මෙරට පවතින ආණ්ඩුක‍්‍රම ව්‍යවස්ථාවේ බෞද්ධාගම පිළිබඳ සඳහන් ඡේද ඉවත් කරමින් නව ආණ්ඩුක‍්‍රම ව්‍යවස්ථාවක් සකසන බවට ගෙනයන ප‍්‍රචාර සම්පූර්ණයෙන් ...
මෙරට පවතින ආණ්ඩුක‍්‍රම ව්‍යවස්ථාවේ බෞද්ධාගම පිළිබඳ සඳහන් ඡේද ඉවත් කරමින් නව ආණ්ඩුක‍්‍රම ව්‍යවස්ථාවක් සකසන බවට ගෙනයන ප‍්‍රචාර සම්පූර්ණයෙන් අසත්‍ය බවත් ගෞරවනීය මහා සංඝරත්නයට හෝ බෞද්ධාගමට හානියක් වන කිසිදු ආකාරයේ කි‍්‍රයාමාර්ගයක් රජය නොගන්නා බවත් ජනාධිපති මෛත්‍රීපාල සිරිසේන මහතා ප්‍රකාශ කරයි.
ජනාධිපතිවරයා මේ බව ප්‍රකාශ කළේ පසුගිය 27වනදා පස්වරුවේ මහනුවර, ගැටඹේ මහානාම විදුහල් ක්‍රීඩාංගණයේ පැවති රාජ්‍ය ජාතික පිරිවෙන් දින සැමරුම් උළෙල අමතමිනි.
බෞද්ධ ජනතාව ප‍්‍රමුඛ සියලු ආගමිකයින්ට සහ සියලු ජන කොටස්වලට පිළිගත හැකි නව ආණ්ඩුක‍්‍රම ව්‍යවස්ථාවක් රටට ඉදිරිපත් කරන බව මෙහිදී අවධාරණය කළ ජනාධිපතිවරයා නව ආණ්ඩුක‍්‍රම ව්‍යවස්ථාව සැකසීම තුළින් අපේක්ෂා කරන්නේ රටේ ප‍්‍රශ්න විසඳීම විනා අලුත් ප‍්‍රශ්න නිර්මාණය කිරීම නොවන බව ද කියාසිටියේය.
එමෙන්ම රට බෙදන සහ රටේ භෞමික අඛණ්ඩතාවයට සහ ස්වාධීනත්වයට හානිවන කිසිදු කරුණක් නව ආණ්ඩුක‍්‍රම ව්‍යවස්ථාව තුළ සඳහන් නොවන බවත් ඒ පිළිබඳ ඇතැමුන් ගෙන යන අසත්‍ය ප‍්‍රචාර ජනාධිපතිවරයා ලෙස මෙන්ම ආරක්ෂක අමාත්‍යවරයා ලෙස තරයේ ප‍්‍රතික්ෂේප කරන බවත් සඳහන් කළේය.
ඔහු වැඩිදුරටත් කියාසිටියේ රජය නිරන්තරයෙන් සාකච්ඡා කරමින් රටට ගැළපෙන, සියලුදෙනාට සාධාරණ නව ආණ්ඩුක‍්‍රම ව්‍යවස්ථාවක් සැකසීමට කැපවී සිටින බවයි.
රටේ පිරිවෙන් අධ්‍යාපනය නඟා සිටුවීමට මෙන්ම අඩු පහසුකම් සහිත වෙහෙර විහාරස්ථාන වැඩිදියුණු කිරීම වෙනුවෙන් ද රජය වැඩසටහන් රැසක් කි‍්‍රයාත්මක කර තිබෙන බව පැවසූ ඒ මහතා බෞද්ධාගමේ ඉදිරි ගමන් මග වෙනුවෙන් රජයෙන් ඉටු විය යුතු වගකීම් නිසි අයුරින්ම ඉටු කරන බව ද අවධාරණය කළේය.
'සසුනට දිරි දෙන සුරකිමු පිරිවෙන' මැයෙන් අධ්‍යාපන අමාත්‍යාංශය විසින් ජාතික පිරිවෙන් දින සැමරුම් රාජ්‍ය මහෝත්සවය සංවිධානය කර තිබූ අතර පිරිවෙන් ඇගයීමේ ස්වර්ණ සම්මාන ප‍්‍රදානය කිරීම ද මෙහිදී ජනාධිපතිවරයා අතින් සිදු විය.
අස්ගිරි පාර්ශවයේ මහානායක අතිපූජ්‍ය වරකාගොඩ ඥානරතන නායක ස්වාමින් වහන්සේ, මල්වතු අනුනායක අතිපූජ්‍ය නියංගොඩ විජිතසිරි අනුනායක ස්වාමින් වහන්සේ, රාමඤ්ඤ මහා නිකායේ මහානායක අතිපූජ්‍ය නාපාන පේ‍්‍රමසිරි නායක ස්වාමින් වහන්සේ, කැලණිය විශ්වවිද්‍යාලයේ කුලපති විද්‍යාලංකාර පරිවේණාධිපති පූජ්‍ය වැලමිටියාවේ කුසලධම්ම නායක ස්වාමින් වහන්සේ, පිරිවෙන් අධ්‍යක්ෂ මහාචාර්ය නාබිරිත්තංකඩවර ඥානරතන නායක ස්වාමින් වහන්සේ ප‍්‍රමුඛ මහා සංඝරත්නය ද අධ්‍යාපන අමාත්‍ය අකිල විරාජ් කාරියවසම්, අමාත්‍යවරුන් වන ලක්ෂ්මන් කිරිඇල්ල, එස්.බී. දිසානායක, මධ්‍යම පළාත් ප‍්‍රධාන අමාත්‍ය සරත් ඒකනායක යන මහත්වරුන් ඇතුළු මැති ඇමතිවරු පිරිසක්ද දියවඩන නිලමේ නිලංග දෑල මහතා ඇතුළු පිරිසක් මෙම අවස්ථාවට එක්ව සිටියහ.
COMMENTS