හිඟුරාන සීනි කම්හල රැක දෙන ලෙස ඉල්ලමින් ගල්ඔය වැවිලි සමාගමේ උක් ගොවියන් සහ එහි සේවකයින් අම්පාර දිසාපති කාර්යාලය ඉදිරිපිට දී අද (01) උද්ඝෝෂ...
හිඟුරාන සීනි කම්හල රැක දෙන ලෙස ඉල්ලමින් ගල්ඔය වැවිලි සමාගමේ උක් ගොවියන් සහ එහි සේවකයින් අම්පාර දිසාපති කාර්යාලය ඉදිරිපිට දී අද (01) උද්ඝෝෂණයක නියැලුණු අතර එම ස්ථානයේම තවත් පිරිසක් උක් වගා බිම්වල වී වගා කරන ලෙස ඉල්ලමින් විරෝධතා ව්‍යාපාරයක නිරත විය.
අද උදෑසන අම්පාර තැපැල් කාර්යාලය ඉදිරිපිට සිට පෙළපාලියකින් පැමිණි ගල්ඔය වැවිලි සමාගමේ උක් ගොවියන් සහ සේවකයින් දිසාපති කාර්යාලය අසලට පැමිණ හිඟුරාන සීනි කම්හල රැකදෙන ලෙසත් සියළු උක් ඉඩම්හි කඩිනමින් උක් වගා කරන ලෙසත් ඉල්ලා සිටි අතර පැයක පමණ කාලයක් විරෝධතාව දක්වා පසුව අම්පාර දිසාපති තුසිත වනිගසිංහ මහතා වෙත සංදේශයක් භාරදෙනු ලැබීය.
උක් වගා කරන ඉඩම්වල මොනම හේතුවක් නිසාවත් වී වගා කිරීමට ඉඩ නොදෙන ලෙස මෙහිදි මහා සංඝරත්නය, ගොවින් සහ සේවකයින් දිසාපතිවරයාගෙන් ඉල්ලිමක් කළ අතර එයට පිළිතුරු දුන් දිසාපතිවරයා කියාසිටියේ උක් වගා කිරීමට නිර්දේශිත ඉඩම්වල වී වගා කිරිමට කිසිසේත්ම ඉඩ නොදෙන බවයි.
එමෙන්ම මෙම ඉඩම් ගැටළුව පිලිබදව කොළඹ පැවැති සාකච්ඡාවක දී දීර්ඝ ලෙස කරුණු කතාකළ බවද දිසාපතිවරයා පැවසීය.
මේ අතර උක් වගාකරන ලද ඉඩම්වල වී වගා කරන ලෙස ඉල්ලා උද්ඝෝෂණය කළ අනෙක් පිරිස ද දිසාපතිවරයා වෙත සංදේශයක් භාරදෙනු ලැබීය.
මෙම දෙපිරිස අතර ගැටුම් සහගත තත්ත්වයක් ඇතිවේ යැයි සැකය මත පොලිස් කැරලි මර්දන කණ්ඩායමක් ද ගෙන්විමට පොලීසිය කටයුතු කළ නමුත් විරෝධතාව අවසානයේ කණ්ඩායම් දෙකම සාමකාමිව විසිර ගොස් තිබේ.
අම්පාර - වසන්ත චන්ද්‍රපාල
COMMENTS