හමුදාව කළ විසිරවීමේ ප්‍රහාරයේදී 2013 රතුපස්වල ජලය ඉල්ලූවන්ගේ මරණ ඝාතන ලෙස ප්‍රකාශයට පත්වේ සිද්ධියෙන් පැත්තක සිටි තිදෙනකු මියගිය හැටි...
හමුදාව කළ විසිරවීමේ ප්‍රහාරයේදී
2013 රතුපස්වල ජලය ඉල්ලූවන්ගේ මරණ
ඝාතන ලෙස ප්‍රකාශයට පත්වේ
සිද්ධියෙන් පැත්තක සිටි තිදෙනකු මියගිය හැටි
2013 දී වැලිවේරිය රතුපස්වලදී පිරිසිඳු ජලය ඉල්ලා උද්ඝෝෂණය කළවුන් හමුදාව යොදවා වෙඩිතබා විසුරුවා හැරීමේදී සිදුවූ අමානුෂික ඝාතන මේ දක්වා ‘ඝාතන‘ වශයෙන් නම් කර තිබුනේ නැත. ඒනිසාම ඒ ගැන අපරාධ පරීක්ෂණ සිදුවූයේ නැත. නමුත් අද ගම්පහ අධිකරණයේදී ඒවා ඝාතන ලෙස නම් කර පරීක්ෂණ පවත්වා වරදකරුවන් අත්අඩංගුවට ගන්නා ලෙස දන්වා තිබෙනවා.
කර්මාන්ත ශාලාවකින් ජලය අපවිත්‍රවීමේ ගැටලුව මත පිරිසිඳු ජලය ඉල්ලූ උද්ඝෝෂකයින් පාර අවහිරවන ලෙස සිටීමෙන් දැඩි මාර්ග අවහිරතා ඇතිවූ මොහොතක ඉහළින් ආ නියෝග මත හමුදාව විසින් වැලිවේරිය නගරයේදී එදා වෙඩි ප්‍රහාර එල්ල කර තිබුණ අතර
එයින් අහිංසකයින් තිදෙනෙකු මියගියා.
වැලිවේරිය ප‍්‍රදේශයේ පදිංචිකරුවන් වු අකිල දිනේෂ් (17)හා රවිශාන් පෙරේරා (19)යන සිසුන් දෙදෙනාද ගම්පොළ පදිංචි නිලන්ත පුෂ්පකුමාර (29) නමැත්තාද එයින් මියගියා.
මියගිය අය මෙම උද්ඝෝෂණයට වක්‍රව හෝ සම්බන්ධ නොවූ අයවීම ඛේදවාචකයක් විය.
වෙඩි වැදී මරණයට පත්වූයේ යක්කල චන්ද්‍රජෝති විද්‍යාලයේ 12 වසර ඉගෙනුම ලබමින් සිටි අකිල දිනේශ් සිද්ධියවූ දවසේ මව රැකියාව නිමවී නිවසට ඒම ප‍්‍රමාදවීම නිසා එදා කලබල මැද්දේ මව කැටුව ඒමට නගරයට යාමකදී මෙම වෙඩි පහරට ලක්වූවෙකි.
මව සොයන්නට ඔහු නගරයට ගියත් රාත‍්‍රී 7 - 8 වනතුරුත් ඔහුට මව සොයාගන්නට බැරිව ගොස් තිබෙන අතර කලබලය මැද්දේ රාත‍්‍රී 8.15 ට පමණ ගැටුම උණුසුම් ස්වරූපයකට පත්ව වෙඩි තැබීම් අතරින් පළායන්නට ඔහුට සිදුව ඇත. අනපේක්ෂිත
සිද්ධියෙන් මියගිය දෙවැනියා රවිශාන් පෙරේරා (19) උඩුගම්‍පොළ ශාන්ත පීතර විදුහ‍ලේ උසස් පෙළ කලා අංශයේ ශිෂ්‍යයකු වූ අතර සංගීතයට යොමුවී කල්ගත කරන නිහඩ සිසුවෙකුවූ ඔහු මෙම උද්ඝෝෂණය නරඹන්න ගොස් අනපේක්ෂිත වෙඩි වැදීමකින් මරු දුටු අයෙකි.
ඔහුගේ මිතුරන් ඒ දිනවල මෙසේ කියා තිබුණි.
‘රවිශාන් කවදාවත් රණ්ඩු සරුවල් අඬදබරවලට යන කෙනෙක් නෙවෙයි. ඔහු පාසල් වැඩවලටත් දක්ෂ ළමයෙක්. හොඳ සංගීත ශිල්පියෙක්. ගෙදර පාඩම් කර කර ඉන්න කොට වැලිවේරියේ කලබලයක් කියලා ආරංචි වෙලා වැලිවේරිය නගරයට ඇවිත් තියෙනවා. පන්ති යන්නත් බලාගෙනම තමයි ඇවිත් තියෙන්නේ. කලබ‍ලේ දැකලා වෙඩි සද්දේ ඇහිලා බයවෙලා ආපසු අතුරු පාරකින් ගෙදරට දුවලා තියෙනවා. ඒ දුවද්දී තමයි අහිංසක රවිශාන්ට වෙඩි වැදිලා තියෙන්නේ ‘
මෙම සිද්ධියෙන් මියගිය නිලන්ත පුෂ්පකුමාරගේ 29 වියැති එක්දරු මවක වන බිරිය කොළඹ අපරාධ කොට්ඨාසයට මෙසේ කියා තිබුනි.
