරුවේ කොළඹ ගාලු මුවදොර හෝටලයේ පැවති 2017 ජාතික නීති සම්මේලනයේ සමාරම්භක උත්සවය අමතමිනි.
සමාජය තුළ ඉතා විවෘතව කටයුතු කළ අයෙකු ලෙස සහ 19 වන ව්‍යවස්ථා සංශෝධනය හරහා ජනාධිපති ධූරයේ බලතලවලින් කොටසක් පාර්ලිමේන්තුවට සහ අනෙකුත් ස්වාධීන ආයතනවලට පවරාදුන් ජනාධිපතිවරයෙකු ලෙස දැනට ඉතිරිව තිබෙන බලතල භාවිතා කිරීමේදී ද කිසිදු අවස්ථාවක තනී තීරණවලට එළැඹීමට සුදානම් නොමැති බව අවධාරණය කළ ජනාධිපතිවරයා සියලු ක්ෂේත‍්‍රවල තීන්දු තීරණ ගැනීමේදී එම ක්ෂේත‍්‍රවල සිටින විශේෂඥයින් මෙන්ම උගතුන් සහ බුද්ධිමතුන් සමග සාකච්ඡා කරන බව ද ප්රකාශ කළේය.
අධිකරණ පද්ධතිය තුළින් මහජනතාව අපේක්ෂා කරන අරමුණු ඉටු කිරීමේදී බොහෝ දේ සංවාදයට පමණක් සීමාවී තිබෙන අතර ඒ සඳහා නිසි විසඳුම් ලැබී නොමැති බව මෙහිදී සඳහන් කළ ජනාධිපතිවරයා නඩු කටයුතු ප‍්‍රමාදවීම් වැනි මෙම ගැටලු විසඳාගැනීමට ක්ෂේත‍්‍රයේ සියලුදෙනා සාමුහිකව තම වගකීම් ඉටුකළයුතු බව ද ප්රකාශ කළේය.
අධිකරණයට දේශපාලන පත්වීමක්
කෙසේ වෙතත් පුංචි බොරැල්ල වජිරාශ්‍රම බෞද්ධ මධ්‍යස්‌ථානයේදී පෙරේදා (14) පැවැති ඒකාබද්ධ විපක්‍ෂ ආර්ථික පර්යේෂණ ඒකකයේ මාධ්‍ය හමුවේදී ශ්‍රී ලංකා පොදුජන පෙරමුණේ සභාපති ජී. එල්. පීරිස්‌ මහතා පැවසූයේ අධිකරණ ඇමැතිවරයාගේ විරුද්ධත්වය නොතකා දේශපාලන පක්‍ෂයක අවශ්‍යතාව මත මඩකලපුව ප්‍රදේශයේ පෞද්ගලික නීතිඥ සේවයේ යෙදී සිටි නීතිඥවරයකු මහාධිකරණ විනිසුරුවකු ලෙස පත්කර ඇති බවයි.
ආණ්‌ඩුක්‍රම ව්‍යවස්‌ථාව හා සදාචාරයට පටහැනිව මෙවැනි පත්කිරීමක්‌ සිදුවූයේ කෙසේද යන්න දිසා විනිසුරුවන් හා මහෙස්‌ත්‍රාත්වරුන් නිල වශයෙන් නියෝජනය කරන අධිකරණ සේවා සංගමය අගවිනිසුරුවරයා හමුවී සාකච්ඡා කර තිබෙන බවත් කිසිදු අවස්ථාවක නීතිඥ සංගමය මෙවැනි ඉල්ලීමක්‌ කර නැති බවත් එම සංගමය ප්රකාශ කර ඇතැයි ඔහු එහිදී පෙන්වා දෙයි.
එබැවින් මෙම මහාධිකරණ විනිසුරුවරයා පත්කිරීමට මැදිහත් වී ඇති දේශපාලන පක්‍ෂය කුමක්‌ද යන්න රටට හෙළිදරව් කිරීම අධිකරණ ඇමැතිවරයාගේ යුතුකම බවත් පැවසූ ජී. එල්. පීරිස්‌ මහතා මෙය රහසක්‌ ලෙස තවදුරටත් තබාගැනීමට නොහැකි බවත් එය හෙළිදරව් කිරීම ඉතාම වැදගත් බවත් පැවසී ය.
මෙම දේශපාලන පත්වීම පිළිබඳව නීතිපතිවරයා කර තිබෙන නිර්දේශය කුමක්‌ද යන්න හා එම පත්වීම අනුමත කළාද යන්න පිළිබඳව ද රටට අනාවරණය කිරීමත් නීතිපතිවරයාගේ වගකීමක්‌ බවත් ඔහු සඳහන් කළේය.
COMMENTS