සැකකරු අයිතීන් ගරු කරන්න... ඇම්නෙස්ටි ඉන්ටර්නැෂනල් ශ‍්‍රී ලංකා රජයට කියයි

ශ්‍රී ලංකා රජය ත්‍රස්තවාදය වැළැක්වීමේ පනත (PTA) අහෝසි කිරීමට කැපවී සිටින බව ප්‍රකාශ කර තිබුණද, එම පනත යටතේ පුද්ගලයන් අත්අඩංගුවට ගැනීම සහ රඳව...

ශ්‍රී ලංකා රජය ත්‍රස්තවාදය වැළැක්වීමේ පනත (PTA) අහෝසි කිරීමට කැපවී සිටින බව ප්‍රකාශ කර තිබුණද, එම පනත යටතේ පුද්ගලයන් අත්අඩංගුවට ගැනීම සහ රඳවා තබා ගැනීම තවදුරටත් අඛණ්ඩව සිදුවීම පිළිබඳව තමන් දැඩි ලෙස කනස්සල්ලට පත්වන බව ඇම්නෙස්ටි ඉන්ටර්නැෂනල් ආයතනය පවසයි.

ජාත්‍යන්තර මානව හිමිකම් නීති සහ ප්‍රමිතීන්ට පටහැනි, අතිශය පුළුල් ප්‍රතිපාදන සහිත මෙම පනත දීර්ඝ කාලයක සිට දැඩි විවේචනයට ලක්ව ඇති බවද එම සංවිධානය පෙන්වා දෙයි. 

මෑතකදී සිදු වූ සිදුවීම් කිහිපයක් හරහා මෙම පනත ක්‍රියාත්මක කිරීමේදී මතුවන ගැටලුකාරී තත්ත්වයන් යළිත් තහවුරු වී ඇතැයි පවසන ඇම්නෙස්ටි ආයතනය, ඊට අදාළ ප්‍රධාන සිදුවීම් කිහිපයක් ඉස්මතු කර දක්වයි.

එල්.ටී.ටී.ඊ. (LTTE) සංවිධානය ප්‍රශංසාවට ලක් කළ බවට චෝදනා කරමින්, සමාජ මාධ්‍ය ඔස්සේ ප්‍රචාරය වූ ප්‍රසංගයකට සම්බන්ධ 24 හැවිරිදි දෙමළ හිප්-හොප් කලාකරුවෙකු වන සංගීතන් ගනේෂ්කුමාර් ජූනි 2 වැනිදා අත්අඩංගුවට ගෙන ජූනි 17 වැනිදා දක්වා රිමාන්ඩ් කර ඇත.

කෙසේ වෙතත්, මෙම පනතේ ඇති අපැහැදිලි වැරදි නිර්වචන ජාත්‍යන්තර නීති ප්‍රමිතීන්ට අනුකූල නොවන බව පවසන ඇම්නෙස්ටි ආයතනය, ජාත්‍යන්තර සාධාරණ නඩු විභාග ප්‍රමිතීන්ට අනුකූලව ඔහුට එරෙහිව පිළිගත හැකි චෝදනාවක් ඉදිරිපත් නොකරන්නේ නම් ඔහුව වහාම නිදහස් කරන ලෙස බලකර සිටියි.

2019 අප්‍රේල් මස සිදුවූ පාස්කු ඉරිදා බෝම්බ ප්‍රහාරයට සම්බන්ධ බවට සැකපිට පෙබරවාරි 25 වැනිදා අත්අඩංගුවට ගත් රාජ්‍ය බුද්ධි සේවයේ හිටපු ප්‍රධානී සුරේෂ් සාලේ, රඳවා තබා ගැනීමේදී නිසි නීතිමය ක්‍රියාවලියක් අනුගමනය නොකිරීම සහ අමානුෂික ලෙස සැලකීම පිළිබඳව ඔහුගේ පවුලේ අය සහ නීතිඥවරුන් කනස්සල්ල පළ කර ඇත. පාස්කු ප්‍රහාරයෙන් මියගිය 250 කට අධික වින්දිතයන්ට යුක්තිය ඉටුකිරීමේ වගකීම රජයට ඇති අතර, සැකකරුවන්ට එරෙහිව කටයුතු කළ යුත්තේ සාධාරණ නඩු විභාග අයිතිවාසිකම්වලට ගරු කරමින් පමණක් බව සංවිධානය අවධාරණය කරයි.

මත්ද්‍රව්‍යවලට අදාළ අපරාධ ක්‍රියාවලට සම්බන්ධ සිදුවීම් සඳහාද මෙම ත්‍රස්තවාදය වැළැක්වීමේ පනත යොදාගෙන තිබීම, පනතේ සීමාවන් සහ එය භාවිත කරන ආකාරය පිළිබඳව බරපතළ ප්‍රශ්න මතු කරන්නකි. 

ප්‍රමාණවත් ආරක්ෂිත පියවර නොමැති වීම හේතුවෙන්, මෙම පනත මගින් අත්තනෝමතික සහ අයථා පරිහරණයන්ට මෙන්ම වධහිංසා පැමිණවීම්වලට අවශ්‍ය පසුබිම සකසන බව ඇම්නෙස්ටි ආයතනය පෙන්වා දෙයි.