‘මගේ පුරුෂයා බියගම ස්ටොම් ලයින් නමැති ආයතනයේ වැඩ කළා. ඔහු වැලිවේරිය වැලිපැන්නේ බෝඞ්වෙලා හිටියේ. පහුගිය 1 වැනිදා රාත‍්‍රියේ ඔහු රාත‍්‍රී සේවයට යන අතර රාත‍්‍රී 8.10ට විතර කතා කළා. වැලිවේරියේ වතුර සම්බන්ධයෙන් උද්ඝෝෂණයක් තියෙනවා. ඒකට ටයර් පුච්චනවා. කඳුළු ගෑස් ගහනවා. ඒ නිසා යන්න තැනැක් නැති නිසා පල්ලිය ඇතුළට යනවා කියා කීවා 7.35ට පමණ තවම උද්ඝෝෂණය තියෙනවා, වෙඩි තියෙනවා, කඳුළුගෑස් ගහනවා., අපිට යන්න විදිහක් නැහැ ගොඩාක් අය මෙතැන ඉන්නවා කියා කීවා.
රාත‍්‍රී 8.45ට සිට දුරකථනය වැඩ කළේ නෑ. පසුදා බෝඩිමේ අක්කාට කතා කළ විට නිලන්ත බෝඩිමේ නැහැ කියා කීවා. මා වැලිවේරිය පොලිසියට ගියා. එහිදී දැනගත්තා මගේ සැමියා කොළඹ ජාතික රෝහලට ඇතුළත් කරලා කියලා.04 වැනිදා මගේ පුරුෂයා නැතිවුණා පුරුෂයාට මොට්ට ආයුධයකින් පහරදීම නිසා ඔහු මිය ගොස් කියා මරණ පරීක්ෂකවරයා කීවා. ඔහුට ඇත්තටම සිදුවුණේ කුමක්ද කියා කියන්න මා දන්නේ නැහැ.‘
අදාළ මහේස්ත්රාත් පරීක්ෂණයේදී සාක්කි දුන් ජූඞ් නිශාන්ත පෙරේරා මෙසේ කියා තිබුණි.
‘යුද හමුදාවේ බි‍්‍රගේඩියර් දේශප‍්‍රිය ගුණවර්ධන කියා කෙනෙකු ඇවිත් පාරෙන් අයින් වෙන්න කියා මිනිසුන්ට කීවා. අපිට විනාඩි 10ක් දෙන්න අපි පාරෙන් ඉවත් වෙන්නම් කියා මිනිසුන් කියන විට විනාඩි 10ක් දෙන්නේ නැහැ. දැන්ම අයින්වෙයව්.. මුන්ට ගහපියව්..” කියා කීවා. එවිට හමුදාවේ අයත් සිවිල් ඇඳුම් ඇඳගත් හමුදාවේ අයත් පොලූවලින් අපට පහර දෙන්න ගත්තා.
හමුදාවේ පිරිස එලෙස පහර දෙද්දී තවත් හමුදා භටයන් පිරිසක් වයර්වලට හා ලයිට්වලට වෙඩි තිබ්බා. හමුදා පහරදීම්වලින් බේරෙන්න සමහරු වැලිවේරිය පල්ලිය තුළට ගියා .ඒ ඇතුළටත් වෙඩි තිබ්බා‘
මෙම ගැටුමට හමුදාව මැදිහත්වී කළ ප්‍රහාරය සම්බන්ධයෙන් එවක ඇමති නිමල් සිරිපාල ද සිල්වා පාර්ලිමේන්තුවට ප්රකාශ කළේ මෙවැන්නකි.
‘2011/09/06 දරන අතිවිශේෂ ගැසට් පත‍්‍ර අංක 1722/17 මගින් ගම්පහ පරිපාලන දිස්ත‍්‍රික්කයේ මහජන සාමය හා නීතිය ආරක්ෂාව පවත්වා ගැනීම සඳහා යුද හමුදාවට බලය පවරනු ලැබ තිබුනා‘
පිරිසිදු පානීය ජලය ඉල්ලා වැලිවේරිය කළ උද්ඝෝෂණයේදී දෙදෙනකු මිය ගොස් ඇත්තේ වෙඩි වැදීමෙන් බවත්, එක් අයකු මියගොස් ඇත්තේ පහරදීමකින් බවත් වසර 3 කට පසුව අද නිගමනය කළ ගම්පහ ප්‍රධාන මහේස්ත්රාත් කාවින්දා නානායක්කාර මෙනවිය මේවා අපරාධයක් බවට තීරණය කළ අතර අපරාධ කරුවන් සොයා අත්අඩංගුවට ගන්නට පොලිසියට නියම කළා.
COMMENTS