අසාධාරණ ලෙස තෙල් මිල වැඩි කිරීම හේතුකොට ගෙන අමාත්‍ය උදය ගම්මන්පිල මහතාට එරෙහිව ගෙන ඒමට සමගි ජන බලවේගය විසින් සැලසුම් කර ඇති විශ්වාසභංග යෝජ...
අසාධාරණ ලෙස තෙල් මිල වැඩි කිරීම හේතුකොට ගෙන අමාත්‍ය උදය ගම්මන්පිල මහතාට එරෙහිව ගෙන ඒමට සමගි ජන බලවේගය විසින් සැලසුම් කර ඇති විශ්වාසභංග යෝජනාව කඩාකප්පල් කිරීමේ මෙහෙයුමක් එජාප නායක රනිල් වික්‍රමසිංහ මහතා විසින් ආරම්භ කොට ඇති බව වාර්තා වේ.
ඒ අනුව රනිල් වික්‍රමසිංහ මහතා විසින් සමගි ජන බලවේගයේ මන්ත්‍රීවරුන් කිහිප දෙනකුටම මේ සම්බන්ධයෙන් දුරකතනයෙන් කතා කොට විවිධ උපදෙස් ලබා දී ඇති බවක් දැනගන්නට ඇත.
සමගි ජන බලවේගය තීන්දු කර තිබුණේ අදාළ විශ්වාසභංගය ඍජුවම අමාත්‍ය උදය ගම්මන්පිල මහතාට එරෙහිව රැගෙන ඒමටය.
දැනටමත් ආණ්ඩුව ඇතුළේ උදය ගම්මන්පිල මහතාට එරෙහිව දැඩි විරෝධයක් මතුව තිබීම ඊට හේතුව ලෙස ඉදිරිපත්ව තිබිණ.
නමුත් සජබ මන්ත්‍රීවරුන් කිහිපදෙනකුටම කතා කොට ඇති රනිල් වික්‍රමසිංහ මහතා මෙම විශ්වාසභංගය ගම්මන්පිල මහතාට නොව ආණ්ඩුවට එරෙහිව රැගෙන ආ යුතු බවට උපදෙස් දී තිබේ.
මේ හරහා ආණ්ඩුව බේරා ගැනීම වික්‍රමසිංහ මහතාගේ සැලැස්ම වී ඇති බව වාර්තා වේ.
ආණ්ඩුවේ ඉහළ පෙළ නියෝජිතයන්ගේ අනුදැනුම මත වික්‍රමසිංහ මහතා මෙසේ සජබ මන්ත්‍රීවරුන්ට කතා කොට ඇති බවද දැනගන්නට ඇත.
මේ බව සජබ මන්ත්‍රීවරුන් විසින් වහාම පක්ෂ නායක සජිත් ප්‍රේමදාස මහතා දැනුවත් කිරීමටද පියවර ගෙන ඇති බව දැනගන්නට ඇත.
COMMENTS