මට්ටක්කුලිය ඝාතන සැකකරුවන් රඳවාගෙන ප්‍රශ්න කිරීමට අවසර

මට්ටක්කුලිය සිව්පුද්ගල ඝාතනයේ සැකකරුවන් 11දෙනා ලබන 31 වැනිදා තෙක් පොලිස් බාරයේ රඳවා‍ තබාගෙන ප්‍රශ්න කිරීමට කොළඹ අතිරේක මහේස්ත්‍රාත් චන්දන ...

මට්ටක්කුලිය සිව්පුද්ගල ඝාතනයේ සැකකරුවන් 11දෙනා ලබන 31 වැනිදා තෙක් පොලිස් බාරයේ රඳවා‍ තබාගෙන ප්‍රශ්න කිරීමට කොළඹ අතිරේක මහේස්ත්‍රාත් චන්දන කලංසූරිය මහතා අද (27) අවසර ලබාදී තිබේ.

කොළඹ අපරාධ කොට්ඨාසය විසින් අද දින මේ පිළිබඳව අධිකරණයට කරුණු වාර්තා කිරීමෙන් පසු සිද්ධිය සම්බන්ධයෙන් තවදුරටත් කරුණු රැසක් අනාවරණය කර ගැනීමට අවශ්‍ය නිසා සැකකරුවන් පොලිස් බාරයේ රඳවා තබාගෙන ප්‍රශ්න කිරීමට මහේස්ත්‍රාත්වරයා අවසර ලබා දී ඇත.

පසුගිය 23 වෙනිදා රාත්‍රියේ මට්ටක්කුලිය, සමිත්පුර ප්‍රදේශයේදී සිදුවූ වෙඩි තැබීමකින් පුද්ගලයින් සිව්දෙනෙකු මියගොස් තවත් තිදෙනෙකු බරපතළ තුවාල ලැබීය.

සිද්ධීයේ ප්‍රධාන සැකකරු ලෙස හඳුනාගත් කුඩු රොෂාන් නමැති පාතාල කල්ලි සාමාජිකයා ඇතුළු සැකකරුවන් 11 දෙනෙකු රත්නපුර, වේවැල්වත්ත ප්‍රදේශයේ දී සහ කඩවත, සුබෝධා මාවත ප්‍රදේශයේ දී කොළඹ අපරාධ කොට්ඨාසය විසින් පෙරේදා (25) දිනයේදී අත්අඩංගුවට ගැනුණි.