ඇසළ පෙරහැර මංගල්‍යයේ ප්‍රථම කුඹල් පෙරහැර අදයි

මහනුවර ඓතිහාසික ශ‍්‍රී දළදා මාළිගාවේ ඇසල පෙරහැර මංගළ්‍යයේ ප‍්‍රථම කුඹල් පෙරහැර අද (08) වීදි සංචාරය කිරිමට නියමිතය. ඒ සඳහා අවශ්‍ය සියලූ කට...

මහනුවර ඓතිහාසික ශ‍්‍රී දළදා මාළිගාවේ ඇසල පෙරහැර මංගළ්‍යයේ ප‍්‍රථම කුඹල් පෙරහැර අද (08) වීදි සංචාරය කිරිමට නියමිතය.

ඒ සඳහා අවශ්‍ය සියලූ කටයුතු මේ වනවිට සම්පාදනය කර ඇති බව ශ‍්‍රී දළදා මාළිගාවේ දියවඩන නිළමේ ප‍්‍රදීප් නිලංග දෑල මහතා ප්‍රකාශ කරයි.

පෙරහැර කරඬුව වැඩම කරවීමේ භාග්‍ය හිමිව ඇති නැදුන්ගමුවේ රාජා ඇතුන් ගම්පහ වැලිවේරිය ප‍්‍රදේශයේ සිට සතියක පා ගමනින් අනතුරුව ඊයේ (07) මහනුවරට ළඟා වූ අතර අද දින ප්‍රථම කුඹල් පෙරහැර පස්වරු 07.12 වීදි සංචාරය ආරම්භ කිරීමට නියමිතය.

ඒ සම්බන්ධයෙන් අදහස් දැක්වූ දියවඩන නිලමේවරයා," ශ්‍රී දළදා මාලිගාවේ සතර මංගල්‍යය අතරින් ප්‍රධානතම මංගල්‍යය ඇසළ මංගල්‍යය අද දිනයේ දී ආරම්භ වෙනවා. පළමු කුඹල් පෙරහැර අද සැන්දෑ භාගයේ යෙදෙන සුභ මොහොතින් පෙරහැර විදී සංචාරය කිරීමට නියමිතයි. දළදා මාලිගාවේ ප්‍රධාන වාහල්කඩින් නික්මෙන පෙරහැර දළදා වීදියටත් දළදා වීදියෙන් රුජින හෝටලය අසලටත් රුජින හෝටලට අසලින් ඩී.එස් සේනානායක වීදියටත් එම වීදියෙන් පන්සල පාරටත් එතැනින් දේව වීදියටත් නැවත කොළඹ වීදියට ප්‍රවිශ්ට වී යටිනුවර වීදිය දක්වා ගමන් කොට රජ වීදියට ප්‍රවිශ්ට වී නැවත ශ්‍රී දළදා මාලිගාවට පැමිණ ප්‍රධාන වාහල්කඩින් ගෙවැදීමෙන් අද දිනයේ පෙරහැර නිමාවට පත්වෙනවා"යි පැවසීය.

එමෙන්ම අතර අද දිනයේ පෙරහැර නැරඹීමට පැමිණෙන ජනතාවට අවශ්‍ය පහසුකම් සලසා ඇති බවත් පෙරහැර වෙනුවෙන් විශේෂ ආරක්ෂක වැඩපිළිවෙලක් කි‍්‍රයාත්මක බවත් නිලමේවරයා වැඩිදුරටත් කියාසිටියේය.

මහනුවර - කමල් සුරවීර