කිසිදු කාරණයක් පිළිබඳ අවසාන තීන්දුවක් ගෙන නොමැති බවත් කිසිදු කෙටුම්පතක් සකසා නොමැති බවත් පාර්ලිමේන්තු මන්ත්‍රී ආචාර්ය ජයම්පති වික්‍රමරත්න ...
කිසිදු කාරණයක් පිළිබඳ අවසාන තීන්දුවක් ගෙන නොමැති බවත් කිසිදු කෙටුම්පතක් සකසා නොමැති බවත් පාර්ලිමේන්තු මන්ත්‍රී ආචාර්ය ජයම්පති වික්‍රමරත්න මහතා පවසයි.
ඔහු මේ බව පැවසූයේ ඊයේ(10) පැවති මාධ්‍ය හමුවකදී ය.
යෝජිත ආණ්ඩුක්‍රම ව්‍යවස්ථාවේ කිසිදු වගන්තියක්වත් කෙටුම්පත් කර නොමැති බව ජයම්පති වික්‍රමරත්න මහතා පැවසී ය.
එම බලතල බෙදුම්වාදී කටයුතු සඳහා භාවිත කරන්නේ නම් ඕනෑම මොහොතක පාලනය කිරීමේ හැකියාව මධ්‍යම ආණ්ඩුව පවත්වාගත යුතු බවද හෙතෙම සඳහන් කළේය.
පළාත් සභාවලට පමණක් නොව පළාත් පාලන ආයතන දක්වාද නව ආණ්ඩුක්‍රම ව්‍යවස්ථාවක් මගින් බලතල ලබාදිය යුතු බව ද ඔහු කියා සිටියේය.
එමෙන්ම ශ්‍රී ලංකාව අන්‍යාගමික රාජ්‍යක් ලෙස පිළිගන්නා අතරම ඓතිහාසික හේතු මත යම් ආගමක් සම්බන්ධයෙන් පවතින ව්‍යවස්ථාවේ දක්වා ඇති ප්‍රතිපාදන වෙනසකින් තොරව පවත්වාගෙන යා යුතු බව ද ජයම්පති වික්‍රමරත්න මහතා පැවසී ය.
රටට නව ව්‍යවස්ථාවක් සම්පාදනය කරගැනීමට උතුරේ පක්ෂ මෙන්ම දකු‍ණේ පක්ෂද නම්‍යශීලීව කටයුතු කළ යුතු යැයි සියලු පක්ෂ එක්ව ව්‍යවස්ථා සම්පාදනය කරන බැවින් තමන් කැමති හොඳම ව්‍යවස්ථාව නිර්මාණය කරගැනීමට කිසිවෙකුට අවස්ථාව නොලැබෙන බවත්, ඒ හරහා රටට හොඳ ව්‍යවස්ථාවක් සම්පාදනය කරගැනීමේ අවස්ථාව ලැබෙන බවත් හෙතෙම පෙන්වා දුන්නේය.
මේ අතර යෝජිත ව්‍යවස්ථාව නව ව්‍යවස්ථාවක් ද නැතහොත් ව්‍යවස්ථා සංශෝධනයක් ද යන්න අනාවරණය කළ යුතු බව සමාජවාදී ජනතා පෙරමුණේ ප්‍රධාන ලේකම් රාජා කොල්ලුරේ මහතා ඊයේ පැවැති මධ්‍ය හමුවකදී ප්‍රකාශ කර තිබේ.
COMMENTS