උතුරේ පමණක් නොව මුළු රටේම මත්ද්‍රව්‍ය ව්‍යාපාරය සමග උතුරු නැගෙනහිර දේශපාලනඥයින් සිටින බව අධ්‍යාපන රාජ්‍ය ඇමතිනී විජයකලා මහේස්වරන් මහත්මිය ...
උතුරේ පමණක් නොව මුළු රටේම මත්ද්‍රව්‍ය ව්‍යාපාරය සමග උතුරු නැගෙනහිර දේශපාලනඥයින් සිටින බව අධ්‍යාපන රාජ්‍ය ඇමතිනී විජයකලා මහේස්වරන් මහත්මිය මන්නාරමේදී පැවසුවාය.
අමාත්‍යවරිය මේ බව පැවසුවේ මන්නාරම අඩම්පන් මහා විද්‍යාලයේ වාර්ෂික නිවාසාන්තර තරගයේ ප්‍රධාන ආරාධිත අමුත්තා වශයෙන් සහභාගී වූ අවස්ථාවේදීය.
මෙහිදී තවදුරටත් අදහස් දැක්වූ විජයකලා මහේස්වරන් මහත්මිය කියා සිටියේ දේශපාලනඥයින්ගේ වාහන පරීක්ෂා කිරීමක් සිදු නොකරණ නිසා ඔවුන්ට ඉතා පහසුවෙන් මත්ද්‍රව්‍ය ඔවුන්ට අවශ්‍ය ස්ථාන වලට රැගෙන යාමට අවස්ථාව උදා වී ඇති බවයි.
මත්ද්‍රව්‍ය සදහා මේ වන විට උතුරු පළාත් මධ්‍යස්ථානයක් බවට පත්ව ඇත්තේ උතුරු පළාත් ඉන්දියාවට ඉතාම ආසන්නයේ පැවතීමත් ඉන්දියාවේ සිට විශාල වශයෙන් මත් ද්‍රව්‍ය උතුරු පළාතේ විවිධ ස්ථාන වලට ළගා වීම නිසාත් බවද ඇය මෙහිදී සදහන් කොට සිටියාය.
ජනාධිපතිවරයාත් රජයත් මත්ද්‍රව්‍ය වුවදුර පිටුදැකීමට කුමන වැඩ සටහන් ක්රියාත්මක කළද උතුරු නැගෙනහිර දේශපාලනඥයින් මත් ද්‍රව්‍ය ජාවාරම් වලට සම්බන්ධනම් එම වැඩ පිළිවෙලවල් වලින් කිසිදු ප්‍රයෝජනයක් නොමැති බවද අමාත්‍යවරිය කියා සිටියාය.
මේ සදහා ජනතාවට හා විශේෂයෙන්ම පාසල් සිසුන්ට කළ හැකි වන්නේ මත්ද්‍රව්‍ය පිටු දකිමින් මත්ද්‍රව්‍ය වලට ඇබ්බැහි නොවී සිටීම පමණක් බවද විජයකලා මහේස්වරන් අමාත්‍යවරිය සදහන් කළාය.
(දිනසේන රතුගමගේ)
COMMENTS