පවතින තත්ත්වය හමුවේ නිසි ආර්ථික ප්රතිසංස්කරණ සහ තෙල් මිල ගැලපීම් සිදු නොකළහොත් ශ්රී ලංකාව නැවතත් 2022 වසරේ අත්විඳි ආර්ථික අර්බුදය දෙසට ගම...
පවතින තත්ත්වය හමුවේ නිසි ආර්ථික ප්රතිසංස්කරණ සහ තෙල් මිල ගැලපීම් සිදු නොකළහොත් ශ්රී ලංකාව නැවතත් 2022 වසරේ අත්විඳි ආර්ථික අර්බුදය දෙසට ගමන් කරමින් සිටින බව ඇඩ්වොකාටා ආයතනයේ ධනනාත් ප්රනාන්දු මහතා පවසා සිටී.
දත්ත විශ්ලේෂණය කිරීමේදී පෙනී යන්නේ අප නිසි මාවතේ ගමන් නොකළහොත් "සුදු කොඩි" පෙනෙන්නට පටන් ගෙන ඇති බව ඔහු පෙන්වා දෙයි.
ප්රනාන්දු මහතා පෙන්වා දෙන්නේ 2021 සහ 2022 වසරවලදී මිල නිසි පරිදි ගැලපුවේ නැති නිසා තෙල් පරිභෝජනය ශීඝ්රයෙන් ඉහළ ගිය බවයි. එම තත්ත්වයම නැවතත් 2026 වසරේදී දක්නට ලැබෙන බවත්, විශේෂයෙන්ම 2025 මාර්තු මාසයට වඩා 2026 මාර්තු මාසයේදී පෙට්රල් සහ ඩීසල් පරිභෝජනය ශීඝ්රයෙන් වැඩි වී ඇති බවත් ඔහු පවසයි. මිල ගැලපීම ප්රමාද වනු ඇතැයි යන බියෙන් ජනතාව වැඩි වැඩියෙන් තෙල් ගබඩා කිරීමට උත්සාහ කිරීම මෙයට එක් හේතුවකි.
දත්ත වලට අනුව, ඛනිජ තෙල් නීතිගත සංස්ථාව (CPC) මේ වන විට පෙට්රල් ලීටරයකින් රුපියල් 113ක සහ ඩීසල් ලීටරයකින් රුපියල් 238ක පමණ පාඩුවක් ලබයි. මෙම පාඩුව අවසානයේ විදුබල මණ්ඩලයටද බලපාන අතර, එම ආයතන දෙකම ලංකා බැංකුව සහ මහජන බැංකුව වැනි රාජ්ය බැංකු වෙත යෑමෙන් සමස්ත බැංකු පද්ධතියම අනතුරේ වැටෙන බව ඔහු පෙන්වා දෙයි. 2021/22 කාලසීමාවේදීද සිදු වූයේ මෙයම බවත්, එවකට බැංකු පද්ධතිය ස්ථාවර කිරීමට රුපියල් බිලියන 400කට වඩා වැය කිරීමට සිදු වූ බවත් ඔහු මතක් කර දෙයි.
ලෝක වෙළඳපොළේ තෙල් මිල ඉදිරියේදී තවදුරටත් ඉහළ යාමට ඉඩ ඇති බවට ජාත්යන්තර මට්ටමින් පූර්වකථනය කර ඇත. යම් හෙයකින් එක් වරම ලෝක වෙළඳපොළේ මිල ඉහළ ගියහොත් එය දරාගත නොහැකි වන අතර, එවිට රුපියල නැවත අවප්රමාණය වීමට හෝ තෙල් පෝලිම් නැවත ඇති වීමට ඉඩ පවතින බව ධනනාත් ප්රනාන්දු මහතා අනතුරු අඟවයි.
මෙම අර්බුදයෙන් මිදීම සඳහා ඔහු යෝජනා කරන්නේ තෙල් මිල ලෝක වෙළඳපොළ මිලට අනුකූලව ගැලපීම, මිල ඉහළ යාමෙන් පීඩාවට පත්වන දුප්පත් ජනතාව ආරක්ෂා කිරීම සඳහා 'අස්වැසුම' වැනි සෘජු සහනාධාර වැඩසටහන් ශක්තිමත් කිරීම, පොදු ප්රවාහනය සඳහා විශේෂ සහන සැලසීම, රාජ්ය ආයතන (CPC වැනි) ප්රතිසංවිධානය කර ඒවායේ අකාර්යක්ෂමතාවය පාරිභෝගිකයා මත පැටවීම නැවැත්වීම ආදියයි.
නිසි අවස්ථාවේදී නිවැරදි තීන්දු නොගතහොත්, 2022 වසරේ අත්විඳි දේශපාලන සහ ආර්ථික අස්ථාවරභාවය නැවතත් ඇති වීමේ දැඩි අවදානමක් පවතින බව ඔහු අවධාරණය කරයි
මේ පුවත තව අයට බලන්න
COMMENTS