බාලවයස්කාර දියණියට අතවර කළ නරුම පියා වසර 60 ක් හිරේ,දියණියට ලක්ෂ 10ක් වන්දි ගෙවීමටත් නියෝග

Loading... සිය 13 හැවිරිදි බාලවයස්කාර දියණිය වසර කිහිපයක් තිස්සේ අවස්ථා කිහිපයකදීම බරපතළ ලිංගික අපයෝජනයට ලක් කළ පස් දරු පියකුට තංගල්ල මහ...

Loading...

සිය 13 හැවිරිදි බාලවයස්කාර දියණිය වසර කිහිපයක් තිස්සේ අවස්ථා කිහිපයකදීම බරපතළ ලිංගික අපයෝජනයට ලක් කළ පස් දරු පියකුට තංගල්ල මහාධිකරණ විනිසුරු ආර්. එස්. එස්. සපුවිද මහතා වසර 60 ක සිර දඬුවමක් හා අගතියට පත් දියණියට රුපියල් ලක්ෂ 10ක වන්දි මුදලක් ගෙවන ලෙස ඊයේ (11 දා) නියෝග කළේය.
මෙලෙස සිර දඬුවම් නියම වූයේ හුංගම, බටඅත පදිංචි 57 හැවිරිදි පස් දරු පියකුටය.

සැකකාර පියා 2015 වසරේ සිට 2016 වසර දක්වා කාලය තුළදී අවස්ථා ගණනාවකදීම සිය බාලවයස්කාර දැරිය අපයෝජනයට ලක් කර තිබේ. සිද්ධිය සම්බන්ධයෙන් හුංගම පොලිසිය විසින් සැකකරු අත්අඩංගුවට ගෙන අධිකරණයට ඉදිරිපත් කිරීමෙන් පසු සැකකරුට එරෙහිව චෝදනා 03 බැගින් චෝදනා 06 ක් සඳහා තංගල්ල මහාධිකරණයේ නඩු දෙකක් වෙන වෙනම පවරා තිබිණි.
අදාළ වැරදි සම්බන්ධයෙන් වරදකරු වූ සැකකාර පියාට තංගල්ල මහාධිකරණ විනිසුරුවරයා විසින් ඊයේ දඬුවම් නියම කෙරිණි. සැකකරුට එරෙහිව නීතිපතිවරයා විසින් ගොනු කර තිබූ චෝදනා හයටම වරදකරු වූ සැකකාර පියාට එක් චෝදනාවකට වසර 10 බැගින් චෝදනා 06 ට වසර 60ක සිර දඬුවමක් නියම කෙරිණි. මීට අමතරව එක් චෝදනාවකට රුපියල් 5000 බැගින් චෝදනා 06 සඳහා රුපියල් 30,000 ක දඩ මුදලක් ද නියම කෙරුණු අතර දඩ මුදල් නොගෙවන්නේ නම් මාස 06 බැගින් තවත් වසර 03 ක සිර දඬුවමක් නියම කෙරිණි.
මීට අමතරව වින්දිත දැරිය සඳහා එක් නඩුවකට රුපියල් ලක්ෂ 5 බැගින් නඩු දෙක සඳහා රුපියල් ලක්ෂ 10ක වන්දි මුදලක් ද ගෙවන ලෙසද මහාධිකරණ විනිසුරුවරයා නියෝග කළ අතර එම මුදල නොගෙවන්නේ නම් වසර දෙක බැගින් තවත් වසර 04ක බරපතළ වැඩ සහිත සිර දඬුවමක්ද නියම කෙරිණි.
පැමිණිල්ල වෙනුවෙන් හුංගම පොලිසියේ පොලිස් කොස්තාපල් විපුල මහතා රජයේ අධිනීතිඥ අග්බෝ පණ්ඩිතරත්න මහතා සමග පෙනී සිටියේය.
මත්තල - දිලීප් එන්. ජයසේකර
දිවයින පුවත්පත