දයා මාස්ටර්ට ඇප - උතුරු පලාතෙන් පිටවීම තහනම්

එල්.ටී.ටී.ඊ සංවිධානයේ හිටපු මාධ්‍ය ප්‍රකාශක වේලායුදන් දයානිදි නොහොත් දයාමාස්ටර් පසුගිය 10 වැනදා රිමාන්ඩ් කිරීමෙන් පසු අද (15) ඇපමත මුදා හැ...

එල්.ටී.ටී.ඊ සංවිධානයේ හිටපු මාධ්‍ය ප්‍රකාශක වේලායුදන් දයානිදි නොහොත් දයාමාස්ටර් පසුගිය 10 වැනදා රිමාන්ඩ් කිරීමෙන් පසු අද (15) ඇපමත මුදා හැරීමට වව්නියාව මහාධිකරණ විනිසුරු බාලෙන්ද්‍රන් සශි මහේන්ද්‍රන් මහතා නියෝග කළේය.

වව්නියාව මහාධිකරණයේදී 2664/16 දරන නඩු අංකය යටතේ නඩුව විභාගයට ගැනුනු අතර මෙහිදී ත්‍රස්ත විමර්ශන ඒකකය විසින් ත්‍රස්තවාදය වැලක්වීමේ පනතේ ආධාර කොන්දේසි යටතේ තහනම් ත්‍රස්ත සංවිධානයක මාධ්‍ය ප්‍රකාශකයෙකු වශයෙන් කටයුතු කිරීම සම්බන්ධයෙන් නඩුව ගොනුකොට තිබූනි.

වව්නියාව මහාධිකරණ විනිසුරු බාලෙන්ද්‍රන් සශි මහේන්ද්‍රන් මහතා නියෝග කොට සිටියේ රුපියල් ලක්ෂ පහක මුදල් ඇපමත හා රුපියල් ලක්ෂය බැගින් වූ රජයේ සේවකයින් 4 කගේ ශරීරඇප 4 ක් මත ඇපමත මුදා හරින බවටත් චූදිත දයා මාස්ටර් මහතාට නඩුව අවසන් වන තුරු උතුරු පලාතෙන් පිටවීමට නොහැකි අතර නඩුව අවසන් වනතුරු සෑම දිනකම යාපනය පොලීසියට වාර්තා කළ යුතු බවටත්ය.

මේ අනුව දයා මාස්ටර්ට 10 වැනිදා ඇප ඉදිරිපත් කිරීමට නොහැකි වූ බැවින් රිමාන්ඩ් කිරීමට මහාධිකරන විනිසුරුවරයා නියෝග කළ අතර අද (15) අදාල ඇප ඉදිරිපත් කිරීමෙන් පසුව ඇප මත මුදා හැරිණි.

වන්නි රොමේෂ් මධූෂංඛ