දුෂණ විරෝධී බළකායේ මෙහෙයුම් අධ්‍යක්‍ෂ නාමල් කුමාර මහතා විසින් ඉදිරිපත් කර ඇති හඬපටවල ඇති කටහඬ නියෝජ්‍ය පොලිස්පති නාලක සිල්වා මහතාගේ බව රස ...
දුෂණ විරෝධී බළකායේ මෙහෙයුම් අධ්‍යක්‍ෂ නාමල් කුමාර මහතා විසින් ඉදිරිපත් කර ඇති හඬපටවල ඇති කටහඬ නියෝජ්‍ය පොලිස්පති නාලක සිල්වා මහතාගේ බව රස පරීක්‍ෂකවරයා විසින් තහවුරු කර ඇති නමුත් ඔහු අත්අඩංගුවට ගැනීමට තරම් දෙයක් එම හඬපටවල නැතැයි සම කැබිනට් ප‍්‍රකාශක, සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න මහතා පැවසීය.
ඝාතන කුමන්ත‍්‍රණයක් හෝ බරපතල වෙනත් කිසිවක් එම හඬපටයන්හි ඇතුළත්ව නොමැති බව ද සම කැබිනට් ප‍්‍රකාශකවරයා සඳහන් කළේය.
හඬපටයක කටහඬ තහවුරු වූ පලියට පුද්ගලයකු අත්අඩංගුවට ගත නොහැකි බව ද අමාත්‍යවරයා කීවේය.
අමාත්‍ය රාජිත සේනාරත්න මහතා මේ බව පැවසුවේ රජයේ ප්රවෘත්ති දෙපාර්තමේන්තුවේදී ඊයේ (17) පැවති කැබිනට් තීරණ දැනුම් දීමේ මාධ්‍ය හමුව අමතමිනි.
ජනාධිපතිවරයා ඝාතනය කිරීමේ කුමන්ත‍්‍රණයක් ඇති බව කියමින් එම හඬපට ඉදිරිපත් කළ තැනැත්තා පොලීසියට ඔත්තු සපයමින් මුදල් ලබාගත් අයෙකු බව කී ඇමති රාජිත සේනාරත්න මහතා ඔහුට ලැබිය යුතු මුදලක් නොලැබීම නිසා ඇති වූ කෝපය හේතුවෙන් මෙම හඬපට ඉදිරිපත් කර ඇතැයි ද ප‍්‍රකාශ කළේය.
මීට පෙර කිසිවෙකුත් නොදුටු අයෙක් හෝ පැමිණ දූෂණ විරෝධී බළකාය නමින් පුවරුවක් සවිකරගෙන මාධ්‍ය හමුවක් පැවැත්වූ විට එය බලවේගයක් කරන්නේ මාධ්‍ය විසින් බවද ඇමැතිවරයා සඳහන් කළේය.
COMMENTS